រថយន្តខ្នាតធំពីរគ្រឿងបុកគ្នាលាន់ឮដូចរន្ទះបង្កការភ្ញាក់ផ្អើលដល់អ្នកស្រុកទាំងយប់ តែសំណាងល្អ មិនបណ្តាលអោយអ្នកណារងរបួសឡើយ...
ខេត្តកែប៖ រថយន្តធុនធំពីរគ្រឿងសង្ស័យតែ តៃកុងងងុយដេក ទើបបោះពួយទៅបុកគ្នាចំពីមុខពេញទំហឹង បង្កអោយប្រជាពលរដ្ឋភ្ញាក់ផ្អើលទាំងយប់។ ប៉ុន្តែហេតុការណ៍ខាងលើនេះមិនបណ្តាលអោយអ្នកណាម្នាក់រងរបួសធ្ងន់ធ្ងរនោះទេ គ្រាន់តែរងការខូចខាតរថយន្តទាំងសងខាងប៉ុណ្ណោះ។
កាលពីវេលាម៉ោង១០និង៤០នាទីយប់ ថ្ងៃទី១៧ ខែកញ្ញា ឆ្នាំ២០១៨ ត្រង់ចំណុចខាងលិចក្លោងទ្វារ សាលារៀនពងទឹកចម្ងាយ១០០ម៉ែត្រ ស្ថិតក្នុងភូមិអូរដូង ឃុំពងទឹក ស្រុកដំណាក់ចង្អើរ ខេត្តកែប ចន្លោះគីឡូម៉ែត្រ (២៥-២៦)នៃកំណាត់ផ្លូវជាតិលេខ៣៣ រវាងរថយន្តខ្នាតធំប៉ះទង្គិចគ្នាក្នុងទិសដៅបញ្ច្រាស។
ទាក់ទិននឹងគ្រោះថ្នាក់ចរាចរណ៍ខាងលើនេះ សមត្ថកិច្ចមូលដ្ឋានបានអោយដឹងថា៖ ហេតុការណ៍ប៉ះទង្គិចគ្នានេះសង្ស័យតែតៃ កុងងងុយដេកទើបរេចង្កូតទៅបុកគ្នាទាំងកំរោលបែបនេះ។ សមត្ថកិច្ចបានបញ្ជាក់ថា៖ មុនពេលកើតហេតុរថយន្តរបស់ក្រុមហ៊ុន STម៉ាក HYUNDAI ពណ៌ស ពាក់ស្លាកលេខ ភ្នំពេញ 3A-6178 ធ្វើដំណើរពីកើតទៅលិច បើកបរដោយឈ្មោះ លេង ឃ្លី ភេទប្រុស អាយុ៣០ឆ្នាំ រស់នៅភូមិព្រែកបិ ឃុំកោះធំ ស្រុកកោះធំ ខេត្តកណ្តាល រថយន្តនេះពេលមកដល់ចំណុចកើតហេតុក៏រេទៅបុកជាមួយរថយន្តម៉ាក HYUNDAI ពណ៌លឿង ពាក់ស្លាកលេខ ភ្នំពេញ 3A.3207 អ្នកបើករថយន្តឈ្មោះ ប្រាក់ មឺុន ភេទប្រុស អាយុ៤០ឆ្នាំ មុខរបរ ជាមន្ត្រីកងរាជអាវុធហត្ថខេត្តកំពត រស់នៅភូមិភ្នំត្រែល ឃុំភ្នំកុង ស្រុកអង្គរជ័យ ខេត្តកំពត។
បច្ចុប្បន្នរថយន្តទាំងពីរគ្រឿង សមត្ថកិច្ចបាននាំយកទៅកាន់អធិការដ្ឋាននគរបាលស្រុកដំណាក់ចង្អើរ ដើម្បីដោះស្រាយគ្នាតាមច្បាប់៕