ខេត្តកំពត៖ ពិធីសន្និបាតបូកសរុបការងារបោះឆ្នោតនេះ បានប្រព្រឹត្តទៅ នៅក្នុងសាលមហោស្រពខេត្តកំពត នៅរសៀល ថ្ងៃទី២២ ខែកញ្ញា ឆ្នាំ២០១៨នេះ ។ ដោយមានការចូលរួមពីសំណាក់ លោក សិុក ប៊ុនហុក ប្រធានគណៈកម្មាធិការជាតិរៀបចំការបោះឆ្នោត និង លោក ជាវ តាយ អភិបាល នៃគណៈអភិបាលខេត្តកំពត និងលោក លោកស្រី ជាសមាជិកគណៈកម្មាធិការជាតិរៀបចំការបោះឆ្នោត លោក លោកស្រីតំណាងលេខាធិការដ្ឋាននៃគណៈបញ្ជាការសន្តិសុខអចិន្ត្រៃយ៍ ព្រមទាំងសមាជិក សមាជិកា នៃគណៈកម្មការ បានមកពីគ្រប់បណ្តាខេត្ត ចំនួន២៥ ខេត្ត-ក្រុង ទូទាំងប្រទាំងប្រទេសកម្ពុជា។ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ថ្លែងក្នុងឱកាសនោះ បានបញ្ជាក់ថា៖ ការបោះឆ្នោតជ្រើសតាំងតំណាងរាស្ត្រ នីតិកាលទី៦ កាលពីថ្ងៃទី២៩ ខែកក្កដា ឆ្នាំ២០១៨ កន្លងទៅ ជាការបោះឆ្នោត ដែលរៀបចំឡើងស្របតាមរដ្ឋធម្មនុញ នៃព្រះរាជាណាចក្រកម្ពុជា និងជាការបោះឆ្នោត ស្របតាមគោលការណ៍លទ្ធិប្រជាធិបតេយ្យ សេរីពហុបក្ស។ សម្តេចក្រឡាហោម ស ខេង បានបន្ថែមទៀតថា៖ តាមស្មារតីរដ្ឋធម្មនុញនៃព្រះរាជាណាចក្រកម្ពុជា ត្រង់មាត្រាទី១ បានកំណត់នូវការ គ្រប់គ្រងប្រទេស តាមរបបរាជានិយមអាស្រ័យរដ្ឋធម្មនុញ និង របបប្រជាធិបតេយ្យ សេរីពហុបក្ស របបគ្រប់គ្រងនេះ គ្មានជនណាម្នាក់ អាចកែប្រែ និង ផ្លាស់ប្តូរបានឡើយ។ ទន្ទឹមនិងនេះ តាមស្មារតីនៃមាត្រា៧៨ នៃរដ្ឋធម្មនុញ បានកំណត់អំពីនីតិកាលរបស់រដ្ឋសភា មានរយៈពេល៥ឆ្នាំ ហើយរដ្ឋសភាមិនអាច ត្រូវរំលាយមុនផុតអាណតិ្តបានឡើយ។ ការរំលាយរដ្ឋសភា មុនផុតអាណតិ្ត អាចធ្វើទៅបានតែ ក្នុងករណីដែលរដ្ឋាភិបាលត្រូវបានរំលាយពីរលើក ក្នុងរយៈពេល១២ខែតែប៉ុណ្ណោះ។ នេះជាករណីដែលតម្រូវអោយមានការរៀបចំបោះឆ្នោត មុនផុតនីតិកាលរដ្ឋសភា។ ចំពោះការបន្តនីតិកាលរបស់រដ្ឋសភាអាចធ្វើទៅ បានតែក្នុងពេលប្រទេសជាតិមានសង្គ្រាម ឬកាលៈទេសៈពិសេសដ៏ទៃទៀត ដែលមិនអាចបោះឆ្នោតបាន ហើយការបន្តនីតិកាលរបស់រដ្ឋសភានេះត្រូវធ្វើឡើងបានមួយដង មួយឆ្នាំតាមសំណើររបស់ព្រះមហាក្សត្រ និង ត្រូវសម្រេចដោយមតិយល់ព្រម ពីរភាគបីយ៉ាងតិច នៃចំនួនសមាជិករដ្ឋសភាទាំងមូល ហើយនេះជាករណីដែលអាចពន្យារការបោះឆ្នោត។ ក្នុងពិធីបិទសន្និបាតនាពេលនេះ លោក សិុក ប៊ុនហុក ប្រធានគណៈកម្មាធិការជាតិរៀបចំការបោះឆ្នោតបានគូសបញ្ជាក់ថា៖ ការរៀបចំសន្និបាតនាពេលនេះ គឺដើម្បីបូកសរុប និងវាយតម្លៃលើលទ្ធផលការងារបោះឆ្នោតជ្រើសតាំងតំណាងរាស្ត្រ នីតិកាលទី៦ ដែលបានប្រព្រឹត្តទៅកាលពីថ្ងៃទី២៩ ខែកក្កដា ឆ្នាំ២០១៨ កន្លងមកនេះ និងស្វែងយល់ពីបញ្ហាប្រឈម ចំណុចខ្លាំង ចំណុចខ្សោយ ព្រមទាំងដំណោះស្រាយ ដើម្បីេបទពិសោធន៍យកទៅធ្វើការកែលម្អ ការបោះឆ្នោត លើកក្រោយៗទៀត អោយទទួលបានលទ្ធផលកាន់តែជោគជ័យបន្ថែមទៀត។ លោកបានបន្តទៀតថា៖ ដោយផ្អែកលើការបោះឆ្នោតជ្រើសតាំងតំណាងរាស្ត្រ នីតិកាលទី៦កន្លងមកនេះឃើញថា៖ មានគណបក្សនយោបាយចំនួន២០ បានចូលរួមប្រកួត ប្រជែង ហើយមានប្រជាពលរដ្ឋខ្មែរចំនួន៦.៩៥៦.៩០០នាក់ ស្មើនឹង ៨៣,០២% នៃប្រជាពលរដ្ឋខ្មែរ ដែលមានឈ្មោះក្នុងបញ្ជីបោះឆ្នោតចំនួន៨.៣៨០.២១៩នាក់ បានចេញទៅបោះឆ្នោតសម្តែងឆន្ទៈក្នុងការជ្រើសរើសតំណាងរបស់ខ្លួន។ លោក សិុក ប៊ុនហុក បានបញ្ជាក់ទៀតថា ដោយផ្អែកលើ បទពិសោធន៍ និងអនុវត្តនៃការផ្សព្វផ្សាយលទ្ធផលបោះឆ្នោតបឋម សម្រាប់ការបោះឆ្នោត ជ្រើសតាំងតំណាង រាស្ត្រ នីតិកាលទី៦ គឺក្នុងគោលដៅបង្កើនជំនឿទុកចិត្តពីភាគីពាក់ព័ន្ធ នឹងការបោះឆ្នោត មកលើគណៈកម្មការរៀបចំបោះឆ្នោត គ្រប់លំដាប់ ថ្នាក់ និង ផ្តល់លទ្ធផលបោះឆ្នោតបឋម បានឆាប់រហ័ស ត្រឹមត្រូវ ទូលំទូលាយ និងតម្លាភាព ដល់ភាគីពាក់ព័ន្ធទាំងអស់ ព្រមទាំងដើម្បីធ្វើជាព័ត៌មានអំពីលទ្ធផលនៃការបោះ ឆ្នោត មុនដំណើរការបូកសរុបលទ្ធផលបោះ ឆ្នោតបណ្តោះអាសន្ន និង លទ្ធផលបោះឆ្នោតជាផ្លូវការ៕