ខេត្តកំពត៖ ពលរដ្ឋទូទាំងស្រុកកំពង់ត្រាច ពិសេសអតិថិជន ដែលកំពុងប្រើប្រាស់បណ្តាញទឹកស្អាតរបស់ក្រុមហ៊ុន បាននាំគ្នារិះគន់ថា៖ ក្រុមហ៊ុនផលិតទឹកស្អាតគ្មានការទទួលខុសត្រូវ លើកត្តាអនាម័យ ដោយបានបង្ហូរទឹកក្រខ្វក់ ចូលក្នុងអាងស្តុកទឹករាប់ឆ្នាំ ហើយផ្តល់អោយអតិជនប្រើប្រាស់ជាប្រចាំថ្ងៃខែឆ្នាំផងដែលនោះ។ ពាក់ព័ន្ធករណីខាងលើនេះ មហាជនស្ទើពេញស្រុក តែងតែនាំគ្នាលើកឡើងថា៖ ក្រុមហ៊ុនផលិតទឹកស្អាត ហាក់ពុំបានគោរពតាមគោល ការណ៍ អនាម័យ និង ផលិតទឹក ពុំអនុវត្តតាមបទដ្ឋានបច្ចេកទេស និង គ្មានស្តង់ដារ ដូចជានៅជុំវិញបរិវេណផលិតទឹកទាំងមូលមានភាពក្រខ្វក់ ហើយក្រុមហ៊ុននេះ ក៏បានជីកកូនប្រឡាយសម្រាប់បង្ហូរទឹកពីស្រែនិងទឹកភ្លៀងពីទីវាល ដែលគ្មានអនាម័យសម្រាប់ស្តុកទឹកទុក ផ្គត់ផ្គត់អោយអតិថិជនប្រើប្រាស់ប្រចាំថ្ងៃទៅវិញ។ ប្រភពមជ្ឈដ្ឋានដដែលៗ បានអោយដឹងទៀតថា៖ កន្លែងដែលក្រុមហ៊ុនបង្ហូរទឹកចូលអោយប្រជាពលរដ្ឋប្រើប្រាស់ខាងលើនោះ គឺជាទឹកដែលប្រជាពលរដ្ឋបង្ហៀរចេញពីលំនៅឋាននៅក្បែរនោះ និង ទឹកភ្លៀងហូរបាចសាចមកពីគ្រប់ទីកន្លែងផងដែរ។ មហាជនបានរិះគន់ទៀតថា៖ ក្រុមហ៊ុនផលិតទឹកស្អាតនេះ គួរប្តូរឈ្មោះថា៖ ជាក្រុមហ៊ុនផលិតទឹកក្រខ្វល់វិញទើបបានត្រូវ ពិព្រោះគេបានសង្កេតឃើញថា ទីតាំងផលិតទឹកស្អាត ក្នុងស្រុកកំពង់ត្រាចនេះ ហាក់មានភាពក្រខ្វក់ទាំងខាងក្រៅបរិវេណ និង ខាងក្នុងបរិវេណ ដោយមើលទៅ ដូចជាមិនសមផ្តល់ទឹកអោយអតិថិជនប្រើប្រាស់សោះឡើយ។ ជាមួយនឹងកត្តាផលិតទឹកគ្មានអនាម័យខាងលើ ពលរដ្ឋក្នុងស្រុកកំពង់ត្រាច សំណូមពរដល់ផ្នែកជំនាញពាក់ព័ន្ធ មេត្តាចុះទៅពិនិត្យមើលទីតាំងផលិតទឹកស្អាតខាងលើនេះផង តើម្ចាស់ក្រុមហ៊ុនបានអនុវត្តតាមបទដ្ឋានបច្ចេកទេស និង តាមស្តង់ដារទឹកស្អាតដែរឬទេ?។ ទាក់ទិននឹងការផលិតទឹកគ្មានអនាម័យសម្រាប់ផ្គត់ផ្គង់អតិថិជននេះដែរ នៅព្រឹកថ្ងៃទី០៨ខែកញ្ញា ឆ្នាំ២០១៨នេះ (សារព័ត៌មានប៉ោយប៉ែតប៉ុស្តិ៍) មិនអាចទំនាក់ទំនងសុំការពន្យល់ ពីអ្នកគ្រប់គ្រង ផលិតទឹកស្អាតស្រុកកំពង់ត្រាចបាននោះទេ ដោយសារទូរស័ព្ទរបស់លោកស្ថិតក្នុងតំបន់ក្រៅសេវា។ ដោយឡែក លោក សុខ គឹមជឿន ប្រធានមន្ទីរ ឧស្សាហកម្ម និង សិប្បកម្មខេត្តកំពត នៅព្រឹកថ្ងៃដ៏ដែលនេះ (សារព័ត៌មានប៉ោយប៉ែតប៉ុស្តិ៍) មិនអាចសុំការបកស្រាយ ពីលោកបានទេ ដោយសារលោកប្រធានជាប់រវល់កិច្ចផ្ទាល់ខ្លួន៕