ខេត្តព្រះវិហារ៖ សមត្ថកិច្ច ចុះបង្ក្រាបករណីចាប់ជំរិត ទាប្រាក់ នារី ជនជាតិថៃចំនួន០២នាក់ ស្ថិតក្នុងភូមិស្រអែមជើង ឃុំស្រអែម ស្រុកជាំក្សាន្ត ខេត្តព្រះវិហារ។ ការឃាត់ខ្លួនជនសង្ស័យទាំង០៥នាក់នេះ បានធ្វើឡើងនៅព្រឹកថ្ងៃទី២៥ ខែធ្នូ ឆ្នាំ២០១៨ ។ លោកឧត្តមសេនីយ៍ទោ យិន ចំណាន ស្នងការនគរបាលខេត្តព្រះវិហារ បានបញ្ជាក់ថា៖ ការឃាត់ខ្លួនជនសង្ស័យជំរិតទាប្រាក់ ទាំង៥នាក់នេះ ​ក្រោមការចង្អុលបង្ហាញពីនាយឧត្តមសេនីយ៍ សន្ដិបណ្ឌិត នេត សាវឿន អគ្គស្នងការនគរបាលជាតិ និង​ នាយឧត្តសេនីយ៍ ឆៃ ស៊ីណារិទ្ធ អគ្គស្នងការរងនគរបាលជាតិ ទទួលផែនសន្តិសុខ។លោកស្នងការ បាន​រៀបរាប់ពីដំណើ​ររឿងថា៖កាលពីថ្ងៃទី២៣ ខែធ្នូ ឆ្នាំ២០១៨​ ស្ត្រីរងគ្រោះជាជនជាតិថៃទាំង២នាក់​ បានធ្វើដំណើរតាមយន្តហោះ ពីទីក្រុងបាងកក មកចុះនៅព្រលានយន្តហោះខេត្តសៀមរាប។ ក្រោយស្ត្រីរងគ្រោះចុះពីលើយន្តហោះ ក៏មានរ៉ឺម៉កកង់បីដឹកចេញពីព្រលាន​យន្តហោះ ដែលមាន​រថយន្តមួយគ្រឿង ចាំទទួលយកមកទីតាំងកើតហេតុនៅស្រុកជាំក្សាន្ត ខេត្តព្រះវិហារតែម្តង។ ក្រោយមកក្រុមជនសង្ស័យទាំង៥នាក់នេះ បានបង្ខំអោយស្ត្រីរងគ្រោះ ដែលជាជនជាតិថៃទាំង២នាក់នេះ ទូរស័ព្ទទៅក្រុមគ្រួសារនៅប្រទេសថៃ អោយផ្ទេរប្រាក់ជាថ្នូរ និងការដោះលេង។ បន្ទាប់ពីស្ត្រីជនជាតិថៃ ទាំង២រូបនេះ បានប្រាប់ក្រុមគ្រួសារ និងផ្ញើ​រូបភាពទៅអោយក្រុមគ្រួសារមើល ក្រុមគ្រួសាររងគ្រោះក៏ប្តឹងមកស្ថានទូតថៃ ប្រចាំកម្ពុជា ហើយស្ថានទូតថៃ ប្តឹងបន្តមកអគ្គស្នងការនគរបាលជាតិ ទើបបំបែកបានសំណុំរឿងនេះ។ លោកឧត្តមសេនីយ៍ទោយិន ចំណាន បានបន្ថែមថា៖ បន្ទាប់ពីទទួលបានការណែនាំពីអគ្គស្នងការដ្ឋាននគរបាលជាតិ កម្លាំងនគរបាលខេត្តព្រះវិហារ ប្រមាណ៤០នាក់ បានសហការជាមួយកម្លាំងនគរបាល នៃនាយកដ្ឋានសន្តិសុខផ្ទៃ​ក្នុង បានចុះទៅដល់ទីតាំងខាងលើនិងធ្វើការឡោមព័ទ្ធ ទីតាំងខាងលើ មួយយប់ទល់ភ្លឺ រហូតឈានដល់ការបង្ក្រាបបានជោគជ័យ ដោយឃាត់ខ្លួនជនសង្ស័យ​​៥នាក់ព្រមទាំងដកហូតសម្ភារមួយចំនួន និងរំដោះនារីជនជាតិថៃ បានដោយសុវត្ថិភាព។ បច្ចុប្បន្នជនសង្ស័យទាំង៥នាក់ ដែលចាប់ជំរិត នារីជនជាតិថៃ២នាក់ ខាងលើ រួមនិងវត្ថុតាងថ្នាំញៀនជិត៣គីឡូក្រាម អាវុធAKបត់១ដើមគ្រាប់៣០គ្រាប់ និងសំភារៈផ្សេងទៀត ត្រូវបានបញ្ជូនទៅកាន់រាជធានីភ្នំពេញដើម្បីចាត់ការបន្តទៅតាមនីតិវិធីច្បាប់៕ ដោយៈ ជួង វិសិដ្ឋ និពន្ធនាយក គេហទំព័រ ប៉ោយប៉ែតប៉ុស្តិ៍ www.poipetppostnews.com