ខេត្តបន្ទាយមានជ័យ៖ សិស្សសាលាចំនួន២០ នាក់ នៅក្រុងប៉ោយប៉ែត ដួលសន្លប់ជាបន្តបន្ទប់ តាមការសន្និដ្ឋានសង្ស័យថា៖ ហេវហត់ក្រោយពីធ្វើទិវាពលកម្ម សំអាតបរិស្ថាន ដែលហេតុការណ៍នេះ បានកើតឡើងបង្កអោយមានការភ្នាក់ផ្អើល កាលពីវេលាម៉ោង១០ និង៣០នាទី នៅថ្ងៃទី២១ ខែធ្នូ ឆ្នាំ ២០១៨។ លោក ចែម សំបូរ ប្រធានការិយាល័យអប់រំក្រុងប៉ោយប៉ែត បានប្រាប់ថា៖ ចំពោះសិស្សសាលា ដែលដួលសន្លប់ចំនួន២០នាក់នេះ សុទ្ធតែជាសិស្សស្រីៗ ហើយក៏ជាសិស្សដែលបានចូលរួមដង់ហែរ និងរើសសំរាម ក្នុងពិធីទិវាពលកម្មសំអាតបរិស្ថានអនាម័យ។ បន្ទប់ពីហែរ និងរើសសំរាមពេញមួយព្រឹក សិស្សដែលហែរ ដល់ចំណុចអនុវិទ្យាល័យ បាលិលេយ្យ២ នៅក្នុងភូមិបាលស្ពាន២ សង្កាត់ និង ក្រុងប៉ោយប៉ែត បានចូលឈប់សំរាកនៅម៉ោង១០ និង៣០នាទី ស្រាប់តែ មានសិស្សដួលសន្លប់ ជាបន្តបន្ទាប់ រហូតទៅដល់២០នាក់។ លោកបញ្ជាក់ទៀតថា៖ ករណីនេះ កើតឡើងលើសិស្សស្រី ដែលមានអាយុចាប់ពី១៤ ឆ្នាំ ទៅ១៨ឆ្នាំ ដែលមកពីសាលាឯកជន និងសាលារដ្ឋ បន្ទាប់ពីឃើញសកម្មភាពនោះហើយ សិស្សដែលរងគ្រោះត្រូវបានបញ្ជូនទៅកាន់មន្ទីរឯកជននៅក្បែរនោះផងដែរ រីឯចំពោះមូលហេតុលោកនូវមិនអាចបញ្ជាក់បាននៅឡើយទេ។ លោកវរសេនីយ៍ឯក ប៊ុន ណាំអៀង មេបញ្ជាការរងកងរាជអាវុធហត្ថខេត្តបន្ទាយមានជ័យ ប្រាប់ថា៖ ហេតុការណ៍ដែលធ្វើអោយដួលសន្លប់សិស្សសាលាជាបន្ត បន្ទាប់នេះ និងតាមការសាកសួរមិត្តភក្តិរបស់សិស្សដែលដួលសន្លប់ បណ្តាលមកពីពួកគេ អត់បានញ៉ាំចំណី បានញ៉ាំតែទឹក ហើយហែរ និង រើសសំរាម ហេវហត់ពេក ខ្សោយ ក៏ដួល សន្លប់ និងសិស្សខ្លះ ក្រោយពេលឃើញមិត្តភក្តិដួលសន្លប់ ក៏តក់ស្លុតភ័យដួលសន្លប់តាមគ្នាតែម្តង។ លោកបញ្ជាក់ថា៖ ទោះបីជាយ៉ាងណា នេះគ្រាន់តែជាព័ត៌មានបឋមទេ ព័ត៌មានជាក់លាក់ កម្លាំងរបស់លោក និងកម្លាំងនគរបាល រួមទាំងអាជ្ញាធរ កំពុងស្រាវជ្រាវរឿងនេះបន្តទៀត។ បន្ទាប់ពីក្រោយសិស្សដួសសន្លប់ ឃើញមានរថយន្តសង្គ្រោះជាច្រើនគ្រឿង ខ្លះដឹកសិស្សយកទៅព្យាបាលនៅមន្ទីរឯកជន ខ្លះទៀតត្រូវបានបញ្ជូនទៅព្យាបាលនៅពេទ្យបង្អែកប៉ោយប៉ែត២ (ពេទ្យបង្អែកដីថ្មី)។ គួរំលឹកផងដែលថា៖ កន្លងមកថ្មីៗនេះ សិស្សានុសិស្ស នៅស្រុកថ្មគោល និង សិស្សានុសិស្សស្រុកសំពៅកូន ក្នុងខេត្តបាត់ដំបង ក៏មានមណីសិស្សានុសិស្សសាលា ដួលសន្លប់ជាច្រើនអ្នកផងដែល៕ ដោយៈ ជួង វិសិដ្ឋ និពន្ធនាយក គេហទំព័រ ប៉ោយប៉ែតប៉ុស្តិ៍ www.poipetpostnews.com