បុរសម្នាក់ពេលស្រវឹងស្រាជិះម៉ូតូឆ្លងផ្លូវមិនប្រយ័ត្នជ្រុលទៅបុករថយន្តបណ្តាលឱ្យរងរបួសធ្ងន់ម្នាក់ឯង...
ខេត្តកែប៖ បុរសម្នាក់ជិះម៉ូតូឆ្លងផ្លូវក្នុងស្ថានភាពស្រវឹង ក៏ជ្រុលទៅបុកចំកង់រថយន្តខ្នាតធំកំពុងបើកបរនៅលើដងផ្លូវ បណ្តាលឱ្យដួលម៉ូតូបោកក្បាលនឹងថ្នល់ជាតិរងរបួសធ្ងន់ ត្រូវបានសមត្ថកិច្ចដឹកទៅសង្គ្រោះភ្លាមៗ។ហេតុការណ៍នេះបានកើតឡើងនៅវេលាម៉ោង ៤និង១៥នាទីរសៀល ថ្ងៃទី១១ ខែកញ្ញា ឆ្នាំ២០១៨ ត្រង់ចំណុចមុខក្លោងទ្វារវត្តភ្នំខ្វាវ ស្ថិតក្នុងភូមិភ្នំលាវ ឃុំពងទឹក ស្រុកដំណាក់ចង្អើរ ខេត្តកែប លើកំណាត់ផ្លូវជាតិលេខ៣៣។
តាមការឱ្យដឹងពីលោកវរសេនីយ៍ឯក តូវ សុវណ្ណ អធិការនគរបាលស្រុកដំណាក់ចង្អើរ បាននិយាយថា គ្រោះថ្នាក់ខាងលើនេះផ្តើមដោយសារអ្នកជិះម៉ូតូស្រវឹងស្រា ដោយខណៈនោះជនរងគ្រោះបានជិះម៉ូតូឆ្លងផ្លូវពីជើងទៅត្បូងបំណងចូលផ្លូវលំ គាប់ជួនមានរថយន្តសណ្តោង កុងធឺន័រ បើកមកពីលិចទៅកើត ទើបអ្នកជិះម៉ូតូវាក់អើក៏បុកចំកង់រថយន្តខ្នាតធំនោះ បណ្តាលឱ្យដួលបោកក្បាលនឹងផ្លូវជាតិរងរបួសធ្ងន់តែម្តង។ភ្លាមៗនោះអ្នកបើកបររថយន្តភ័យពេកក៏ចតរថយន្តចោលនៅកន្លែងកើតហេតុរួចដាក់មេប្រូចបាត់ស្រមោលឈឹង។
លោកអធិការបានបញ្ជាក់ទៀតថា ជនរងគ្រោះម្ចាស់ម៉ូតូ ឈ្មោះជួន មិន ភេទប្រុស អាយុ៥២ឆ្នាំ របួសធ្ងន់ រស់នៅក្នុងភូមិភ្នំលាវ ឃុំពងទឹក ស្រុកដំណាក់ចង្អើរ ជនរងគ្រោះជិះម៉ូតូម្នាក់ឯងម៉ាកសង់កូរ៉េ គ្មានស្លាកលេខ។ដោយឡែករថយន្តកុងធឺន័រពាក់ស្លាកលេខ ភ្នំពេញ 3C-0448 អ្នកបើកបរគេចខ្លួចបាត់។
បច្ចុប្បន្នមធ្យោបាយពាក់ព័ន្ធ ប៉ូលិសបាននាំយកទៅរក្សាទុកនៅអិការដ្ឋាននគរបាលស្រុកដំណាក់ចង្អើរ សម្រាប់ដោះស្រាយគ្នានៅពេលក្រោយ។ចំណែកបុរសរងគ្រោះ ត្រូវបានសាច់ញាតិដឹកទៅសង្គ្រោះនៅឯមន្ទីរពេទ្យ៕