ខេត្តប៉ៃលិន ៖ ហេតុការណ៍ដ៏គួរអោយរន្ធត់មួយ ដោយដាច់ខ្សែរ៉ត បណ្តាលអោយកម្មករសំណង់ស្លាប់ចំនួន៤នាក់ និងម្នាក់រងរបួសធ្ងន់ ត្រូវគេបញ្ជូនទៅសង្គ្រោះនៅមន្ទីរពេទ្យខេត្តបាត់ដំបង ខណៈដែលពួកគេទាំងនោះជិះខ្សែរ៉ត យោងពីក្រោមឡើងទៅជាន់ទី១២ ដើម្បីធ្វើការងារ លុះកំពុងតែយោងឡើងទៅដល់ជាន់ទី៧ ស្រាប់តែដាច់ខ្សែរ៉ត បណ្តាលឱ្យធ្លាក់ចុះមកដី បុកជាមួយនឹងដែកខាងក្រោម ទើបបង្កអោយមានអ្នកស្លាប់៤នាក់និងរបួសធ្ងន់ម្នាក់បែបនេះ។ ហេតុការណ៍ដាច់ខ្សែរ៉តធ្លាក់កម្មកររបួស និងស្លាប់នេះ បានកើតឡើងកាលពីវេលាម៉ោង០៧និង៣០នាទីព្រឹក ថ្ងៃទី០៤ ខែកញ្ញា ឆ្នាំ២០១៨ ស្ថិតនៅជាប់ផ្លូវជាតិលេខ៥៧ ក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។ ប្រភពព័ត៌មានពីសមត្ថកិច្ចនគរបាល បានឱ្យដឹងថា៖ ជនរងគ្រោះទី១. ឈ្មោះ ថោន កក ភេទប្រុស អាយុ១៩ឆ្នាំ ស្លាប់ ទី២. ឈ្មោះ បូរី ភេទប្រុស អាយុ៣៣ឆ្នាំ ស្លាប់ ទី៣. ឈ្មោះ ប្រាក់ ខឿន ភេទប្រុស អាយុ៣២ឆ្នាំ ស្លាប់ ទី៤. ឈ្មោះ លឹម វែង ភេទប្រុស អាយុ១៨ឆ្នាំ ស្លាប់ និងទី៥. ឈ្មោះ តន អាយុ៣២ឆ្នាំ រងរបួសធ្ងន់ ទាំងអស់គ្នាស្នាក់នៅបណ្តោះអាសន្នកន្លែងកើតហេតុខាងលើ ។ បើតាមប្រភពព័ត៌មានពីអ្នកឃើញហេតុការណ៍ បានអោយដឹងថា៖ គេបានឃើញកម្មករសំណង់ទាំងនោះ បានឡើងជិះកន្ត្រកយោងដូចសព្វមួយដង លុះកំពុងតែយោងឡើងសុខៗ ដល់ជាន់ទី៧ ស្រាប់តែដាច់ខ្សែរ៉ត ធ្លាក់ចុះមកដីវិញយ៉ាងពេញទំហឹង បណ្តាលអោយបុកប៉ះចំ នឹង ដែក នៅខាងក្រោម ធ្វើអោយអ្នកខ្លះបាក់ដៃជើង និង ស្លាប់ភ្លាមៗចំនួន៣នាក់ និងរងរបួសធ្ងន់២នាក់ លុះបញ្ជូនទៅដល់មន្ទីរពេទ្យបង្អែកខេត្តប៉ៃលិន ក៏បានស្លាប់បន្ថែមម្នាក់ទៀត និងម្នាក់ទៀតរងរបួសធ្ងន់ ត្រូវបានគ្រូពេទ្យបញ្ជូនបន្តទៅសង្គ្រោះនៅឯមន្ទីរពេទ្យខេត្តបាត់ដំបង ។ ដោយឡែកសពជនរងគ្រោះដែលស្លាប់ទាំង៤នាក់ កំពុងរក្សាទុកនៅក្នុងមន្ទីរពេទ្យពេទ្យបង្អែកខេត្តប៉ៃលិន ដើម្បីអោយសាច់ ញាតិយកទៅធ្វើបុណ្យតាមប្រពៃណី ៕