សមត្ថកិច្ចការិយាល័យប្រឆាំងបទល្មើសគ្រឿងញៀនខេត្តសហការជាមួយនគរបាលខេត្តតាកែវចុះបង្រ្កាបសំបុក ជួញដូរគ្រឿង ញៀន ឃាត់ខ្លួន៥នាក់និងថ្នាំញៀនមួយចំនួនធំ...
ខេត្តកំពត៖ ដោយមានការចង្អល់បង្ហាញ បញ្ជាពីលោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការខេត្តនិងមានការសម្រួលនីតិវិធីពីលោក ឯក ឆេងហួត ព្រះរាជអាជ្ញាអមសាលាដំបូងខេត្តកំពត កម្លាំងសមត្ថកិច្ចនគរបាលការិយាល័យប្រឆាំងបទល្មើសគ្រឿងញៀននៃស្នងការខេត្តកំពតបានសហការជាមួយកម្លាំងនគរបាលខេត្តតាកែវ កាលពីរសៀលថ្ងៃអាទិត្យ ត្រូវនឹងថ្ងៃទី១៦ ខែកញ្ញា ឆ្នាំ២០១៨ បានចុះបង្រ្កាបទីតាំងជួញដូរនិងប្រើប្រាស់ថ្នាំញៀនមួយកន្លែង ស្ថិតក្នុងភូមិស្រុកចេក ឃុំអង្គតាសោម ស្រុកត្រាំកក់ ខេត្តតាកែវ ។
លោកឧត្តមសេនីយ៍ទោស្នងការខេត្តបានឲ្យដឹងថា ក្នុងកិច្ចប្រតិបត្តិការសហការខាងលើកម្លាំងសមត្ថកិច្ចយើងបានចាប់ឃាត់ខ្លួនជនសង្ស័យបានចំនួន៥នាក់កំពុងធ្វើសកម្មភាពជាក់ស្តែងនិងរឹបអូសវត្ថុតាងថ្នាំញៀនបានចំនួន១៦កញ្ចប់ក្នុងនោះ(ធំ៩កញ្ចប់)។
ជនសង្ស័យដែលកម្លាំងសមត្ថកិច្ចយើងឃាត់ខ្លួនទាំង៥នាក់រួមមាន ៖ ១/-ឈ្មោះ រ៉េ រ៉ាវី ភេទប្រុស អាយុ១៨ឆ្នាំ រស់នៅភូមិអង្គតាសោម ឃុំអង្គតាសោម ស្រុកត្រាំកក់ ខេត្តតាកែវ។ ២/-ឈ្មោះ ហ៊ី អួង ភេទប្រុស
អាយុ២៥ ឆ្នាំ រស់នៅភូមិកើតហេតុខាងលើ ។ ៣/-ឈ្មោះញឹម ស្វិត ភេទប្រុស អាយុ១៩ឆ្នាំ រស់នៅភូមិស្វាយអំពា ឃុំស្រង៉ែ ស្រុកទ្រាំង ខេត្តតាកែវ។ ៤/- ឈ្មោះ មាស បឿន ភេទប្រុស អាយុ៣៧ឆ្នាំ រស់នៅភូមិ ឃុំកើតហេតុខាងលើ។ ៥/-ឈ្មោះ ខាន់ ដេត ភេទប្រុស អាយុ៣៤ ឆ្នាំ រស់នៅភូមិសេកយា ឃុំអង្គតាសោមស្រុកត្រាំកក់ ខេត្តតាកែវ។
បច្ចុប្បន្នជនសង្ស័យទាំង៥នាក់ខាងលើរួមនិងវត្ថុតាងសមត្ថកិច្ចបានកសាងសំណុំរឿងបញ្ជូនទៅតុលាការដើម្បីចាត់ការតាមនីតិវិធី៕