ខេត្តបន្ទាយមានជ័យ៖ លោក នង ធឿន និងលោក ម៉ែន សោភ័ណ អភិបាលរងក្រុងប៉ោយប៉ែតទាំង ២ រូប ប្តូរទៅកាន់ជាអភិបាលរងស្រុកថ្មពួក និង អភិបាលរងស្រុកអូជ្រៅ និង ផ្ទេរភារកិច្ចអោយលោក រឿន វីរៈ មកពីអភិបាលរងស្រុកថ្មពួក ជំនួសលោក ម៉ែន សោភ័ណ្ឌ ហើយលោក កែវ ដារារស្មី មកពីការិយាល័យរដ្ឋាបាលខេត្តជំនួសលោក នង ធឿន វិញ។ ពិធីនេះប្រព្រឹត្តទៅនៅវេលាម៉ោង១៤និង៣០ នាទីរសៀល ថ្ងៃទី១១ ខែតុលាឆ្នាំ ២០១៩ នៅសាលាក្រុងប៉ោយប៉ែត ស្ថិតនៅក្នុងភូមិគីឡូម៉ែត្រលេខ ៤ សង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ ក្រោមអធិបតីយភាពឯកឧត្តម ខេង ស៊ុម ប្រធានក្រុមប្រឹក្សាខេត្ត ឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ នឹងមានការចូលរួមមន្រ្តីសាលាខេត្ត សាលាក្រុង ចៅសង្កាត់ទាំង៣ មេភូមិ លោកគ្រូអ្នកគ្រូសិស្សានុសិស្សយ៉ាងច្រើនផងដែរ។ ក្រោយពីលោក គាត ហ៊ុល អភិបាលក្រុងប៉ោយប៉ែត ឡើងអានរបាយការណ៍បូកសរុបកាងារដែលរដ្ឋបាលក្រុងប៉ោយប៉ែត សម្រេចបាននាពេលកន្លងមក និង ការប្តេជ្ញាចិត្តរបស់លោក កែវ ដារារស្មី និង លោក រឿន វីរៈ ដែលត្រូវទទួលតំណែងថ្មីរួចមក ឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ ក៏បានថ្លែងថា៖ ដោយសារតែថ្ងៃនេះមានការផ្លាស់ប្ដូរ អភិបាលរងក្រុង ដល់ទៅពីរនាក់នៅក្នុងក្រុងប៉ោយប៉ែតនេះ ក្រែងមតិមហាជន ឬក៏ប្រជាពលរដ្ឋមានការភាន់ច្រឡំ លោកក៏បានបញ្ជាក់ប្រាប់ថា៖ ការផ្លាស់ប្ដូរនេះគឺដោយសារតែលោក ម៉ែន សោភ័ណ្ឌ និង លោក នង ធឿន ចប់អាណត្តិ មិនអាចបន្ត ស្ថិតនៅក្នុងក្រុងប៉ោយប៉ែត នេះទៀតបាន ព្រោះជាគោលការណ៍អភិបាលអភិបាលរង ខេត្ត ក៏ដូចជាក្រុងក្នុងអាណត្តិរបស់ខ្លួនបានតែ៤ឆ្នាំប៉ុណ្ណោះ បើភ្ជាប់ពីអាណត្តិបាន ៨ ឆ្នាំ គឺត្រូវតែដូរចេញទៅកាន់ស្រុក ឬ ខេត្តផ្សេង បើមិនមានចន្លោះប្រហោងអាចជ្រៀតចូលស្រុក ឬ ខេត្តផ្សេងគឺ ត្រូវទៅនៅក្រសួង មហាផ្ទៃវិញ។ ជាចុងក្រោយឯកឧត្ដម អ៊ុំ រាត្រី ក៏បានសំណូមពរអោយ ប្រជាពលរដ្ឋទូទាំងប្រទេស កុំស្ដាប់ការញុះញង់ ពីរផ្នែកម្ខាងទៀត ដែលចង់ផ្ដួលរំលំរដ្ឋាភិបាលដោយយកថ្ងៃ៩ វិច្ឆិកា ខាងមុខនេះ។ ឯកឧត្តម អ៊ុំ រាត្រី បានបញ្ជាក់ថា៖ សូមប្រជាពលរដ្ឋទាំងអស់ នាំគ្នាទទួលទានអំបុក នៅថ្ងៃ៩វិច្ឆិកាទាំងអស់គ្នាវិញ ដោយលោកចាត់ទុកថា៖ ជាថ្ងៃទិវាការពារព្រះមហាក្សត្រ ការពារសាសនា និង ការពារជាតិ៕ ដោយៈ ស៊ុយ វុទ្ធី ប្រធានគ្រប់គ្រងព័ត៌មាន គេហទំព័រ ប៉ោយប៉ែតប៉ុស្តិ៍ www.poipetpostnews.com