ខេត្តបាត់ដំបង៖ ជនសង្ស័យ២នាក់ត្រូវបានកម្លាំងនៃអធិការដ្ឋាននគរបាលស្រុកស្វាយលើបង្ក្រាបឃាត់ខ្លួនប្រគល់អោយកម្លាំងអន្តរាគមន៍បង្ការបង្ក្រាប នៃស្នងការដ្ឋាននគរបាលខេត្តបាត់ដំបង ក្រោយពីពួកគេធ្វើសកម្មភាពលួចកាច់សោម៉ូតូ ពីបាត់ដំបងមកសម្ងំលាក់ខ្លួននៅខេត្តសៀមរាប ។ លោកឧត្តមសេនីយ៍ត្រី ជេត វណ្ណនី ស្នងការរងទទួលផែនព្រហ្មទណ្ឌ បានអោយដឹងថា៖ ជនសង្ស័យជាប់ពាក់ព័ន្ធករណីអំពើលួច(កាច់សោរម៉ូតូ) ខាងលើនេះ ត្រូវបានកម្លាំងនៃអធិការដ្ឋាននគរបាលស្រុកស្វាយលើ ចុះប្រតិបត្តិការ និងបានឃាត់ខ្លួនកាលពីថ្ងៃទី១២ ខែសីហា ឆ្នាំ២០១៨ នៅចំណុចភូមិសាស្ត្រ ឃុំស្វាយលើ ស្រុកស្វាយលើ ខេត្តសៀមរាប និងបានប្រគល់បន្ត មកអោយកម្លាំងផ្នែកអន្តរាគមន៍ បង្ការបង្ក្រាប ដែលដឹកនាំចុះអនុវត្តន៍ដោយលោកផ្ទាល់ បានបញ្ជូនមកកាន់ស្នងការដ្ឋាននគរបាលខេត្តបាត់ដំបង ដើម្បីកសាងសំណុំរឿងចាត់ការទៅតាមនីតិវិធី។ ជនសង្ស័យត្រូវបាននាំខ្លួនៈទី១-ឈ្មោះ ឆាយ រាជ ភេទប្រុស អាយុ ២៤ឆ្នាំ មានទីលំនៅភូមិអូរគ្រួស ឃុំសេរីមានជ័យ ស្រុកសំពៅលូន ខេត្តបាត់ដំបង ។ ទី២-ឈ្មោះ ចិន វ៉ាត ភេទប្រុស អាយុ ៤១ឆ្នាំ មានទីលំនៅភូមិឹចម្រេះ ឃុំស្វាយលើ ស្រុកស្វាយលើ ខេត្តសៀមរាប។ លោកឧត្តមសេនីយ៍ត្រី ជេត វណ្ណនី បានបន្តថា ក្រោយពីឃាត់ខ្លួននៅចំពោះមុខសមត្ថកិច្ចជនសង្ស័យបានឆ្លើយសារភាពថា កាលពីអំឡុងខែមិថុនា ឆ្នាំ២០១៨ វេលាម៉ោងប្រហែល១២និង០០នាទី រំលងអាធ្រាតកន្លងទៅនេះ ពួកគេបានធ្វើសកម្មភាពដោយដាក់ថ្នាំបំពុលលាយជាមួយសាច់គោ អោយឆ្កែស៊ី ខណៈដែលម្ចាស់ផ្ទះកំពុងដេកលក់ និងបានចូលទៅកាច់សោរម៉ូតូ ដែលម្ចាស់ទុកនៅសំយាបផ្ទះខាងមុខ ហើយក៏បានជិះគេចមកសម្ងំលាក់ខ្លួននៅក្នុងទឹកដីនៃខេត្តសៀមរាបតែម្តង។ ក្នុងការឃាត់ខ្លួនជនសង្ស័យខាងលើនេះដែរសមត្ថកិច្ចបានដកហូតវត្ថុតាងមួយចំនួនរួមមាន៖ - ដែកច្នៃសម្រាប់កាច់សោរម៉ូតូចំនួន ១ - ទួណឺវីសចំនួន ៣ - ដង្កាប់ចំនួន ១ - សោរសម្រាប់ដោះចំនួន ៥ - ទូរស័ព្ទដៃចំនួន ១គ្រឿង -និងម៉ូតូ១គ្រឿងម៉ាកហុងដាឌ្រីម C125 ពណ៌ខ្មៅ ស៊េរីឆ្នាំ២០១៨ ពាក់ស្លាកលេខ បាត់ដំបង 1AD1372 ។ បច្ចុប្បន្នជនសង្ស័យរួមទាំងវត្ថុតាងខាងលើត្រូវបានក្រុមអន្តរាគមន៍ បង្ការបង្ក្រាប ប្រគល់អោយទៅការិយាល័យជំនាញដើម្បីរៀបចំជំនាញដើម្បីរៀបចំឯកសារចាត់ការតាមនីតិវិធី៕