បែកធ្លាយធំុក្លិនស្អុយភាយៗ.!ក្រុមហ៊ុន ម៉ាស្ទ័រខេសាន់ និង ក្រុមហ៊ុន លឹមរ៉ូយ៉ាល់ របស់ឧកញ៉ា សឹង សំអុល សម្រុក ដឹកជញ្ជូនឈើប្រណិត ចេញពីស្រុកកោះញែក យ៉ាងគឃ្លើន អាជ្ញាធរ ខេត្តមណ្ឌលគិរី គ្មានការបង្ក្រាប...!!!
ខេត្តមណ្ឌលគិរី៖ ប្រភពពីសមត្ថកិច្ចពាក់ព័ន្ធក្នុងខេត្តមណ្ឌលគិរី បានអោយដឹងថា៖ កាលពីយប់ថ្ងៃទី២១ ខែធ្នូ ឆ្នាំ២០១៨។ ក្រុមហ៊ុនម៉ាស្ទ័រខេសាន់ របស់មេឈ្មួញ សឹង សំអុល (ឧកញ៉ា សឹង សំអុល) បានធ្វើសកម្មភាពដឹកឈើប្រណិត ចេញពីស្រុកកោះញែក ចំនួន១៣រថយន្តយីឌុបធុនធំ។
ប្ប្រភពបានអោយដឹងទៀតថា៖ កាលពីវេលាម៉ោង០៦និង៣០នាទី ព្រលប់ ថ្ងៃទី២១ ខែធ្នូ ឆ្នាំ២០១៨ រថយន្តយីឌុបចំនួន៥គ្រឿងរបស់មេឈ្មួញ សឹង សំអុល ដឹកឈើចេញពីស្រុកកោះញែក ទៅស្រុកយួន ហើយរថយន្តមួយចំនួន អាចចេញទៅស្រុកយួនតាមច្រកព្រំដែន ក្នុងស្រុកកែវសីមា ខេត្តមណ្ឌលគិរី។ ចំណែករថយន្តដឹកឈើមួយចំនួនទៀត អាចចេញទៅស្រុកយួនតាមច្រកត្រពាំងស្រែ-វ៉ាលឺ ស្រុកស្នួល ខេត្តក្រចេះ ព្រោះមានការឃុបឃិតបើកដៃ ពីសំណាក់សមត្ថកិច្ចជាច្រើនស្ថាប័ន នៅតាមដងផ្លូវ ក៏ដូចជាសមត្ថកិច្ចនៅច្រកព្រំដែន ដែលគិត តែពីរឿងប្រមូលលុយចែកគ្នាធ្វើមានធ្វើបានយ៉ាងសុខស្រួល។
មានសេចក្តីរាយការណ៍ថា ៖ នៅយប់ថ្ងៃទី២១ ខែធ្នូ ឆ្នាំ២០១៨ ក្រុមហ៊ុនម៉ាស្ទើ ខេសាន់ របស់ឧកញ៉ា សឹង សំ អុល ដែលជាមន្ត្រីប៉េអឹមផងនោះ ត្រៀមចេញឈើប្រណិត ១៣ឡានយីឌុបទៀតហើយ ពីចំណុច ស្រុកកោះញែក ខេត្តមណ្ឌលគិរី ជាកស្តែងនៅវេលាម៉ោង០៦និង៣០នាទី ល្ងាចថ្ងៃទី២១ ខែធ្នូ ឆ្នាំ២០១៨នេះ គេឃើញមានរថយន្តយីឌុបចំនួន ៥គ្រឿង ដឹក ឈើចេញពីស្រុកកោះញែក ខេត្តមណ្ឌលគិរីនេះ ដែលគេសង្ស័យថា៖ អាចនឹង កាច់ចង្កេះឆ្លងទៅប្រទេសវៀតណាម តាមច្រកមួយចំនួន ក្នុងស្រុកកែវសីមា ឬច្រកមួយចំនួនទៀត ក្នុងស្រុកស្នួល ខេត្តក្រចេះ ។
មន្ត្រីអង្គការក្រៅរដ្ឋាភិបាល បានអោយដឹងថា រថយន្តយីឌុប៥គ្រឿង ដឹកឈើចេញពីស្រុកកោះញែក កាលពីព្រលប់ថ្ងៃទី២១ ខែធ្នូ គឺជារបស់មេឈ្មួញ សឹង សំអុល ដែលល្បីល្បាញខាងបំផ្លាញព្រៃឈើ ក្នុងស្រុកកោះញែក អោយរលាយ រលត់គ្មានសល់។
ក៏ប៉ុន្តែប្រភពខ្លះបែរជាអះអាងថា៖ រថយន្តយីឌុបដឹកឈើទាំង៥គ្រឿងនោះជារបស់ឈ្មួញឈ្មោះ តាសក់ស ហៅតាដានី ដែលជាអ្នកចាត់ចែងការងាររបស់ក្រុមហ៊ុនលឹមរ៉ូយ៉ាល់ទៅវិញ គឺក្រុមឈ្មួញកំពុងតែព្យាយាមបិទបាំងសកម្មភាពរបស់ពួកគេ។ ក្នុងនោះលោក អ៊ុំ វណ្ណសុភគ៌ នាយខណ្ឌរដ្ឋបាលព្រៃឈើខេត្តមណ្ឌលគិរី បានប្រាប់អ្នកសារព័ត៌មានថា រថយន្តដឹកឈើទាំង៥គ្រឿងនោះគឺជារបស់ក្រុមហ៊ុនលឹមរ៉ូយ៉ាល់ ហើយថា៖ ជាឈើមាន ច្បាប់អនុញ្ញាតទៀតផង។សូមបញ្ជាក់ថា៖ បទល្មើសព្រៃឈើក្នុងអាណាចក្រខេត្តមណ្ឌលគិរី ចាប់ផ្តើមកក្រើកវិញហើយ ទោះជារារដ្ឋាភិបាលថា៖ បញ្ឈប់ការអនុញ្ញាតនាំចេញ ដោយស្នើអោយអាជ្ញាធរវៀតណាម ជួយទប់ស្កាត់ក៏ដោយ លោកស្វាយ សំអ៊ាង អភិបាល ខេត្តមណ្ឌលគិរី ថ្មីៗនេះ ត្រូវបានលេចធ្លាយព័ត៌មាន ស្តីពីការឃុបឃិ ជាមួយឈ្មួញវៀតណាម នាំចេញឈើត្រូវបានសារព័ត៌មានប្រព័ន្ធផ្សព្វផ្សាយក្នុងស្រុក ជាច្រើនស្ថាប័ន បានចុះផ្សាយព្រោងព្រាតនោះ។
ទន្ទឹមនិងនេះ ក្រុមហ៊ុនលឹមរ៉ូយ៉ាល់ របស់តាសក់ស ហៅតាដានី ក៏សម្រុកកាប់ឈើនិងដឹកជញ្ជូនឈើចេញពីស្រុកកោះញែក យ៉ាយ៉ាងរលូនផងដែល ព្រោះមានការឃុបឃិតបើកដៃពីសំណាក់លោក អ៊ុំ វណ្ណសុភគ៌ មេរដ្ឋបាលព្រៃឈើខេត្តមណ្ឌលគិរី និងលោក សុង ឃាង ប្រធានមន្ទីរកសិកម្មខេត្តមណ្ឌលគិរី ដែលល្បីល្បាញខាងប្រព្រឹត្តអំពើពុករលួយ។
មន្ត្រីអង្គការក្រៅរដ្ឋាភិបាលល និង សកម្មជនព្រៃឈើក្នុងខេត្តមណ្ឌលគិរី បានអះអាងថា៖ បើទោះបីក្នុងទីតាំងក្រុមហ៊ុន ម៉ាស្ទ័រខេសាន់ និងក្រុមហ៊ុនលឹមរ៉ូយ៉ាល់ គ្មាននៅសល់ឈើសម្រាប់កាប់ធ្វើអាជីវកម្មបន្តទៀត យ៉ាងណា ក៏ដោយ ក៏មេឈ្មួញ សឹង សំអុល និងតាសក់ស នៅតែមានឈើដឹកចេញទៅស្រុកយួនយ៉ាងពេញបន្ទុកដ៏ដែល។
ចំណែកលោក ស្វាយ សំអ៊ាង អភិបាលខេត្តមណ្ឌលគិរី ក៏ដូចជាថ្នាក់ដឹកនាំក្រសួងពាក់ព័ន្ធ បែរជាធ្វើមិនដឹងមិនឮអ្វីទាំងអស់ ទុកអោយឈ្មួញធំៗបំផ្លាញព្រៃឈើ ក្នុងស្រុកកោះញែក យ៉ាងគឃ្លើន។ បើយោងប្រសាសន៍
សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ សម្តេច ធ្លាប់ព្រមានម្តងរួចមកហើយកាលពីប៉ុន្មានខែមុនមកលើលោក ស្វាយ សំអ៊ាង អភិបាលខេត្តមណ្ឌលគិរី ថា៖ មិនបានទប់ស្កាត់បទល្មើសព្រៃឈើក្នុងដែនសមត្ថកិច្ចខ្លួនគ្រប់គ្រង និងប្រឈម ដកតំណែងផងដែល៕
ដោយៈ ជួង វិសិដ្ឋ និពន្ធនាយក
គេហទំព័រ ប៉ោយប៉ែតប៉ុស្តិ៍
www.poipetpostnews.com