បង្គោលភ្លើងតូចធំបីបង្គោល នៅផ្សារដំណាក់ ចង្អើរ ដួលបាក់រាបដល់ដី បង្កការភ្ញាក់ផ្អើលដល់អ្នកដំណើរ ខណៈមេឃកំពុងភ្លៀងខ្លាំង
ក្រុងកែប៖ បង្គោលភ្លើងតូចធំ ចំនួនប០៣បង្គោល ស្ថិតនៅខាងលិចផ្សារដំណាក់ចង្អើរ ក្នុងសង្កាត់ព្រៃធំ ក្រុងកែប បានដួលបាក់រាបដល់ដី បង្កភាពភ្ញាក់ផ្អើលដល់អ្នកដំណើរ នៅវេលាម៉ោង១២និង៤៥នាទីថ្ងៃត្រង់ ថ្ងៃទី០៦ ខែកក្កដា ឆ្នាំ២០១៨នេះ ខណៈមានភ្លៀងធ្លាក់ខ្លាំង។
ករណីបណ្តាលឲ្យបាក់បង្គោលភ្លើងខាងលើ បើតាមការអះអាងថា៖ បង្គោលភ្លើងថ្មដ៏រឹងមាំនេះ បានបាក់ខណៈពេលមានរថយន្ត ខ្នាតធំមួយគ្រឿង បើកទៅទាក់ជាមួយនឹងខ្សែចរន្តភ្លើង កាត់ទទឹងផ្លូវស្ថិតខាងកើតផ្សារដំណាក់ ចង្អើរ ប្រមាណ៥០ម៉ែត្រ ទើបបង្គោលទាំងតូច ទាំងធំ នៅអមសងខាងផ្លូវ បាក់បែបនេះ។
ប្រភពដ៏ដែលបានបញ្ជាក់ទៀតថា៖ រថយន្តដែលបានទាក់ខ្សែភ្លើងបណ្តាលឲ្យបាក់បង្គោលតូច ធំអមសងខាងផ្លូវនេះធ្វើដំណើរមកពីលិចទៅកើត លុះមកដល់ចំណុចខាងលើ គាប់ជួនមានភ្លៀង-ខ្យល់ខ្លាំង ហើយខ្សែភ្លើង ដែលកាត់ទទឹងផ្លូវ បានយោល យោកតាមកម្លាំងខ្សល់បក់ផង ក៏បានទៅទាក់ភ្ជាប់ជាមួយទ្រុងរថយន្តខ្នាតធំនោះ រួចក៏ទាញខ្សែភ្លើងជាច្រើនខ្សែ ធ្វើឲ្យបង្គោលភ្លើងធំៗនៅផ្នែកខាងជើងផ្លូវ ពីរបង្គោល និងបង្គោលមានទំហំមធ្យមមួយដើមទៀត នៅផ្នែកម្ខាងទៀត ដួលរាបដល់ដីបង្កការភ័យខ្លាចដល់គេឯងតែម្តង។
លោកវរសេនីយ៍ឯក សូង សិុន អធិការនគរបាលក្រុងកែប បានឲ្យដឹងថា៖ បើទោះជាមានបង្គោលភ្លើងបាក់នៅចំណុចផ្សារដំណាក់ចង្អើរ បង្កការចលាចលយ៉ាងណា ប៉ុន្តែមិនបណ្តាលឲ្យមានបញ្ហាគ្រោះថ្នាក់ដល់អ្នកណាឡើយ ដោយគ្រាន់តែដាច់បណ្តាញអគ្គិសនី នៅក្នុងខេត្តកែបមួយរយៈខ្លីប៉ុណ្ណោះ ហើយខណៈនេះក្រុមហ៊ុនអគ្គិសនីខេត្តកែបបាននិងកំពុងយកសម្ភារៈមកផ្លាស់ប្តូរ ដើម្បីតភ្ជាប់បណ្តាញ អោយអតិថិជនប្រើប្រាស់វិញហើយ៕