ចរន្តភ្លើងបានឆក់យកជីវិតក្មេងស្រីម្នាក់ បណ្តាលឲ្យស្លាប់ គួរឲ្យសោកស្តាយ ខណៈអាណាព្យាបាលមានការធ្វេសប្រហែស...!!!
ខេត្តកែប៖ ក្មេងស្រីដែលគួរឲ្យស្រលាញ់ម្នាក់ត្រូវចរន្តភ្លើងឆក់យកជីវិត បណ្តាលឲ្យស្លាប់គួរឲ្យសោកស្តាយបំផុត ខណៈក្មេងរងគ្រោះទៅកាន់ខ្សែភ្លើងដែលដាច់ធ្លាក់នៅក្រោមផ្ទះរបស់ខ្លួន។ ករណីគួរឲ្យសង្វេគនេះបានកើតឡើងកាលពីវេលាម៉ោង ៥និង៣០នាទីល្ងាច ថ្ងៃទី១១ ខែសីហា ឆ្នាំ២០១៨ ត្រង់ចំណុចភូមិកំពង់ត្រឡាច សង្កាត់ព្រៃធំ ក្រុងកែប ខេត្តកែប។
យោងតាមប្រភពពីសមត្ថកិច្ចមូលដ្ឋានបានឲ្យដឹងថា ក្មេងស្រីរងគ្រោះមានឈ្មោះ សី ក្តី ភេទស្រី អាយុ១០ឆ្នាំ រស់នៅជាមួយឪពុក ម្តាយ ស្ថិតក្នុងភូមិកំពង់ត្រឡាច សង្កាត់ព្រៃធំ ក្រុងកែប ដោយមុនពេលកើតហេតុ មានភ្លៀងខ្យល់យ៉ាងខ្លាំង បណ្តាលឲ្យខ្សែភ្លើងដែលតខ្វាត់ខ្វែងនៅផ្ទះនេះ ដាច់ធ្លាក់ដល់ដី ហើយក្មេងស្រីរងគ្រោះ ប្រហែលមិនដឹងថាខ្សែភ្លើងនោះមានផ្ទុកចរន្តភ្លើងបែបនេះ ទើបយកដៃទៅកាន់ បណ្តាលឲ្យឆក់ស្លាប់ភ្លាមៗមួយរំពេចតែម្តង។
បច្ចុប្បន្នសពក្មេងស្រីរងគ្រោះត្រូវបានអាណាព្យាបាលកំពុងរៀបចំធ្វើបុណ្យតាមប្រពៃណីនៅឯលំនៅដ្ឋាន ក្រោមសម្រែកទួញសោកពីសំណាក់ឪពុក ម្តាយ។
សូមជម្រាបថា ករណីមនុស្សស្លាប់ដោយសារចរន្តភ្លើងដូបខាងលើ ពិតជាបានកើតឡើងជាញឹកញាប់នៅគ្រប់ទិសទីមិនថាទីប្រជុំជនឬទីជនបទឡើយ ហើយតែងតែបង្កគ្រោះថ្នាក់ដល់ជីវិតមនុស្សគ្រប់វ័យផងដែរ។ដូច្នេះ អាជ្ញាធរ ក៏ដូចជាសមត្ថកិច្ចគ្រប់តំបន់ សំណូមពរដល់បងប្អូនប្រជាពលរដ្ឋ ពិសេសអាណាព្យាបាលទាំងអស់ សូមមានការប្រុងប្រយ័ត្នឲ្យបានខ្ពស់ ពោលគឺត្រូវតខ្សែចរន្តភ្លើងទៅតាមបច្ចេកទេស តាមការបង្ហាញរបស់ជំនាញអគ្គិសនី និងត្រូវពិនិត្យមើលខ្សែបណ្តាញភ្លើងនៅក្នុងលំនៅឋានឲ្យបានគ្រប់ជ្រុងជ្រោយ កុំប្រើខ្សែចរន្តមានមុខតំណរឬខ្សែភ្លើងចាស់ៗ។ធ្វើបែបនេះដើម្បីការពារសុវត្ថិភាពក្នុងផ្ទះសំបែង ព្រមទាំងហានិភ័យផ្សេងៗដែលកើតឡើង ជាយថាហេតុ៕