បឹងឈូក ចំណុចភូមិបឹងធំខាងលិច ឃុំអង្គសុរភី ស្រុកកំពង់ត្រាច ត្រូវគេរំលោភយកទៀតហើយ...!!!
ខេត្តកំពត៖ ក្រោយពីលួចបោះបង្គោលបានសម្រេច បឹងឈូកដែលស្ថិតក្នុងភូមិបឹងធំខាងលិច ឃុំអង្គសុរភី ស្រុកកំពង់ត្រាច ខេត្តកំពត ត្រូវជនខិលខូចចាប់ផ្តើមធ្វើព្រំកំណត់ទីតាំងដើម្បីរំលោភយកហើយ ឯខាងអាជ្ញាធរបែរជាធ្វើមិនដឹងមិនឮ ថែមទាំងបណ្តែតបណ្តោយឲ្យបុគ្គលខិលខូចរំលោភយកតាមតែអំពើចិត្ត។
ដោយឡែកប្រជាពលរដ្ឋរាប់រយគ្រួសារ ដែលរស់នៅក្នុងឃុំចំនួនពីរ គឺឃុំបឹងសាលាខាងជើង និងឃុំកំពង់ត្រាចខាងកើត បាននិងកំពុងទន្ទឹងរង់ចាំមើលថា តើលោក អូន ខន អភិបាល នៃគណៈអភិបាលស្រុកកំពង់ត្រាច អាចមានចំណាត់ការទៅលើបុគ្គលខិលខូច ដែលថ្លើមធំហ៊ានទន្ទ្រានយកដីបឹងនេះដែរឬទេ?
ជាមួយនេះ ប្រជាពលរដ្ឋរាប់រយគ្រូសារនៃភូមិសាស្ត្រខាងលើ ពិតជាមានការខកចិត្តចំពោះអាជ្ញាធរក្នុងតំបន់ ព្រោះគាត់បាននាំគ្នាបោះឆ្នោតជូនគណបក្សប្រជាជនគ្រប់ៗគ្នា ដោយនឹកស្មានថានឹងបានទទួលយុត្តិធម៌មកវិញភ្លាមៗ គឺការដកដីបឹងទុកជាសម្បតិ្តសាធារណៈ។ផ្ទុយទៅវិញអាជ្ញាធរបែរជាពុំមានវិធានការច្បាស់លាស់ ដើម្បីទប់ទល់ជាមួយនឹងជនខិលខូចនៅឡើយទេ មើលទៅហាក់ដូចជាត្រូវថ្នាំសណ្តំអ្វីម្យ៉ាងទៅហើយ។
ប្រជាពលរដ្ឋជាង២០០គ្រួសារខាងលើ ក៏សំណូមពរដល់ ឯកឧត្តម ជាវ តាយ អភិបាលនៃគណៈ អភិបាលខេត្តកំពត មេត្តាចាត់ក្រុមការងារចុះមកពិនិត្យមើលការរំលោភផ្ទៃបឹងឈូក ស្ថិតក្នុងភូមិបឹងធំខាងលិច ឃុំអង្គសុរភី ស្រុកកំពង់ត្រាចនេះផង ព្រោះខណៈនេះបឹងឈូកទាំងមូលត្រូវគេកាយប្រឡង់កំណត់ព្រំរំលោភយកយ៉ាងច្បាស់ក្រលែតហើយ៕