មហាជនក្នុងខេត្តកំពត រិះគន់ថា៖ ស.ជ.ណ របស់រដ្ឋបាលស្រុកកំពង់ត្រាច គ្មានប្រសិទ្ធភាពអី្វបន្តិចឡើយ.!!!
ខេត្តកំពត៖ ប្រជាពលរដ្ឋក្នុងស្រុកកំពង់ត្រាចកំពុងឆ្ងល់ថា៖ ហេតុអី្វបានជារដ្ឋបាលស្រុកមិនទាន់ហ៊ានចាត់ការបុគ្គលរំលោភដីរដ្ឋ ព្រោះខណៈនេះ សេចក្តីជូនដំណឹង បានហួសសុពលភាព ជិតមួយសប្តាហ៍ទៅហើយនោះ។
បើតាមប្រភពខ្សឹបខ្សៀវបានលួចទម្លាយថា៖ ក្រោយពីអភិបាលស្រុកធ្វើសេចក្តីជូនដំណឹងអោយអ្នកបោះបង្គោល ត្រូវតែដកចេញពីបឹងឈូករបស់រដ្ឋ នៅថ្ងៃទី១៦ ខែសីហា ឆ្នាំ២០១៨ នោះមក បុគ្គលខិលខូចបានសុំអន្តរាគមន៍ពីថ្នាក់លើ ដើម្បីរកជំនួយ ហើយលោកពូ សំ អេន ដែលអ្នកបោះបង្គោលរំលោភបឹងឈូក បានប្រាប់អ្នកស្រុកថា៖ ត្រឹម ស.ជ.ណ របស់រដ្ឋបាលស្រុកគឺគាត់មិនញញើតនោះទេ.! តែបើចង់អោយគាត់ដកបង្គោលចេញពីបឹងឈូកនោះ ដរាបណាមានលិខិតបញ្ជារបស់រដ្ឋបាលខេត្តកំពត ទើបអាចទៅរួច។
គេឆ្ងល់ទៀតថា៖ តើលោកធំណាទៅហ៊ានកាង និងរុញច្រានអោយបុគ្គលនេះ រំលោភយកដីបឹងឈូករបស់រដ្ឋ ដោយគ្មានខ្លាចញញើតនឹងច្បាប់បែបនេះ។ ប្រភពបានលួចបង្ហើបទៀតថា៖ តាមពិតទៅការបោះបង្គោលរំលោភយកដីបឹងឈូករាប់ហិកតា ស្ថិតក្នុងភូមិបឹងធំខាងលិច ឃុំអង្គសុរភី ស្រុកកំពង់ត្រាច ខេត្តកំពត ដូចខាងលើនេះ បានកើតឡើងតាំងពីជំនាន់អភិបាលខេត្តកំពតមុន និងអភិបាលស្រុកចាស់ ដោយមិនពាក់ព័ន្ធជាមួយអភិបាលស្រុក និង អភិបាលខេត្តបច្ចុប្បន្ននោះឡើយ។ គេបានបន្ថែមថា៖ ដីបឹងដែលគេចង់ក្រសោបនេះ ជាជ្រលងបណ្តោះទឹកជំនន់ ប៉ុន្តែត្រូវបានគេឃុបឃិតជាលក្ខណៈប្រព័ន្ធ ប៉ុនប៉ងរំលោភយក ហើយថែមទាំងលេចឮថា៖ មានគេបោះទុនជា ថវិកា រាប់មឺុនដុល្លារ ដើម្បីអោយ គេរត់ការចាក់ដីលុបបឹងឈូក និងរត់ការធ្វើប្លង់កម្មសិទ្ធិទៀតផង ប៉ុន្តែត្រូវបរាជ័យ ខណៈពលរដ្ឋរាប់រយគ្រួសារមានប្រតិកម្ម។
ជុំវិញករណីមិនទាន់បានដកបង្គោលដូចខាងលើ លោក អូន ខន អភិបាល នៃគណៈអភិបាលស្រុកកំពង់ត្រាច បានបញ្ជាក់ប្រាប់អ្នកយកសារព័ត៌មាន នៅព្រឹកថ្ងៃទី២៩ ខែសីហា ឆ្នាំ២០១៨ នេះថា៖ ក្រោយពីរដ្ឋបាលស្រុកចេញសេចក្តីជូនដំណឹងអោយឈ្មោះ សំ អេន ដកបង្គោលចេញពីបឹងឈូករបស់រដ្ឋ ស្រាប់តែមានអ្នកធំសុំអន្តរាគមន៍ ប៉ុន្តែទោះជា យ៉ាងណា ក៏លោកមិនព្រមអោយអ្នកណាម្នាក់រំលោភយកបឹងឈូក របស់រដ្ឋ ធ្វើជាកម្មសិទ្ធិបានជាដាច់ខាត ហើយលោកនឹងរិះរកវិធីដើម្បីដកបង្គោលក្នុងបឹងឈូករបស់រដ្ឋអោយទាល់ តែបាន។
ទោះជាបែបនេះក្តី គេបានរិះគន់ថា៖ សេចក្តីជូនដំណឹង របស់រដ្ឋបាលស្រុកកំពង់ត្រាច ដែលជម្រាបទៅអោយ ឈ្មោះ សំ អេន អោយដកបង្គោលចេញពីផ្ទៃបឹងឈូក ស្ថិតក្នុងភូមិបឹងធំខាងលិច ឃុំអង្គសុរភី ស្រុកកំពង់ត្រាចចាប់ពីថ្ងៃទី១៦ និង ផុតកំណត់នៅថ្ងៃទី២៣ ខែសីហា ឆ្នាំ២០១៨។ ប្រហែលជាគ្មានប្រសិទ្ធភាពនោះទេ.! ដោយសារការជូន ដំណឹង វាបានហួសកាលកំណត់រយៈពេល ៦ថ្ងៃ មកហើយ។ ដូច្នេះ ប្រជាពលរដ្ឋសំណូមពរដល់ លោក ជាវ តាយ អភិបាល នៃគណៈអភិបាលខេត្តកំពត សូមមេត្តាជួយចាត់ការ ករណី ដូចខាងលើ ដោយក្តីអនុគ្រោះផង ព្រោះបញ្ហាដីបឹងឈូកនេះ បានក្លាយជាជំងឺរាំុរ៉ៃ ជាយូរយាណាស់មកហើយ៕
