បទឃាតកម្មគិតទុកជាមុន បុរសម្នាក់ បានបើករថយន្តទឹកកក់ បើកដេញបុកជនរងគ្រោះ កំពុងជិះម៉ូតូមានគ្នា ០២នាក់ ស្លាប់ភ្លាមៗ...
ខេត្តប៉ៃលិន៖ ស្រុកសាលាក្រៅៈយោងតាមការទទួលពាក្យបណ្តឹង របស់ការិយាល័យព្រហ្មទណ្ឌកម្រិតធ្ងន់ ពីឈ្មោះ មាស ម៉ូរ៉ា ភេទស្រី អាយុ៥១ឆ្នាំ មុខរបរ កសិករ រស់នៅភូមិអូរអិល ឃុំស្ទឹងកាច់ ស្រុកសាលាក្រៅ ខេត្តប៉ៃលិន។
ត្រូវជាម្ដាយជនរងគ្រោះ ក្នុងករណីគ្រោះថ្នាក់ចរាចរណ៍ កាលពីវេលាម៉ោង ១៥និង១០នាទី ថ្ងៃទី២១ ខែកក្តដា ឆ្នាំ២០១៨ ពីបទឃាតកម្ម គិតទុកជាមុន ទៅលើជនសង្ស័យឈ្មោះ ណាន់ វីន ភេទប្រុស អាយុ១៨ឆ្នាំ មុខរបរកម្មករបើកឡាន អោយរោងចក្រទឹកកក់ (បី.អេស) រស់នៅភូមិអូរតាប្រាង សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន បានបើកឡានទឹកកក់ ដេញបុកជនរងគ្រោះ កំពុងជិះម៉ូតូមានគ្នា០២នាក់ នៅចំណុចផ្លូវលំក្រវ៉ាត់ព្រំដែន (ផ្លូវអូរឈើក្រំ )។
លុះដល់ចំណុចកើតហេតុជនសង្ស័យបានបុកម៉ូតូជនរងគ្រោះ ពីក្រោយ បណ្តាលអោយជនរងគ្រោះទាំង០២នាក់ បានស្លាប់ភ្លាមៗនៅនិងកន្លែងកើតហេតុ រួចជ្រុលទៅបុកផ្ទះ ប្រជា ពលរដ្ឋថែម០១ខ្នងទៀត។ ជនរងគ្រោះទី០១ ឈ្មោះ ជួន ផាន់ណា ភេទប្រុស អាយុ ២៦ឆ្នាំ មុខរបរមន្ត្រីនគរបាលការពារព្រំដែនគោកវរ:សេនាតូចលេខ៨២១ បើកម៉ូតូម៉ាក KTM Duke ពណ៍ស លាយខ្មៅ ពាក់ស្លាកលេខ ភ្នំពេញ 1FK-4199 បានស្លាប់បាត់បង់ជីវិត។ជនរងគ្រោះទី០២ ឈ្មោះ សាន វាសនា ភេទ ស្រី អាយុ១៨ឆ្នាំ រស់នៅភូមិអូររអិល ឃុំស្ទឹងកាច់ ស្រុកសាលាក្រៅ ខេត្តប៉ៃលិន អ្នករួមបានស្លាប់បាត់បង់ជីវិត។
ក្នុងករណីខាងលើនេះ ក្រោយពីសត្ថកិច្ចធ្វើការស្រាវជ្រាវ និងសើបអង្កេតរបស់ការិយាល័យជំនាញព្រហ្មទណ្ឌកម្រិតធ្ងន់ ជនសង្ស័យបានសារភាពថា៖ ពិតជាប៉ុនប៉ងសម្លាប់ជនរងគ្រោះទាំងពីរនាក់ពិតប្រាកមែន គឺដោយសារតែ ការប្រចណ្ឌ។
បច្ចុប្បន្នជនសង្ស័យ ត្រូវបានកសាងសំណុំ រឿងបញ្ជូនទៅតុលាការខេត្ត ដើម្បីចាត់ការទៅតាមនីតិវិធី៕