ខេត្តកំពត៖ ពិធីសំណេះសំណាលជាមួយកងកម្លាំងប្រដាប់អាវុធ នៃតំបន់ប្រតិបតិ្តការសឹករងកំពត ចំនួន ៤២៣នាក់ក្រោមអធិបតីភាព លោក ជាវ តាយ អភិបាល នៃគណៈអភិបាលខេត្តកំពត កាលពីរសៀលថ្ងៃទី២១ ខែកញ្ញា ឆ្នាំ២០១៨។ លោក ជាវ តាយ អភិបាលខេត្ត បានសង្កត់ធ្ងន់ថា៖ កិច្ចការអ្វីក៏ដោយបើយើងមិនយកគំនិតទៅប្រើ គឺយើងអនុវត្តការងារអី្វក៏មិនទទួលបានផលវិជ្ជមាននោះដែរ។ យ៉ាងណាមិញកិច្ចការដំណើរការទៅមុខបានដោយរលូន គប្បីយើងត្រូវរួមគ្នាគិត រួមគ្នាធ្វើ រួមគ្នាដោះ ស្រាយ និង រួមគ្នាទទួលខុសត្រូវ។ ម្យ៉ាងទៀតខេត្តកំពត គឺជាខេត្តមួយជាប់ព្រំប្រទល់រវាងខេត្តញៀងយ៉ាង (វៀតណាម) សូមកងកម្លាំងប្រដាប់អាវុធទាំងដែនទឹក ដែនគោក ត្រូវតែមានកិច្ចសហប្រតិបតិ្តការ និងការពារអោយបានរឹងមាំ។ លោកអភិបាលខេត្តកំពតបានបញ្ជាក់ទៀតថា៖ កន្លងមកការចូលរួមរបស់កងកម្លាំងប្រដាប់អាវុធយើង មានភាពល្អប្រសើរ រួមគ្នា សាមគ្គីភាព ដឹកនាំ គោរពច្បាប់ទាំងអស់គ្នា។ដូច្នេះខេត្តកំពតយើង ត្រូវតែមានការអភិវឌ្ឍន៍ ដូចជាអភិវឌ្ឍន៍ខេត្តទាំងមូល អភិវឌ្ឍន៍ស្ថាប័នដែលជាកងកម្លាំងប្រដាប់អាវុធ ឬក៏អភិវឌ្ឍន៍រដ្ឋបាលខេត្ត ដែលជាមន្ត្រីសាធារណៈបម្រើដល់ប្រជាពលរដ្ឋ។ លោក ជាវ​ តាយ ក៏បានបញ្ជាក់ទៀតថា៖ គោលនយោបាយដឹកនាំរបស់រាជរដ្ឋាភិបាលក្នុងអាណតិ្តទី៦នេះ បានផ្តោតការយកចិត្តទុកដាក់យ៉ាងខ្លាំង មកលើប្រជាពលរដ្ឋ និងមន្ត្រីកងកម្លាំងប្រដាប់អាវុធ ជាពិសេសបងប្អូនអតីតយុទ្ធជន ដែលគ្មានដីសង់លំនៅដ្ឋានហើយគ្មានលទ្ធភាព គឺមន្ទីរសង្គមកិច្ច អតីតយុទ្ធជន និងនីតិកាយសម្បទា ត្រូវមានផែន ការមួយដើម្បីឆ្លុះបញ្ចាំង ពីទំហំ តម្រូវការកងទ័ព ព្រោះមន្ទីរនេះជាអង្គភាពមួយចាំបាច់ដែលយើងត្រូវឆ្លុះបញ្ចាំង ហើយគិតគូរយ៉ាងហ្មត់ចត់។ លោកថា៖ កន្លងមកយើងមានកម្មវិធីច្រើនដែល ពាក់ព័ន្ធជាមួយមន្ទីរសង្គមកិច្ច ប៉ុន្តែការប្រារព្វក្នុងពិធីនោះ ហាក់ពុំសូវប្រព្រឹត្តទៅល្អប្រសើរនោះទេ។ ហើយចាប់ពីពេលនេះទៅ មន្ទីរត្រូវតែគិតគូរ អ្វីដែលជាទិវាជាតិ គឺដាច់ខាតត្រូវតែយកមកធ្វើ ហើយក៏មិនត្រូវនិយាយថា៖ អត់លុយនោះទេ ព្រោះខណៈនេះរដ្ឋបាលខេត្តកំពត ពិតជាមានថវិកាគ្រប់គ្រាន់ សម្រាប់ប្រារព្វទិវាជាតិមិនអោយខ្វះចន្លោះនោះឡើយ។ សូមជម្រាបថា៖ ក្នុងពិធីសំណេះសំណាលជាមួយកងកម្លាំងប្រដាប់អាវុធ នៃតំបន់ប្រតិបតិ្តការសឹករងកំពត សម្រាប់ក្នុងឱកាសបុណ្យភ្ជុំបិណ្ឌនេះ លោក ជាវ តាយ អភិបាលខេត្តកំពត ក៏បានឧបត្ថម្ភថវិកាចំនួន២១.១៥០.០០០រៀល​ សម្រាប់ផ្តល់ជូនមន្ត្រីកងកម្លាំងចំនួន ៤២៣នាក់ ដោយម្នាក់ៗទទួលបានថវិកាចំនួន ៥០.០០០រៀល៕