មកពីភ្នំពេញ មកជាប់អន្ទាក់សមត្ថកិច្ចនៅកំពត ពីបទចែកចាយគ្រឿងញៀន...
ខេត្តកំពត៖ ជនសង្ស័យប្រុសស្រី ២ នាក់ ដែលសមត្ថកិច្ចខេត្តកំពតស៊ើបអង្កេតស្រាវជ្រវដឹងថាជាមុខសញ្ញា ជួញដូរនិងប្រើប្រាស់ថ្នាំញៀនមកពីភ្នំពេញ បានមកសំងំលាក់ខ្លួនចែកចាយគ្រឿងញៀននៅក្នុងភូមិសាស្រ្តមួយកន្លែងក្នុងស្រុកទឹកឈូ ត្រូវសមត្ថកិច្ចឆ្មក់បង្ក្រាបបាន ដោយដកហូតថ្នាំញៀនចំនួន១០កញ្ចប់តូច។
លោកវរសេនីយទោ លក ញ៉ាវ នាយការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តកំពត បានឲ្យដឹងថា ក្រោយពីក្តាប់មុខសញ្ញាបានលោកក៏ទទួលបញ្ជាពីលោកឧត្តមសេនីយ៍ទោ ស្នងការខេត្តនិងមានការសម្រួលនីតិវិធីពីលោក ជ័យ រិទ្ធី ព្រះរាជអាជ្ញាអមសាលាដំបូងខេត្តកំពតផងនោះ នៅវេលាម៉ោង ២និង០០នាទីរសៀលថ្ងៃទី១១ ខែសីហា ឆ្នាំ២០១៨ បានដឹកនាំកម្លាំងអន្តរាគមន៍ឈុតខ្មៅ ចុះបង្រ្កាបមុខសញ្ញាចែកចាយថ្នាំញៀនមួយកន្លែងនៅភូមិស្នំ ប្រាំពីរ ឃុំម៉ាក់ប្រាង្គ ស្រុកទឹកឈូ ខេត្តកំពត។
លោកបានបន្តទៀតថា ក្នុងករណីចុះបង្រ្កាបខាងលើកម្លាំងសមត្ថកិច្ចយើងឃាត់ខ្លួនបានជនសង្ស័យប្រុស ស្រី ២ នាក់រឹបអូសវត្ថុតាងថ្នាំញៀនចំនួន១០កញ្ចប់តូច និងម៉ូតូ ០១ គ្រឿងម៉ាកSmashvពណ៌ខ្មៅ ពាក់ផ្លាកលេខភ្នំពេញ 1BA-0454និងទូរសព្ទ័ដៃម៉ាកខេមហ្វូន០១គ្រឿង។ លោកបន្តទៀតថា ជនសង្ស័យទាំងពីរនាក់មាន៖ ទី១/- ឈ្មោះ សន រដ្ឋា ភេទប្រុស អាយុ២៥ ឆ្នាំ ស្នាក់នៅផ្ទះលេខ១០១F ផ្លូវលេខ ២៧១ ភូមិ១ សង្កាត់បឹងសាឡាង ខណ្ឌទួលគោក រាជធានីភ្នំពេញ។ ទី២ /-ឈ្មោះ ស៊ាន លីនដា ភេទស្រី អាយុ២៥ ឆ្នាំ រស់នៅភូមិព្រៃស្បាត ឃុំត្រពាំងធំខាងជើង ស្រុកត្រាំកក់ ខេត្តតាកែវ។បច្ចុប្បន្នជនសង្ស័យទាំងពីរនាក់ រួមនិងវត្ថុតាង ត្រូវបានសមត្ថកិច្ចកសាងសំណុំរឿងបញ្ជូនទៅតុលាការចាត់ការតាមនីតិវិធីច្បាប់៕