ខេត្តបន្ទាយមានជ័យ៖ នៅថ្ងៃទី២៧ ខែវិចិ្ឆកា ឆ្នាំ២០១៨ កងរាជអាវុធហត្ថខេត្តបន្ទាយមានជ័យ បានប្រារព្វពិធីបិទវគ្គហ្វឹកហ្វឺនបំប៉នជំនាញកងរាជអាវុធហត្ថ រយៈពេល១៤ថ្ងៃ គិតចាប់ពីថ្ងៃទី១៤ ខែវិចិ្ឆកា ដល់ថ្ងៃទី២៧ ខែវិចិ្ឆកា ឆ្នាំ២០១៨។ ដែលមានសិក្ខាកាមចំនួន ៧២នាក់ លើជំនាញចំនួន០៧ រួមមាន ៖ ១-លំហាត់របៀបជួរទ័ព ២-ការងាររក្សាសណ្តាប់ធ្នាប់ ៣-ប្រតិបត្តិការទប់ស្កាត់ និងបង្រ្កាបបាតុកម្ម ៤-ផលប៉ះពាល់ និងច្បាប់ស្តីពីគ្រឿងញៀន ៥-ការគ្រប់គ្រងសម្ភារៈសឹក ៦-ច្បាប់ព្រហ្មទណ្ឌ ៧-លំហាត់របៀបបាញ់ស៊ីប។ ក្នុងកម្មវិធីបិទវគ្គហ្វឹកហ្វឺននេះផងដែរ ក៏មានការបាញ់គ្រាប់ពិត ក្រោមអធិបតីភាពលោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្ត ព្រមទាំងមានការអញ្ជើញចូលរួមពីសំណាក់លោកមេបញ្ជាការរង នាយរងសេនាធិការ ប្រធានមន្ទីរ នាយ ការិយាល័យ នាយទាហាននាយទាហានរង និងពលទាហានជាច្រើនរូប រួមជាមួយមន្ត្រីរាជការតាមបណ្តាមន្ទីរ ស្ថានប័ន និងអង្គភាពនានាជុំវិញខេត្តយ៉ាងច្រើនកុះករ។ ក្នុងកម្មវិធីហ្វឹកហ្វឺននេះ លោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្ត បានផ្តល់រង្វាន់លើកទឹកចិត្តដល់សិក្ខាកាមដែលទទួលបានចំណាត់ថ្នាក់ល្អក្នុងការបាញ់ស៊ីបគ្រាប់ពិតក្នុងនោះរួមមាន ៖ ១-ចំណាត់ថ្នាក់លេខ១ (ចំនួន ០២នាក់) ក្នុងម្នាក់ទទួលបាន ឯកសណ្ឋានឈុតពណ៌ទឹកប៊ិច ០១កំប្លេ អាវយឺត (អ.ហ) ០១ និងថវិកា ០១លានរៀល ២ ចំណាត់ថ្នាក់លេខ ២(០១នាក់) ទទួលបាន ឯកសណ្ឋានឈុតពណ៌ទឹកប៊ិច ០១កំប្លេ អាវយឺត (អ.ហ) ០១ និងថវិកា ៥០ម៉ឺនរៀល ៣ ចំណាត់ថ្នាក់លេខ ៣(០១នាក់) ទទួលបាន ឯកសណ្ឋានឈុតពណ៌ទឹកប៊ិច០១កំប្លេ អាវយឺត (អ.ហ) ០១ និងថវិកា៣០ម៉ឺនរៀល និងផ្តល់ជូនប័ណ្ណសរសើរលើកទឹកចិត្តដល់សិក្ខាកាមដែលគោរពវិន័យខ្ជាប់ខ្ជួន មានសណ្តាប់ធ្នាប់ល្អ ចំនួន០៥នាក់បន្ថែមទៀត និងបានរៀបចំពិសារអាហារសាមគី្គ ថ្ងៃត្រង់មួយពេលសម្រាប់សិក្ខាកាម និងភ្ញៀវកិត្តិយសដែលបានអញ្ជើញចូលរួមផងដែរ ៕ ដោយៈ លោក វ៉ិត រិទ្ធ និពន្ធនាយក គេហទំព័រប៉ោយប៉ែតប៉ុស្តិ៍ www.poipetpostnews.com