លោក ជាវ តាយ អភិបាលនៃគណៈអភិបាល ខេត្តកំពត ចុះពិនិត្យការកសាងស្ពានឈើដែលជាអំណោយដ៏ថ្លៃថ្លារបស់សម្តេចអគ្គមហា សេនាបតីតេជោ ហ៊ុន សែន...
ខេត្តកំពត៖ លោក ជាវ តាយ អភិបាលនៃគណៈអភិបាលខេត្ត បានដឹកនាំសហការី ព្រមទាំងអាជ្ញាធរឃុំ ស្រុក និងអង្គភាពជំនាញ ចុះពិនិត្យការកសាងស្ពានឈើឆ្លងកាត់ស្ទឹងកែវ ដែលជាអំណោយដ៏ថ្លៃថ្លារបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ស្ថិតនៅភូមិអន្លង់ម៉ាក់ប្រាង្គ ឃុំស្ទឹងកែវ ស្រុកទឹកឈូ ខេត្តកំពត។ នៅព្រឹកថ្ងៃច័ន្ទ ១កើត ខែភទ្របទ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី១០ ខែកញ្ញា ឆ្នាំ២០១៨ នេះ។
ស្ពានឈើឆ្លងកាត់ស្ទឹងកែវ ត្រូវបានកាត់ផ្តាច់ដោយជំនន់ទឹកភ្លៀង កាលពីអំឡុងខែកក្កដា ឆ្នាំ២០១៨ កន្លងទៅ។ សម្តេចនាយករដ្ឋមន្ត្រី បានផ្តល់ថវិកាចំនួន១៥,០០០ដុល្លារព្រមទាំង បន្ថែមថវិកា ៥លានរៀលបន្ថែមទៀតដើម្បី ពន្លឿនការកសាងស្ពានឈើថ្មី បណ្តោះអាសន្ន ដែលមានបណ្តោយប្រវែង៦៥ម៉ែត្រ ទទឹង៣ម៉ែត្រ ដើម្បីជួយសម្រួលដល់ការធ្វើដំណើររបស់បងប្អូនប្រជាពលរដ្ឋ ជិតឆ្ងាយ ជាពិសេសសិស្សសាលាបានឆ្លងស្ពានទៅសិក្សាទាន់ពេលវេលាផងដែរ ហើយបច្ចុប្បន្នស្ពានឈើនេះ កសាងបានចំនួន៧០ភាគរយហើយ។
លើសពីនេះ លោក ជាវ តាយ អភិបាលខេត្ត ថា៖ នឹងជួសជុលផ្លូវភ្ជាប់ស្ពានស្ទឹងកែវ ដែលមានប្រវែងជាង១០០ម៉ែត្រ ក្នុងពេលឆាប់ៗខាងមុខនេះ ព្រមទាំងមានគម្រោងដាក់ភ្លើងបំភ្លឺផ្លូវ បន្ទាប់ពីការជួសជុលផ្លូវបានរួចរាល់ជាស្ថាពរ៕
