ខេត្តប៉ៃលិន៖ មានសេចក្តីរាយការណ៍ បានអោយដឹងថា៖ សមត្ថកិច្ចអាវុធហត្ថខេត្ត បានសហការជាមួយនឹង ខណ្ឌរដ្ឋបាលព្រៃឈើប៉ៃលិន បានចុះទៅធ្វើការឃាត់គ្រឿងចក្រ និងរថយន្តដែលជីកកកាយដីភ្នំខុសច្បាប់មួយកន្លែង ស្ថិតនៅក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ។ ការចុះបង្ក្រាបនេះ ដកហូតរថយន្តដឹកដីចំនួន០៣គ្រឿង គ្រឿងចក្រជីកកកាយដីចំនួន០២គ្រឿង រថយន្តដឹកគ្រឿងចក្រ០១គ្រឿង និងអ្នកបើក បរចំនួន០៤ នាក់ យកទៅសួរនាំ ។ ហេតុការណ៍ចុះឃាត់ម្ចាស់រថយន្ត និង រថយន្តដឹកដីនេះ បានធ្វើឡើងកាលពីថ្ងៃទី២៩ ខែសីហា ឆ្នាំ២០១៨ ស្ថិតនៅក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ។ ប្រភពព័ត៌មាន មន្រ្តីខណ្ឌរដ្ឋបាលព្រៃឈើប៉ៃលិន បានបង្ហើបឱ្យដឹងថា៖ ម្ចាស់គ្រឿងចក្រ ដែលធ្វើសកម្មភាពជីកកកាយដីភ្នំមានឈ្មោះ លីន ស្នាក់នៅក្នុងភូមិខាងលើ ហើយបានធ្វើសកម្មភាពជីកកកាយដីភ្នំ ដឹកទៅលក់ នៅតាមភូមិជារៀងរាល់ថ្ងៃ បណ្តាលអោយខូចខាតទ្រង់ទ្រាយយ៉ាងដំណំ ។ ប្រភពបន្តទៀតថា៖ បន្ទាប់ពីទទួលបានសេចក្តីរាយ ការណ៍ កម្លាំងប៉េអឹមខេត្ត សហការជាមួយនឹងខាងរដ្ឋបាលព្រៃឈើ ចុះទៅធ្វើការបង្ក្រាបតែម្តង ។ដែកក្រុមឈ្មួញធ្វើការជីកកកាយដីភ្នំដឹកយកទៅលក់នេះ ធ្វើឡើងចំនួន០២កន្លែងក្បែរគ្នា ទី១. ស្ថិតនៅខាងក្រោយអនុវិទ្យាល័យផ្សារព្រំ ភូមិផ្សារព្រំជើង ឃុំស្ទឹងកាច់ និងទី២. ស្ថិតនៅចំណុចដីថ្មី ភូមិផ្សារព្រំ ឃុំស្ទឹងកាច់ ។ ប្រភពដដែកបញ្ចាក់ទៀតថា៖ បន្ទាប់ពីស្ងាត់សកម្មភាពរយ:ពេលប៉ុន្មានសប្តាហ៍កន្លងទៅ ស្រាប់តែក្រោយមក ថ្មីៗនេះ ក្រុមឈ្មួញសម្រុកនាំគ្នាជីកកកាយដីភ្នំ ដឹកដីថ្មភ្នំយកទៅលក់យ៉ាងគគ្រឹកគគ្រេង ដោយគ្មានខ្លាច ញញើត នឹង ច្បាប់អ្វីនោះឡើយ ខណ:ដីស្ទើររាប ក៏ដូចជាដីភ្នំនៅគ្រប់កន្លែងនៅក្នុងភូមិខាងលើ មានការឡើងថ្លៃយ៉ាងគំហុក គួរអោយកត់សម្គាល់ ។ ទោះបីជាយ៉ាងណា ក៏ដោយ ខាងជំនាញខណ្ឌរដ្ឋបាលព្រៃឈើប៉ៃលិន បានឃាត់ខ្លួនអ្នកបើកបររថយន្តចំនួន០៤នាក់ យកទៅការិយាល័យរដ្ឋបាលព្រៃឈើ ដើម្បីសាកសួរ និង រៀបចំសំណុំរឿង បញ្ជូនទៅតុលាការ អោយចាត់ការតាមនីតិវិធី រីឯរថយន្ត និង គ្រឿងចក្រជីកកកាយដីភ្នំទាំងអស់ ត្រូវបានកម្លាំងជំនាញយកទៅរក្សាទុក នៅក្នុងបញ្ជាការដ្ឋានកងរាជអាវុធ ហត្ថខេត្ត រង់ចាំធ្វើការដោះស្រាយ ៕