ខេត្តកំពត៖ កម្លាំងសមត្ថកិច្ចនគរបាលការិយាល័យប្រឆាំងបទល្មើសគ្រឿងញៀននៃស្នងការដ្ឋាននគបាលខេត្តកំពត ជំហ៊ានដំបូងដឹកនាំបង្រ្កាបដោយលោកវរសេនីយ៍ត្រីស្វាយ ប្រុស អធិការនគរបាលស្រុកដងទង់ បានដឹកនាំកម្លាំងចុះបង្រ្កាបមុខសញ្ញាចែកចាយគ្រឿងញៀនមួយកន្លែងក្នុងស្រុកដងទង់ កាលពីវេលាម៉ោង១១និង១០នាទីព្រឹកថ្ងៃទី ០៤ ខែសីហា ឆ្នាំ២០១៨ នៅចំណុចឡ១០ ស្ថិតក្នុងភូមិដំណាក់ត្រយឹង ឃុំខ្ជាយខាងត្បូង ស្រុកដងទង់ ខេត្តកំពត។ ឃាត់ខ្លួនជនសង្ស័យបានម្នាក់ ឈ្មោះ នៅ វុទ្ធី ភេទប្រុស អាយុ ២៥ ឆ្នាំ រស់នៅភូមិត្រពាំង ព្រីង ឃុំទូកមាសខាងកើត ស្រុកបន្ទាយមាស ខេត្តកំពត រឹបអូសវត្ថុតាងបានម្សៅក្រាមពណ៌សថ្លាចំនួន៦ធំ និង ៧កញ្ចប់តូច ដែលមានទម្ងន់ ១៥,១០ ក្រាម និងជញ្ជីងថ្លឹងថ្នាំញៀន១ គ្រឿង កូនថង់សំរាប់ច្រកថ្នាំមួយចំនួនធំ លុយខ្មែរចំនួន១៧.៣០០រៀល ។ ជំហ៊ានបន្ទាប់ ៖ ក្រោយពីឃាត់ខ្លួនជនសង្ស័យជាមុខសញ្ញាខាងលើ បានហើយ កម្លាំងសមត្ថកិច្ចបានធ្វើការសាកសួរ រួចនៅវេលាម៉ោង១២និង៤០នាទីថ្ងៃត្រង់ថ្ងៃដដែលបានបន្តចុះទៅបង្រ្កាបមុខសញ្ញានៅស្រុកអង្គរជ័យនិងក្នុងខេត្តតាកែវតាមចម្លើយរបស់ជនសង្ស័យ ដែល ដឹកនាំដោយលោកវរសេនីយ៍ទោ លក ញ៉ាវ នាយការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្ត និងមានការសម្រួលនីតិវិធីដោយ លោក ជ័យ រឹទ្ធី ព្រះរាជអាជ្ញារងអមសាលាដំបូងខេត្តផងដែរ។ការចុះបង្រ្កាបក្នុងជំហ៊ានបន្ទាប់នោះនៅចំណុចភូមិពោធិ៍ ឃុំភ្នំកុង ស្រុកអង្គរជ័យឃាត់ខ្លួនជនសង្ស័យម្នាក់ ឈ្មោះ ទូច ភារិន ភេទប្រុស អាយុ ២២ ឆ្នាំ រស់នៅភូមិស្គរទូង ឃុំភ្នំកុង ស្រុកអង្គរជ័យ ខេត្តកំពត ដកហូតវត្ថុតាងថ្នាំញៀន ២កញ្ចប់តូច។ បន្ទាប់មកនៅវេលាម៉ោង១៤និង៣០ នាទីរសៀលថ្ងៃទី៤ ខែសីហា ឆ្នាំ២០១៨ កម្លាំងសមត្ថកិច្ចបានបន្តសហការជាមួយសមត្ថកិច្ចខេត្តតាកែវ ចុះទៅបង្រ្កាបនៅចំណុចភូមិត្រពាំងត្របែក ឃុំត្រាំកក់ ស្រុកត្រាំកក់ ខេត្តតាកែវ បានឃាត់ខ្លួនជនសង្ស័យជាមុខសញ្ញាជួញដូរនិងប្រើ ប្រាស់ប្រុស ស្រីចំនួន ៥ នាក់ រឹបអូសវត្ថុតាងថ្នាំញៀនចំនួន៥៩កញ្ចប់ក្នុងនោះចំនួន២៤ កញ្ចប់ធំ។ លោកវរសេនីយទោ លក ញ៉ាវ បានឲ្យដឹងថា ជនសង្ស័យទាំង៥ នាក់ដែលឃាត់ខ្លួនបានក្នុងស្រុកត្រាំកក់ ខេត្តតាកែវ មានឈ្មោះដូចខាងក្រោម៖ ១/ ឈ្មោះ ញ៉េប ស្រី ភេទស្រី អាយុ៥៣ ឆ្នាំ រស់នៅភូមិត្រពាំងត្របែក ឃុំត្រាំកក់ ស្រុកត្រាំកក់ ខេត្តតាកែវ ។ ២ / ឈ្មោះ ញ៉េប អៀច ភេទស្រី អាយុ ៥០ឆ្នាំ នៅភូមិត្រពាំងត្របែក ឃ៉ំត្រាំកក់ ស្រុកត្រាំកក់ ខេត្តតាកែវ ។ ៣/ឈ្មោះ ណម វល័ក្ខ ភេទប្រុស អាយុ២២ ឆ្នាំ នៅភូមិតាតៃ ឃ៉ំញ៉ែញ៉ង់ ស្រុកត្រាំកក់ ខេត្តតាកែវ ។ ៤/ឈ្មោះ ណម សារុណ ភេទប្រុស អាយ២២ឆ្នាំ នៅភូមិតាតៃ ឃ៉ំញ៉ែញ៉ង់ ស្រុកត្រាំកក់ ខេត្តតាកែវ។ ៥/ឈ្មោះ ប៉ោះ ពាន ភេទប្រុស អាយ២៩ឆ្នាំ នៅភូមិខ្លោងទ្វារ ឃ៉ំរនាម ស្រុកត្រាំង ខេត្តតាកែវ ។ លោកបានបន្តទៀតថា ជនសង្ស័យដែលសមត្ថកិច្ចឃាត់ខ្លួនទាំង៧នាក់រួមនិងវត្ថុតាងថ្នាំញៀន កំពុងត្រូវបានការិយាល័យប្រឆាំងបទល្មើសគ្រឿងញៀននៃស្នងការដ្ឋាននគរបាលខេត្តកសាងសំណុំរឿងបញ្ជូនទៅតុលាការដើម្បីចាត់ការតាមនីតិវិធីច្បាប់៕