ខេត្តសៀមរាប៖ លោក រិទ្ធ បញ្ញា អធិការនគរបាលរង ក្រុងសៀមរាប ទទួលបន្ទុករដ្ឋបាលប៉ុស្តិ៍ ត្រូវបានកូនចៅថ្នាក់ក្រោម សរសេរបង្ហោះថា៖ ផឹកស្រាស្រវឹងជោកជាំ មករករឿងកូនចៅថ្នាក់ក្រោម នៅកន្លែងធ្វើការ ក្នុងអធិការនគរបាលក្រុងសៀមរាប ថែមទាំងទាញកាំបិតគប់មកលើ​មន្រ្តី​ ដែលត្រូវជាកូនចៅឈ្មោះ លីវ សុឈុនលេង បណ្តាលអោយរយះក្បាលហូរឈាម។ ជុំវិញករណីខាងនេះ មេស្រវឹងស្រាទាញកាំបិតគប់កូនចៅខាងលើនេះ បង្កអោយមានការភ្ញាក់ផ្អើលទាំងយប់ នៅវេលាម៉ោង ៨ និង ៤៥ នាទី ថ្ងៃទី១៩ ខែតុលា ឆ្នាំ២០១៨ ក្នុងអធិការនគរបាលក្រុងសៀមរាប។ ក្នុងរឿងនេះ បើយោងតាមប្រភពពីមន្ត្រីសមត្ថកិច្ចសូមមិនបញ្ចេញឈ្មោះ បានប្រាប់អ្នកសារព័ត៌មាន អោយដឹងថា៖ ហេតុអីខ្លួនជាថ្នាក់ដឹកនាំ បែរជាមិនគោរពតួនាទី ផឹកស្រាស្រវឹង បែរជាប្តូរនិស្ស័យ មករករឿងកូនចៅ ឬមួយអាងខ្លួនជាមេគេ ចង់ធ្វើ​អ្វីតាមតែ អំពើរចិត្តមែនទេ? បើ​តាមសម្តីរបស់លោក លីវ សុឈុនលេង ភេទប្រុស អាយុ២៨ឆ្នាំ ជា​ជនរងគ្រោះ បានបា្រប់ដល់អ្នកសារព័ត៌មាន អោយដឹងនារសៀលថ្ងៃទី ២០ ខែតុលា ឆ្នាំ២០១៨នេះថា៖ មុនដំបូង ខ្ញុំ(ជនរងគ្រោះ) កំពុងអង្គុយប្រចាំការនៅអធិការក្រុងសៀមរាប តាមវេនរបស់ខ្លួន ស្រាប់​តែលោកអធិការរងខាងលើ ផឹកស្រាស្រវឹងជោកជាំ មិនដឹងមកពីណា បាន​ប្រើពាក្យសម្តីមិនសមរម្យ មកលើរូបខ្ញុំ (ជនរងគ្រោះ) ពេលនោះក៏មាន​ប្រកែកគ្នាបន្តិចបន្តួច លោកអធិការរង ក៏ខឹងសម្បារ ហើយ​ក៏ទាញយកកាំបិត ដែលនៅជិតខ្លួនស្រាប់ គប់មក លើរូបខ្ញុំ(ជនរងគ្រោះ) បណ្តាលអោយរយះក្បាលហូរឈាម ភ្លាមៗ ជនរង គ្រោះមិនបានតបតវិញទេ ហើយដើរចេញទៅរកពេទ្យ ដើម្បីព្យាបាលរបួសខ្លួនឯង។ ជនរងគ្រោះបានបន្ថែមថា៖ បើរូបលោកមិន បានគេចទាន់ពេលទេ ប្រហែលរូបលោក ត្រូវដេកពេទ្យជាមិនខានឡើយ។ ក្នុងរឿងនេះលោក ទេព ចាន់ណា អធិការនគរបាលក្រុងសៀមរាប បានប្រាប់អោយដឹងថា៖ រឿងនេះយប់មិញលោកអត់បានដឹងទេ ជារឿងបុគ្គល ទុកអោយបុគ្គលដោះស្រាយទៅ។ បបើតាមប្រភពមួយបានលួចខ្សឹបប្រាប់ថា៖ លោកអធិការរងក្រុងសៀមរាប នេះ មានវ័យក្មេង ទើ​បនឹងចូលកាន់តំណែងបានជាងមួយឆ្នាំនេះទេ ទើ​បនៅមានចិត្ត ឆេវឆាវ មិនសាកសម នឹង តូនាទីជាថ្នាក់ដឹកនាំនោះទេ៕