ខេត្តកំពត៖ ចាប់ពីពេលនេះទៅ សូមលោកអភិបាលក្រុង-ស្រុកទាំងអស់ ត្រូវតែមានចំណាត់ការដល់បុគ្គលរំលោភបំពានដីរដ្ឋ ពិសេសត្រូវវែកមុខជននៅពីក្រោយនៃរំលោភការទន្ទ្រាននេះអោយឃើញ។ ការលើកឡើងបែបនេះខណៈ លោក ជាវ តាយ អភិបាល នៃគណៈអភិបាលខេត្តកំពត និងជាប្រធានគណៈកម្មការគ្រប់គ្រងដីរដ្ឋ បានដឹកនាំកិច្ចប្រជំុគណៈកម្មការគ្រប់គ្រងដីរដ្ឋថ្នាក់ខេត្ត នាព្រឹកថ្ងៃសុក្រ ៤រោច ខែភទ្របទ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២៨ ខែកញ្ញា ឆ្នាំ២០១៨ នៅសាលាខេត្តកំពត។ លោកអភិបាលខេត្តកំពត ក៏បានជំរុញដល់លោកអភិបាលក្រុង-ស្រុក ត្រូវតែចាត់វិធានការឱ្យបានហ្មត់ចត់ចំពោះបុគ្គលដែលទន្ទ្រានដីរដ្ឋ ដូចជា មាត់ព្រែក បឹងបួ ប្រឡាយជាដើម ដោយត្រូវតែជូនដំណឹងឬធ្វើកិច្ចសន្យាឱ្យបញ្ឈប់សកម្មភាពជាបន្ទាន់ ហើយបើបុគ្គលនោះនៅតែរឹងរូស ត្រូវតែអនុវត្តតាមផ្លូវច្បាប់ទៅលើបុគ្គលរំលោភបំពានដីសាធារណៈរបស់រដ្ឋ ដោយមានអង្គភាពជំនាញពាក់ព័ន្ធ និងស្ថាប័នច្បាប់ចូលរួមផងដែរ។លោក ជាវ តាយ បានលើកឡើងផងដែរថា ចំពោះបុគ្គលដែលបំពានច្បាប់ ត្រូវមានភស្តុតាងច្បាស់លាស់សម្រាប់ដាក់បន្ទុក ចឹងក្រុមការងារដែលបានបង្កើតឡើងដែលត្រូវបានឱ្យ លោក បិុល កុសល អភិបាលរងខេត្តជាអ្នកមើលការខុសត្រូវនិងមានមន្ទីរអង្គភាពជាសាមី ដើម្បីដឹកនាំក្នុងកិច្ចការនេះ ដោយមានការចូលរួមពីសំណាក់មេធាវីមួយចំនួនផង។ លោកអភិបាលខេត្តបានបន្តថា រដ្ឋបាលខេត្តដាច់ខាតត្រូវតែធ្វើបែបនេះ ព្រោះបច្ចុប្បន្ន អ្នកគោរពច្បាប់ នៅតែគោរព ឯអ្នកបំពាន នៅតែបំពានដដែល ហើយសព្វថ្ងៃនេះមានអ្នកបំពានច្បាប់ច្រើនជាអ្នកគោរពច្បាប់ ព្រោះថាអ្នកបំពានបានផលប្រយោជន៍ ចំណែកអ្នកគោរពបានត្រឹមតែសោកា បានន័យថា គេធ្វើបាន ប៉ុន្តែយើយមិនអាចធ្វើបានឡើយ។ ជាមួយនេះ លោកអភិបាលខេត្តក៏បានដាស់តឿនដល់មន្ត្រីរាជការទាំងអស់សហការធ្វើកិច្ចការទាំងអស់គ្នា ហើយត្រូវស្វែងយល់ថា តើអ្នកគោរពច្បាប់ រវាងអ្នកបំពានច្បាប់ អ្នកណាមួយជាអ្នកត្រូវ..?លោកថា រដ្ឋបាលក្រុង-ស្រុកមានអំណាចគ្រប់គ្រាន់ក្នុងការប្រើសិទ្ធិក្នុងនាមជាប្រធានគណៈបញ្ជាការឯកភាព ហើយធ្វើបានឬធ្វើមិនបានស្ថិតលើមនសិការរបស់ខ្លួន។ចឹងបើយើងគិតថាអ្វីដែលខុស អ្វីដែលត្រូវនោះគឺអាចធ្វើទៅបានហើយ ព្រោះរដ្ឋបាលខេត្តពុំមានពេលវេលាណាចុះទៅអនុវត្តផ្ទាល់ជូនដល់ក្រុង-ស្រុកនោះទេ ប៉ុន្តែរដ្ឋបាលខេត្តគ្រាន់តែមានកាតព្វកិច្ចពិនិត្យមើលថា តើរដ្ឋបាលក្រុង-ស្រុក អនុវត្តមានប្រសិទ្ធភាពដែរឬទេ.?៕