គ្រោះថ្នាក់ដ៏រន្ធត់ បុរសម្នាក់បានស្លាប់ក្នុងថ្លុកឈាម ដោយសាររថយន្តបើកបុកពីក្រោយយ៉ាងពេញទំហឹង..!!!
ខេត្តកំពត៖ ករណីគ្រោះថ្នាក់ចរាចរណ៍ដ៏រន្ធត់ បណ្តាលអោយបុរសជាអ្នករត់ម៉ូតូឌុបម្នាក់ មានឈ្មោះ ង៉ែត ឆន ភេទប្រុស អាយុ៥៣ឆ្នាំ បានស្លាប់ យ៉ាងអាណោចអាធ័ម ដោយ សាររថយន្ត ម៉ាក កូរ៉េ ចំណុះ២តោនកន្លះ ដឹកកម្មកររោងចក្រ បោះពួយមកពីលិចស្របទិសគ្នា ហើយខណៈនោះរថយន្តក៏ជ្រុលទៅបុកមូតូពីក្រោយយ៉ាងពេញទំហឹង បណ្តាលជនរង គ្រោះជិះម៉ូតូម្នាក់ឯង ដួលបោកក្បាលទៅនឹងថ្នល់កៅស៊ូ ស្លាប់ភ្លាមៗ មួយរំពេច ចំណែករថយន្តក៏បើកគេចទៅ បាត់ស្រមោលឈឹងតែម្តង លើកំណេត់ផ្លូវជាតិលេខ៣១។ ហេតុការណ៍ដ៏រន្ធត់ខាងលើនេះ បានកើតឡើងនៅវេលាម៉ោង ១៨ និង៥០នាទី ព្រលប់ ថ្ងៃទី១២ ខែកញ្ញា ឆ្នាំ២០១៨ ត្រង់ចំណុចភូមិបឹងធំខាងលិច ឃុំអង្គសុរភី ស្រុកកំពង់ត្រាច ខេត្តកំពត។
បើយោងតាមប្រភពព័ត៌មាននៅកន្លែងកើតហេតុបាននិយាយថា៖ មុនពេលកើតហេតុ គេឃើញជនរងគ្រោះជិះម៉ូតូម្នាក់ឯង ក្នុងទិសដៅពីលិចទៅកើត លុះមកដល់កន្លែងកើតហេតុ ក៏មានរថយន្ត ម៉ាក កូរ៉េ ចំណុះ២ តោនកន្លះ ដឹកកម្មកររោងចក្របោះពួយក្នុងល្បឿនលឿន មកពីលិចស្របទិសគ្នា ហើយខណៈនោះ រថយន្តក៏ជ្រុលទៅបុកមូតូពីក្រោយពេញទំហឹងតែម្តង ហើយរថយន្តក៏បន្តនិងបន្ថែមល្បឿនបើកទៅមុខបាត់ឈឹងតែម្តង។ បើតាមប្រភពបានប្រាប់ សារព័ត៌មាន ( ប៉ោយប៉ែតប៉ុស្តិ៍ ) អោយដឹងទៀតថា៖ បន្ទាប់ពីបង្កហេតុមានមនុស្សស្លាប់រួច ទើបគេឃើញមានសមត្ថ កិច្ចមកចុះពិនិត្យ និង វាស់វែង នៅកន្លែងកើតហេតុ។
ជំុវិញករណីគ្រោះថ្នាក់ចរាចរណ៍ខាងលើ សមត្ថកិច្ចមូលដ្ឋានបានអោយដឹងថា៖ ជនរង គ្រោះដែលស្លាប់បាត់បង់ជីវិត ខាងលើនេះ ជាអ្នករត់ម៉ូតូឌុប រស់នៅភូមិកំពង់ត្រាចទី១ ឃុំកំពង់ត្រាចខាងកើត ស្រុកកំពង់ត្រាច ខេត្តកំពត។ ដោយឡែករថយន្តបង្កហេតុពុំទាន់បានកំណត់មុខសញ្ញាបាននោះទេ ព្រោះខណៈនេះសមត្ថកិច្ចកំពុងតាមស្រាវជ្រាវរកតម្រុយ ដើម្បីអោយម្ចាស់រថយន្តចូលខ្លួនមកដោះស្រាយតាមច្បាប់ ចរាចរណ៍ផ្លូវគោក។
បច្ចុប្បន្នសពបុរសរងគ្រោះ ត្រូវបានក្រុមគ្រួសារមកដឹកបញ្ជូនទៅកាន់លំនៅឋាន៕