ផ្ទុះចង្ក្រានហ្គាសទាំងកណ្តាលយប់ បង្កជាអគ្គីភ័យឆាបឆេះផ្អើលប្រជាពលរដ្ឋពេញភូមិ...
ខេត្តប៉ៃលិន ៖ ខណ:ពេលដែលមនុស្សកំពុងតែដេកលង់លក់ស្ងប់ស្ងាត់ទៅហើយ ស្រាប់តែមានឮស្នូរសម្លេងផ្ទុះមួយបានកើតឡើង ដោយសារឆ្លងចរន្តកំប៉ុងហ្គាស បង្កជាអគ្គីភ័យឆាបឆេះ បណ្តាលអោយឆាបឆេះផ្ទះបាយ និងខូចខាតសម្ភារមួយចំនួនធំផងដែរ ។
ហេតុការណ៍នេះ បានកើតឡើងកាលពីវេលាម៉ោង១១ និង០៥នាទីយប់ ថ្ងៃទី០៦ ខែធ្នូ ឆ្នាំ២០១៨ នៅចំណុចទល់មុខក្លឹបកំសាន្តហ្គោលឌិន ស្ថិតនៅក្នុងភូមិប៉ាហ៊ីត្បូង សង្កាត់ប៉ៃលិ ក្រុងប៉ៃលិន ខេត្តប៉ៃលិន ។
ប្រភពព័ត៌មានពីនគរបាលបានអោយដឹងថា៖ ម្ចាស់ផ្ទះមានឈ្មោះ ហាក់ ស្រីមុំ ភេទស្រី អាយុ៥២ឆ្នាំ មានទីលំនៅក្នុងភូមិឃុំកើតហេតុខាងលើ ដោយមុនដំបូង គាត់បើកភ្លើងចង្ក្រានហ្គាស ដើម្បីដាំបាយធ្វើ ម្ហូប សម្រាប់ទទួលទានជួបជុំគ្រួសារនាពេលយប់ លុះមិនទាន់ឆ្អិតស្រួលបួលអស់ផង ខណ: ម្ចាស់ ផ្ទះបែរ ខ្លួនពីចង្ក្រានមួយភ្លែត ស្រាប់តែមានចេញផ្កាភ្លើង ដោយសារឆ្លងចរន្តកំប៉ុងហ្គាស ពេលនោះក៏ឆាបឆេះ កាន់តែខ្លាំង មិនអាចអោយម្ចាស់ចូលពន្លត់បាន ក៏ថយចេញក្រៅភ្លាម រួចស្រាប់តែផ្ទុះលាន់ឮសូរយ៉ាងកក្រើក បណ្តាលអោយឆាបឆេះពេញក្នុងផ្ទះបាយ រហូតដល់ម្ចាស់ផ្ទះមិនអាចពន្លត់ខ្លួនឯងកើត ក៏ទូរស័ព្ទហៅរថយន្តពន្លត់អគ្គីភ័យអោយមកជួយអន្តរាគមន៍ភ្លាមៗតែម្តង ។
ប្រភពបន្តទៀតថា៖ ករណីខាងលើ ត្រូវបានកម្លាំងជំនាញការិយាល័យពន្លត់អាគ្គីភ័យនៃស្នងការដ្ឋាននគរបាលខេត្តប៉ៃលិន បានចុះទៅពន្លត់ទាន់ពេលវេលា ដោយគ្មាននរណាម្នាក់ទទួលរងរបួស នោះទេ គ្រាន់តែឆេះអស់ទ្រព្យសម្បត្តិ និងសម្ភារ:ផ្ទះបាយមួយចំនួនប៉ុណ្ណោះ ៕
ដោយៈ ចាន់ ណា អ្នកយកព័ត៌មាន
គេហទំព័រ ប៉ោយប៉ែតប៉ុស្តិ៍
www.poipetpostnews.com