ខេត្តបាត់ដំបង៖ នៅព្រឹកថ្ងៃព្រហស្បតិ៍ ០១រោច ខែបឋមាសាឍ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២៨ ខែមិថុនា ឆ្នាំ២០១៨ ឯកឧត្តម អ៊ុយ រី ប្រធានក្រុមប្រឹក្សាខេត្ត ឯកឧត្តម ងួន រតនៈ អភិបាល នៃគណៈអភិបាលខេត្តបាត់ដំបង បានអញ្ជើញចូលរួមក្នុងពិធី អបអរសាទរ ខួបអនុស្សាវរីយ៍លើកទី៣០ឆ្នាំ ថ្ងៃបង្កើតយោធភូមិភាគទី៥ ក្រោមអធិបតីភាពដ៏ខ្ពង់ខ្ពស់ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ តំណាងដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជណាចក្រកម្ពុជា ស្ថិតនៅក្នុងបរិវេណទីបញ្ជាការដ្ឋានយោធភូមិភាគទី៥ ក្រុងបាត់ដំបង ខេត្តបាត់ដំបង។ ពិធីអបអរសាទររំលឹកខួប៣០ឆ្នាំ ថ្ងៃបង្កើតយោធភូមិភាគទី៥នេះ ក៏មានការអញ្ជើញចូលរួមពី ថ្នាក់ដឹកនាំក្រសួងការពារជាតិ មេបញ្ជាការ បញ្ជាការរង យោធភូមិភាគទី៥ មេបញ្ជាការកងពលអំ តូច ចំណុះឲ្យយោធភូមិភាគ អភិបាលខេត្ត អភិបាលរងខេត្ត ចំនួន៤ ក្នុងភូមិភាគទី៥ មន្ត្រីរាជការ មន្ទីរ អង្គភាព ជុំវិញខេត្ត និងពីសំណាក់នាយទាហាន ពលទាហាន ចំនួន២០៨៨នាក់។ ជាមួយគ្នានេះ ឯកឧត្តម ឧត្តមសេនីយ៍ឯក ប៊ុន សេង ជាមេបញ្ជាការកងយោធភូមិភាគទី៥ បានឱ្យដឹងថា យោធភូមិភាគទី៥ មានចំនួន៤ខេត្តរួមមាន​៖ ខេត្តបាត់ដំបង, ខេត្តប៉ៃលិន​, ខេត្តពោធិ៍សាត់, ខេត្តបន្ទាយមានជ័យ។ ហើយការប្រារព្ធពិធីនេះ រំលឹកខួប៣០ឆ្នាំនេះ មានការចូលរួមពីសំណាក់កងកម្លាំងប្រដាប់អាវុធមកពីបណ្តាលស្ថាប័ន កងឯកភាពចំណុះជាច្រើនរួមមាន៖ កងព្រំដែន, តំបន់ប្រតិបតិ្តការសឹករងខេត្ត និងកងពលតូចទាំង៣, កងនគរបាលជាតិ, កងរាជអាវុធហត្ថ, កងជីវពល , និងប្រជាការពារ ជាដើម ។ ពិធីនេះប្រារព្វស្របពេលដែលប្រទេសកម្ពុជាមានសុខ សន្តិភាព និងការអភិវឌ្ឍលើគ្រប់វិស័យ ស្មើមុខស្មើមាត់លើឆាកអន្តរជាតិ ក្រោមការដឹកនាំ ដ៏ឈ្លាសវៃ របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជណាចក្រកម្ពុជា ៕ យោធភូមិភាគទី៥ ឈរជើងនៅភាគពាយ័ព្យនៃប្រទេសកម្ពុជា ជាអតីតតំបន់សមរភូមិក្តៅ ជាងគេនៅទូទាំងប្រទេស ។ បច្ចុប្បន្នយោធភូមិភាគទី៥ មាន ១ទីបញ្ជាការយោធភូមិភាគ ,៥វេរសេនតូចចំណុះ , ២មន្ទីរពេទ្យ ,១សាលាពលទាហាន , ១តំបន់អភិវឌ្ឍ , ៣កងពលតូច , ៤កងការពារព្រំដែន , និង៤តំបន់ប្រតិបត្តិការសឹករងខេត្ត (បាត់ដំបង ពោធិ៍សាត់ ប៉ៃលិន និងបន្ទាយមានជ័យ ) ឈរជើងលើភូមិសាស្ត្រខេត្តបាត់ដំបង ពោធិ៍សាត់ ប៉ៃលិន បន្ទាយមានជ័យ និងទទួលខុសត្រូវការពារខ្សែបន្ទាត់ព្រំដែនជាមួយប្រទេសថៃ ប្រវែង ៣៦៧គីឡូម៉ែត្រ ។ សូមបញ្ជាក់ថា៖ យោធភូមិភាគទី៥ ត្រូវបានបង្កើតឡើងនៅថ្ងៃទី២៨ ខែមិថុនា ឆ្នាំ១៩៨៨ ដើម្បីបុព្វហេតុការពារមាតុភូមិប្រឆាំង និងការឈ្លានពានពីសំណាក់បរទេស និងទប់ស្កាត់សង្គ្រាមនៅផ្ទៃក្នុងប្រទេស។ ជាមួយគ្នានេះ ក្រោយពីបញ្ចប់កម្មវិធីរួចហើយ កងកម្លាំង និងយោធបរិក្ខារទាំងនោះ នឹងត្រូវដឹកបញ្ជូនត្រលប់មកកាន់ទីបញ្ជារការដ្ឋានអង្គរក្សវិញ ដែលស្ថិតនៅក្រុងតាខ្មៅ ខេត្តកណ្តាល៕