ខេត្តកំពត៖ លោកអភិបាល ក្រុង-ស្រុក ត្រូវតែចាត់វិធានការអោយបានមឺុងម៉ាត់ចំពោះបុគ្គលដែលប៉ុនប៉ងរំលោភបំពានសម្បតិ្តសាធារណៈរបស់រដ្ឋ ពិសេសដីបឹងបួ ភ្នំ ប្រឡាយ ព្រែកជាដើម។ ការលើកឡើងបែបនេះជាប្រសាសន៍របស់ លោក ជាវ តាយ អភិបាលនៃគណៈអភិ បាលខេត្តកំពត បានថ្លែងក្នុងកិច្ចប្រជុំ គណៈបញ្ជាការឯកភាពរដ្ឋបាលខេត្ត នៅព្រឹកថ្ងៃសុក្រ ៥ កើត ខែភទ្របទ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី១៤ ខែកញ្ញា ឆ្នាំ២០១៨ នៅសាលាខេត្តកំពត ដែលមានការចូលរួម ពីសំណាក់មន្ទីរអង្គភាពពាក់ព័ន្ធនានា និងអភិបាល ក្រុង-ស្រុក ផងដែល។ ជាមួយគ្នានេះ លោកអភិបាលខេត្តកំពត ក៏បានព្រមានធ្ងន់ៗ ទៅលើអភិបាលក្រុង និងស្រុក ពិសេសអភិបាលស្រុកកំពង់ត្រាច ទាក់ទិនទៅនឹងរឿងការរំលោភបំពានដីធ្លី ឬដីបឹងបួ ព្រែក ប្រឡាយដែលជាសម្បតិ្តសាធារណៈរបស់រដ្ឋ ជាច្រើនករណី ប៉ុន្តែអាជ្ញាធរមិនទាន់មានចំណាត់ការនៅឡើយ ហើយ លោក ជាវ តាយ ក៏បានលើកឡើងពីបញ្ហាបុគ្គលដែលរំលោភដីរបស់រដ្ឋ ដោយសំអាងលើអ្នកមានអំណាចនៅពីក្រោយខ្នង តើគេជាអ្នកណា ធំប៉ុណ្ណា នៅទីណា.?គួរវែកមុខអោយឃើញ ដើម្បីកុំអោយមានបញ្ហាស្មុគស្មាញក្នុងការអនុវត្តច្បាប់នៃរដ្ឋបាលដែនដីនិមួយៗ។ លើសពីនេះ លោក ជាវ តាយ ក៏បានគ្រាន់រំលឹកដល់ លោកអភិបាលក្រុង-ស្រុក ថា៖ បើអស់លោកមិនយល់ពីការអនុវត្តច្បាប់នីតិវិធីរដ្ឋបាលដែនដី ត្រូវឆ្លងមករដ្ឋបាលខេត្ត ពិសេសអភិបាលខេត្តរង់ ចាំទទួលគ្រប់ពេល ម៉ោងណា វេលាណាក៏បានដែរ។ ដូច្នេះរដ្ឋបាលក្រុង-ស្រុក ត្រូវតែពិនិត្យមើលនិងធ្វើការងារអ្វីក៏ដោយ ត្រូវអនុវត្តអោយបានច្បាស់លាស់ កុំធ្វើរបៀបសិះសុះឬឃុបឃិតគ្នាអោយសោះ ហើយក៏ត្រូវប្រយ័ត្នខ្លួនផងដែរ ហើយកុំចេះតែហ៊ានប្រយ័ត្នរលាក..!។ លោកអភិបាលខេត្តបានបញ្ជាក់ផងដែរថា៖ ភ្នំ ឆ្នេរ បឹងបួ ប្រឡាយ ព្រែកជាដើម សុទ្ធសឹងជារបស់រដ្ឋ ត្រូវតែសហការគ្នាជួយការពារថែរក្សាអោយបានគង់វង្ស ហើយចាប់ពីពេលនេះទៅ អភិបាលក្រុង-ស្រុកទាំងអស់ ត្រូវធ្វើរបាយស្តីពីករណីការរំលោភបំពានសម្បតិ្តរបស់រដ្ឋ និងស្រាវជ្រាវរកឫសគល់ និង ឫសកែវ អ្នកនៅពីក្រោយខ្នង តើគេជាអ្នកណា..?។ លោក ជាវ តាយ អភិបាលខេត្ត ថែមទាំងជំរុញដល់អភិបាលក្រុង-ស្រុក អនុវត្តតាមឋានៈតួនាទីរបស់ខ្លួន អោយបានខ្ជាប់ខ្ជួន កុំចេះតែបួញមាត់ឬចង្អុល គឺត្រូវតែមានវិធានការ ចំណាត់ការ រាល់បទល្មើសទាំងឡាយណាដែលធ្វើអោយប៉ះពាល់ដល់ទ្រព្យសម្បតិ្តសាធារណៈរបស់រដ្ឋ អោយមានប្រសិទ្ធភាពខ្ពស់៕