មន្ត្រីយោធាម្នាក់ នៅអង្គភាពវរសេនាតូច លេខ ៣៧២ បានស្លាប់បាត់បង់អាយុជីវិតខណៈកំពុងជិះម៉ូតូ...!!!
ខេត្តព្រះវិហារ៖ មន្ត្រីយោធាម្នាក់បានស្លាប់បាត់បង់ជីវិតភ្លាមៗ បន្ទាប់ពីរថយន្តកូរ៉េមួយតោនកន្លះ ០១ គ្រឿង បើកបរក្នុងល្បឿនលឿន ហើយបានជ្រុលទៅបុកមន្ត្រីយោធា រូបនោះ កាលពីវេលាម៉ោង៩និង២៥នាទី ថ្ងៃទី៦ ខែសីហា ឆ្នាំ២០១៨ នៅតាមបណ្តោយផ្លូវជាតិលេខ៦២ ចន្លោះបង្គោលគីឡូលេខ២០៦-២០៧ ត្រង់ចំណុចផ្លូវកោងទួល៤២ ឋិតក្នុងភូមិត្រពាំងសង្កែលិច ឃុំកន្ទួត ស្រុកជាំក្សាន្ត ខេត្តព្រះវិហារ។
បើយោងតាមប្រភព ពីប្រជាពលរដ្ឋ នៅកន្លែង កើតហេតុ បានអោយដឹងថា៖ នៅមុនពេលកើតហេតុ បានឃើញរថយន្តកូរ៉េមួយតោនកន្លះ ម៉ាកអីុសុយសុយ ពណ៌ស ពាក់ស្លាកលេខ រតនគិរី ៣A ០០៨៦ បើកបរក្នុងល្បឿនលឿន ទិសដៅពីកើតទៅលិច លុះមកដល់ចំណុចកើតហេតុ រថយន្តបានបើកវ៉ាជែងម៉ូតូរជនរងគ្រោះ ហើយក៏ជ្រុលទៅបុកពេញមួយទំហឹង ជាមួយ និង ម៉ូតូ ដែលមន្ត្រីយោធាកំពុងបើកបរ ក្នុងទិសដៅបញ្រ្ចាស់គ្នា បណ្ដាលអោយ យោធាម្នាក់ ស្លាប់ភ្លាមៗ នៅនឹងកន្លែងកើតហេតុ ក្រោយពេលបង្កហេតុរួច ម្ចាស់រថយន្ត ក៏រត់គេចខ្លួន ចូលព្រៃបាត់ ស្រម៉ោលភ្លាមៗនោះ បន្សល់ទុករថយន្តនៅនិងកន្លែងកើតហេតុ។
ក្រោយពេលកើតហេតុ គេក៏ឃើញមាន សមត្ថ កិច្ចនគរបាលចរាចរណ៍ ព្រមជាមួយមេអង្គភាព និងអាជ្ញាធរមូលដ្ឋាន បានមកដល់កន្លែងកើតហេតុ ហើយធ្វើការវាស់វែង រួចយករថយន្ត ដឹកសពជនរងគ្រោះទៅធ្វើបុណ្យតាម ប្រពៃណី។ ចំណែករថយន្តបង្ក និង ម៉ូតូជនរងគ្រោះ ត្រូវបានសមត្ថកិច្ចនគរបាលចរាចរណ៍ នាំយកទៅរក្សាទុក នៅអធិការដ្ឋាននគរបាលស្រុកជាំក្សាន្ត រង់ចាំសមីខ្លួនចូលខ្លួនមកដោះស្រាយ នៅពេលក្រោយ។
សូមបញ្ជាក់ថា៖ ជនរងគ្រោះមានឈ្មោះ ត្រក អឿន ភេទប្រុស អាយុ៥២ឆ្នាំ អត្តលេខ ២២៩.៥៩៨ កងអនុសេនាតូចបញ្ជូនសារ វរសេនាតូចលេខ ៣៧២ ចំណុះកងពលតូចអន្តរាគមន៍លេខ៧ ស្ថិតក្នុងភូមិសែនជ័យ ឃុំស្រអែម ស្រុកជាំក្សាន្ត ខេត្តព្រះវិហារ៕