គ្រោះថ្នាក់ចរាចរណ៍មួយ រវាងម៉ូតូ និង ម៉ូតូបណ្តាលអោយ រងរបួសធ្ងន់ស្រាល០៣នាក់ លើផ្លូវជាតិ33A...
ខេត្តកែប៖ មនុស្សបីនាក់(ក្នុងចំណោមនោះមានក្មេងម្នាក់) បានរងរបួសធ្ងន់ស្រាលក្នុងករណីគ្រោះថ្នាក់ចរាចរណ៍ រវាងម៉ូតូនិងម៉ូតូ ដោយគ្រោះថ្នាក់នេះផ្តើមឡើងដោយភាគីម្ខាងស្រវឹងជិះម៉ូតូមិនគោរពផ្លូវអទិភាពទើបបង្កជាគ្រោះថ្នាកបែបនេះ។ ហេតុការណ៍ខាងលើ បានកើតឡើងកាលពីវេលាម៉ោង៦និង៥៥នាទីព្រលប់ ថ្ងៃទី២៥ ខែសីហា ឆ្នាំ២០១៨ ត្រង់ចំណុចខាងជើងវត្តកែវក្រសាំង ស្ថិតក្នុងភូមិកែវក្រសាំង សង្កាត់កែប ខេត្តកែប លើកំណាត់ផ្លូវលេខ33A។
តាមប្រភពព័ត៌មានពីមន្ត្រីនគរបាលមូលដ្ឋានបានឲ្យដឹងថា មុនពេលកើតហេតុគេឃើញម៉ូតូទាំងពីរគ្រឿងជិះស្របគ្នាមកពីជើងទៅត្បូងក្នុងល្បឿនមធ្យម លុះមកដល់កន្លែងគ្រោះថ្នាក់ស្រាប់តែម៉ូតូទាំងពីរខាងលើប៉ះទង្គិចគ្នាប្រាវ បណ្តាលឲ្យរងរបួសធ្ងន់ ស្រាលទាំងអស់គ្នាតែម្តង។នគរបាលបានបញ្ជាក់ទៀតថា ភាគីរងរបួសស្រាលជិះម៉ូតូC125 ពណ៌ខ្មៅ សេរីឆ្នាំ២០០៩ ពាក់ស្លាកលេខ កែប1A-1890 បើកបរដោយឈ្មោះ ប៉ាល់ ពាន អាយុ៦៨ឆ្នាំ មុខរបរកសិករ រស់នៅភូមិកែវក្រសាំង សង្កាត់កែប ក្រុងកែប របួសស្រាល។ចំណែកអ្នករួមដំណើរ ឈ្មោះពេញ ចាន់ដារ៉ា ភេទប្រុស អាយុ៦ឆ្នាំ ត្រូវជាចៅ រស់នៅជាមួយគ្នា។ដោយឡែក ម៉ូតូភាគីម្ខាងទៀតម៉ាកវេវ ពណ៌ខ្មៅ ពាក់ស្លាកលេខ ភ្នំពេញ 1BC-5338 បើកបរឈ្មោះ ឈួន សុវី ភេទប្រុស អាយុ១៦ឆ្នាំ មុខរបរជាសិស្ស រស់នៅភូមិកែប សង្កាត់កែប ក្រុង-ខេត្តកែប។ប៉ូលិសបានបង្ហើបថា គ្រោះថ្នាក់នេះកើតឡើងដោយសារភាគីម្ខាងស្រវឹងស្រាហើយបើកបរមិនគោរពច្បាប់។
ក្រោយពេលកើតហេតុ អ្នករងរបួសដោយសារគ្រោះថ្នាក់ចរាចរណ៍ ត្រូវបានរថយន្តរបស់មន្ទីរពេទ្យបង្អែកខេត្តកែបដឹកទៅសង្គ្រោះបន្តនៅមន្ទីរពេទ្យខេត្តកំពត។ចំណែកមធ្យោបាយពាក់ព័ន្ធ សមត្ថកិច្ចបាននាំយកទៅរក្សាទុកនៅអធិការដ្ឋាននគរបាលក្រុងកែប សម្រាប់ដោះស្រាយនៅពេលក្រោយ៕