ខេត្តកំពត៖ កងកម្លាំងនគរបាលខេត្តកំពត ត្រូវតែពង្រឹងសមត្ថភាពបន្ថែមទៀតរាល់បញ្ហាផ្សេងៗដែលពាក់ព័ន្ធនឹងបញ្ហាសន្តិសុខសុវត្ថិភាពរបស់ប្រជាពលរដ្ឋ ពិសេសករណីគ្រឿងញៀននិងករណីគ្រោះថ្នាក់ចរាចរណ៍ ហើយសមត្ថកិច្ចត្រូវតែទប់ស្កាត់ឱ្យខានតែបាន។ នេះជាប្រសាសន៍របស់ លោក ជាវ តាយ អភិបាល នៃគណៈអភិបាលខេត្តកំពត ក្នុងពិធីសំណេះសំណាលជាមួយមន្ត្រីនគរបាលខេត្តកំពត ក្នុងឱកាសបុណ្យភ្ជុំបិណ្ឌ នាព្រឹកថ្ងៃទី២០ ខែកញ្ញា ឆ្នាំ២០១៨ នៅស្នងការដ្ឋាននគរបាលខេត្ត ដែលមានការចូលរួមពីសំណាក់មន្ត្រីនគរបាលខេត្តកំពតចំនួន៧២៥នាក់។ លោក ជាវ តាយ អភិបាលខេត្តកំពតបានលើកឡើងទៀតថា​ អំឡុងពេលនេះផ្នែកសន្តិសុខមានភាពល្អប្រសើរជាងមុន ហើយអី្វៗក៏ត្រូវបានកែលម្អមានភាពស្រស់ស្អាតជាងមុនដែរ ពិសេសផ្លូវថ្នល់និងហេដ្ឋារចនាសម្ព័ន្ធជាច្រើនទៀត ហើយនៅពេលខ្លីខាងមុខរដ្ឋបាលខេត្តនឹងដាក់ភ្លើងស្តុបគ្រប់ផ្លូវបំបែកទាំងអស់ឱ្យបានរួចរាល់នៅក្នុងឆ្នាំ២០១៩ខាងមុខនេះ។ការដាក់ស្តុបតាមផ្លូវបំបែក ក៏ជាកត្តាងាយស្រួលដល់ការធ្វើចរាចរ ហើយកម្លាំងនគរបាលចរាចរណ៍ក៏អាចងាយស្រួលគ្រប់គ្រងផងដែរ។ លើសពីនេះ លោកអភិបាលខេត្តបានលើកឡើងថា៖ នឹងមានគម្រោងស្ថាបនាវិមានឯករាជ្យមួយក្នុងខេត្ត ព្រោះបច្ចុប្បន្នខេត្តកំពតយើងមិនទាន់មានវិមានឯករាជ្យនៅឡើយទេ ដោយគម្រោងនេះរដ្ឋបាលខេត្តបាននិងកំពុងសិក្សា ហើយទីតាំងដែលត្រូវសាងសង់វិមានឯករាជ្យគឺស្ថិតចំណុចចំណតរថយន្តតូតាល់តែម្តង។ លោកអភិបាល ខេត្តបានគូសបញ្ជាក់ទៀតថា លោកនឹងបង្កើតយន្តការមួយដើម្បីពិនិត្យមើល និង សម្រប សម្រួល ហើយសុំគោលការណ៍ទៅសម្តេច អគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដើម្បីអនុវត្តតែម្តង ព្រោះនៅចំណុចដែលជាគម្រោងសាងសង់វិមានឯករាជ្យនេះ មានជាប់ពាក់ព័ន្ធនឹងកិច្ចសន្យាវិនិយោគ។ ក្នុងឱកាសនោះ លោក ជាវ តាយ អភិបាលខេត្តកំពត ក៏បានឧបត្ថម្ភថវិកាដល់មន្ត្រីកងកម្លាំងនគរបាលខេត្ត ចំនួន៧២៥នាក់ ក្នុងម្នាក់ៗទទួលបានថវិកា ចំនួន៥០.០០០រៀល សម្រាប់ឱកាសបុណ្យភ្ជុំបិណ្ឌ។ សូមជម្រាបថា៖ បើតាមរបាយការណ៍ របស់លោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាលខេត្តកំពត បានឱ្យដឹងថា ស្នងការខេត្ត បានវិវឌ្ឍន៍ប្រែប្រួលនិងពង្រីកយន្តការដឹកនាំ រហូតមកទល់បច្ចុប្បន្នមានផែនចំណុះចំនួន១២ផែន​មានការិយាល័យចំនួន៣១ អធិការដ្ឋាននគរបាល ក្រុង-ស្រុក ចំនួន០៨ និងប៉ុស្តិ៍រដ្ឋបាលចំនួន ៩៣ប៉ុស្តិ៍ និងមានក្របខណ្ឌកម្លាំងសរុបមានចំនួន ១.៨០៤នាក់ ស្រីចំនួន១៣៩នាក់៕