ខេតកំពត៖ គ្រប់កន្លែងដែលមានការចាក់ដីល់បលូ ប្រឡាយ ឬ ផ្លូវរំដោះទឹកចេញពីស្រែ ឬ ដំណាំរបស់ប្រជាពលរដ្ឋ អាជ្ញាធរត្រូវតែចាត់វិធានការអោយបានតឹងរ៉ឹងបំផុត ដោយតម្រូវអោយម្ចាស់កាយចេញរួច កែតម្រូវឡើងវិញជាបន្ទាន់ នេះជាការលើកឡើងរបស់ លោក ជាវ តាយ អភិបាលនៃគណៈអភិបាល ខេត្តកំពត ក្នុងដំណើរចុះពិនិត្យមើលស្ថាន ភាពជំនន់ទឹកភ្លៀង នៅភូមិសាស្ត្រមួយចំនួននៃស្រុកទឹកឈូ កាលពីរសៀលថ្ងៃទី១៩ ខែសីហា ឆ្នាំ២០១៨ ។ លោក ជាវ តាយ អភិបាលខេត្តកំពត ក៏បានមានប្រសាសន៍បន្តទៀតថា តាមការកត់ សម្គាល់ជាក់ស្តែង តំបន់ដែលលិចលង់ក្រោយមានភ្លៀងធ្លាក់នោះ ភាគច្រើនបណ្តាលមកពីសកម្មភាពចាក់ដីបំបិទផ្លូវទឹក ការចាក់លប់លូទឹកដែលធ្លាប់មានពីមុន ឬក៏ការដាក់ប្រព័ន្ធលូមិនត្រឹមត្រូវ ខុសទម្រង់បច្ចេកទេសជាដើម។ ដូច្នេះ អាជ្ញាធរត្រូវចាត់វិធានការអោយបានតឹង រ៉ឹងដោយតម្រូវដល់ម្ចាស់ដែលចាក់លប់លូ ឬប្រឡាយ ត្រូវកាយចេញ រួចកែតម្រូវឡើង វិញ។ ទាក់ទិននឹងវិធានការបង្ការក្តៅទប់ស្កាត់ការជន់លិចនាពេលក្រោយៗទៀតនោះ លោកអភិ បាលខេត្ត បានមានប្រសាសន៍ថា៖ គ្រប់មន្ទីរ អង្គភាព ជំនាញពាក់ព័ន្ធត្រូវសហការគ្នាចុះសិក្សាដើម្បីឈានទៅជួសជុល ពង្រីកគ្រប់ប្រឡាយ ផ្លូវទឹកដែលធ្លាប់មាន ឬស្ថាបនាបន្ថែមដើម្បីបញ្ចៀសនូវការលិចលង់ ព្រោះតែភ្លៀងធ្លាក់មួយមេពីរមកបែរជា ជួបបញ្ហាប្រឈម ធ្វើអោយរងផលប៉ះពាល់ដល់លំនៅ ឋាន និង ដំណាំរបស់ប្រជាពលរដ្ឋនោះ។ ទោះក្នុងលក្ខខណ្ឌណាក៏ដោយ ក្នុងករណីដែលអាចធ្វើបាន ត្រូវបញ្ចេញអោយអស់ពីលទ្ធភាព និង សមត្ថភាព ពោលគឺមិនអាចបណ្តែត បណ្តោយអោយភោគផលប្រជាពលរដ្ឋខូចខាតតាមរយៈភាពព្រងើយកន្តើយពីមន្ត្រីពាក់ព័ន្ធនោះទេ។ សូមបញ្ជាក់ថា៖ ភូមិសាស្ត្រដែលកំពុងរងនឹងជំនន់ភ្លៀង ក្នុងស្រុកទឹកឈូ ខេត្តកំពត នោះ មានដូចជាឃុំព្រៃឃ្មុំ ឃុំថ្មី ឃុំព្រៃថ្នង និងឃុំកណ្តោល។ ជាមួយគ្នានេះដោយស្ថានភាពភ្លៀងនៅតែបន្តធ្លាក់ជាប់ៗគ្នា ក្នុងរយៈពេលប៉ុន្មានថ្ងៃនេះ ភូមិសាស្ត្ររបស់ក្រុងកំពត ក៏ត្រូវប្រឈម នឹង ការលិចលង់ដោយសារជំនន់ទឹកភ្លៀងផងដែរនោះ៕