ខេត្តកែប៖ បុរសម្នាក់ត្រូវបានគេប្រទះឃើញដេកស្លាប់នៅលើផ្លូវលេខ33A ចំណុចផ្លូវចូលសាលាក្រុងកែប ស្ថិតក្នុងភូមិកំពង់ត្រឡាច សង្កាត់ព្រៃធំ ក្រុង-ខេត្តកែប កាលពីវេលាម៉ោង​ ១១និង៣០នាទី ពាក់កណ្តាលអាធ្រាត យប់ថ្ងៃទី១១ខែសីហា ឆ្នាំ២០១៨។ចំពោះការប្រទះឃើញសពខាងលើ ត្រូវបានមជ្ឈដ្ឋានមួយចំនួនសង្ស័យថា គឺជាករណីឃាតកម្មកាប់ឬវាយសម្លាប់គ្នា ប៉ុន្តែសមត្ថកិច្ចបានសន្និដ្ឋានជាបឋមថា កើតឡើងផ្តើមដោយសារគ្រោះថ្នាក់ចរាចរណ៍។ ទាក់ទិននឹងករណីប្រទះសពដេកស្លាប់នៅពាក់កណ្តលយប់ខាងលើ ត្រូវបានលោកវរសេនីយ៍ឯក សូង សិុន អធិការនគរបាលក្រុងកែប បញ្ជាក់ប្រាប់កម្ពុជាថ្មី នៅព្រឹកថ្ងៃទី១២ខែសីហា ឆ្នាំ២០១៨នេះថា ក្រោយពីមានសេចក្តីរាយការណ៍ពីករណីប្រទះឃើញសព សមត្ថកិច្ចក៏បានចុះទៅពិនិត្យនៅកន្លែងកើតហេតុ ដើម្បីស្រាវជ្រាវតាមជំនាញ។លោកអធិការបានបញ្ជាក់ទៀតថា បន្ទាប់ពីពិនិត្យឃើញនៅកន្លែងកើតហេតុមានកម្ទេចកម្ទីនិងបំណែកម៉ូតូនៅទីនោះ ទើបសមត្ថកិច្ចបានសន្និដ្ឋានជាបឋមថា ជាករណីគ្រោះថ្នាក់ចរាចរណ៍ផ្តើមដោយសារម៉ូតូបុកអ្នកថ្មើជើងនៅពេលយប់ ហើយអ្នកបង្កជិះម៉ូតូគេចខ្លួនបាត់។ លោកបានរៀបរាប់ទៀតថា ជនរងគ្រោះដែលស្លាប់មានឈ្មោះ ញឹម អើុង ភេទប្រុស អាយុ៣០ឆ្នាំ មុខរបរអ្នកនេសាទសមុទ្រ រស់នៅភូមិអំពេង ឃុំអង្កោល ស្រុកដំណាក់ចង្អើរ ខេត្តកែប ដោយខណៈនេះសាកសពត្រូវបានរថយន្តសាមុយរបស់មន្ទីរពេទ្យបង្អែកខេត្តកែប ដឹកបញ្ជូនទៅប្រគល់ឲ្យក្រុមគ្រួសារនៅឯលំនៅដ្ឋាននៅភូមិអំពេង ឃុំអង្កោល ដើម្បីរៀបចំចាត់ចែងធ្វើបុណ្យតាមប្រពៃណី។ ជាមួយនេះដែរ បើតាមការលើកឡើងពីសំណាក់មហាជនជាច្រើនបានអះអាងថា បុរសរងគ្រោះអាចមានទំនាស់ជាមួយអ្នកណាម្នាក់ ហើយត្រូវបានក្រុមដៃដល់ដេញវាយប្រហារ និងមានការប្រទង់ប្រទែងគ្នា ដោយភាគីម្ខាងមានប្រើកាំបិតឬពូថៅកាប់ទៅលើជនរងគ្រោះបណ្តាលឲ្យដេកដួលស្លាប់នៅកន្លែងកើតហេតុតែម្តង ព្រោះនៅលើសាកសពមានស្នាមគួរឲ្យសង្ស័យជាច្រើនកន្លែង ដូចជា ក និង ក្បាលជនរងគ្រោះមានស្លាកស្នាមវាយប្រហារដោយវត្ថុរឹងអាចថាជាស្នាមដាវឬកាំបិតជាដើម។ ទោះជាយ៉ាងណា សមត្ថកិច្ចខេត្តកែប បាននិងកំពុងដុតដៃដុតជើងបន្តស្រាវជ្រាវយ៉ាងហ្មត់ចត់ ដើម្បីកំណត់ហេតុការណ៍នេះឲ្យបានច្បាស់លាស់ សម្រាប់ដោះស្រាយចម្ងល់ជូនមហាជននៅពេលក្រោយ៕