ហ្គេមបាញ់ត្រីដុះស្លែមួយកន្លែង នៅក្នុងមជ្ឈមណ្ឌលកោះពេជ្រ ត្រូវបានស្នងការនគរបាលរាជធានីភ្នំពេញ ធ្វើការបង្ក្រាប.!!!
រាជធានីភ្នំពេញ៖ កក្រើកពេញកោះពេជ្រ និងមានការសរសើរពីមហាជនពីមាត់ មួយទៅមាត់មួយ ដោយសារ តែយប់មិញមានការចុះបង្ក្រាបទ្រង់ទ្រាយធំ នៅទីតាំងហ្គេមបាញ់ត្រី យីហោ "Diamond Cartoon world" តាមបណ្តោយផ្លូវបេតុងនៅក្នុងមជ្ឈមណ្ឌលកោះពេជ្រ ស្ថិតនៅក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ នៅវេលាម៉ោង១១និង៣៥នាទីយប់ ថ្ងៃទី១៦ ខែវិច្ឆិកា ឆ្នាំ២០១៨។
ការចុះបង្ក្រាបជាលក្ខណៈទ្រង់ទ្រាយធំនេះ ធ្វើឡើងក្រោយពីមានបទបញ្ជពីលោកឧត្តមសេនីយ៍ឯក ស ថេត បានបញ្ជាអោយកម្លាំងព្រហ្មទណ្ឌកំរិតស្រាលរបស់ស្នងការនគរបាលរាជធានីភ្នំពេញ បានចុះប្រត្តិការបង្ក្រាបទូហ្គេមបាញ់ត្រី នៅក្នុងមជ្ឈមណ្ឌលកោះពេជ្រ ចំនួន២ទីតាំងក្នុងពេលតែមួយ ។ កម្លាំងសមត្ថកិច្ចបានធ្វើការដកហូតវត្ថុតាងរួមមានៈ ទូហ្គេមបាញ់ត្រីចំនួន១៣ទូ និងអ្នកចូលទៅលេងជិត៣០នាក់។
លោកឧត្តមសេនីយ៍ឯក ស ថេត ស្នងការរាជធានីភ្នំពេញ បានលើកឡើងថា៖ ដើម្បីលុបបំបាត់បទល្មើស ចោរកម្ម លួច ឆក់ ប្លន់ នឹង គ្រឿងញៀន ទីតាំងទូហ្គេមបាញ់ត្រី នៅទីក្រុងភ្នំពេញ ជាពិសេសតំបន់ទេសចរណ៍ និងតាមផ្ទះ ថ្នាក់ដឹកនាំកំពូលៗ ត្រូវតែធ្វើអោយបានល្អ និងមិនអនុញ្ញាតអោយបើកឡើយ បើនរណាអនុញ្ញាត អ្នកនោះទទួលខុសត្រូវចំពោះមុខច្បាប់។ លោកឧត្តមសេនីយ៍ឯក ក៏បាន អរគុណដល់បងប្អូន ដែលបានផ្តល់ព័ត៌មានមកអោយគាត់ អំពីបញ្ហាទូហ្គេមបាញ់ត្រី ដែលបង្កប់ទៅដោយបញ្ហាគ្រឿងញៀន ក្មេងទំនើង ល្បែងស៉ីសង និងបញ្ហាអសន្តិសុខផ្សេងទៀត។
បច្ចុប្បន្ន ទូហ្គេមទាំងអស់ ត្រូវបានកម្លាំងជំនាញដកហូតយកមករក្សាទុក នឹងបន្តនីតិវិធី៕
រាយការណ៍ដោយៈ គេហទំព័រ ប៉ោយប៉ែតប៉ុស្តិ៍ www.poipetpostnews.com