ខេត្តបាត់ដំបង៖ អាជ្ញាធរខេត្ត សូមជម្រាបជូនដំណឹងដល់ប្រជាពលរដ្ឋទូទៅទាំងអស់អោយបានជ្រាបថា៖ ក្នុងឆ្នាំ២០១៩ នេះ ខេត្តបាត់ដំបងបាន រៀបចំកម្មវិធីបុណ្យអុំទូកចេញវស្សានៅស្ទឹងសង្កែក្រុងបាត់ដំបង ដែលប្រព្រឹត្តទៅ​ នៅថ្ងៃទី១២.១៣.១៤ ខែតុលា ដើម្បីបម្រេីការកំសាន្តសប្បាយរីករាយ ជូនបងប្អូនប្រជាពលរដ្ឋនៅក្នុងខេត្ត ក្រៅខេត្ត​ និង​ ជាការលើកស្ទួយវប្បធម៌ប្រពៃណីទំនៀមទំលាប់របស់ខេត្តបាត់ដំបង ដែលតែងតែប្រារព្ធឡើងជារៀងរាល់ឆ្នាំ។ បើតាមការអោយដឹងពីលោក ផេង សិទ្ធី ជាអភិបាលក្រុងបាត់ដំបង បានប្រាប់ គេហទំព័រប៉ោយប៉ែតប៉ុស្ដិ៍ យើងថា៖ ប្រពៃណីបុណ្យអុំទូកចេញវស្សា របស់ខេត្ត បាត់ដំបង​ បានដំណើរការឡើងមានរយៈពេល១៦ឆ្នាំមកហើយ ដែលមានការចូលរួមយ៉ាងច្រើនកុះករពីប្រជាពលរដ្ឋក្នុងខេត្ត ក្រៅខេត្ត និងភ្ញៀវអន្តរជាតិសរុបប្រមាណ២០ម៉ឺននាក់ក្នុងមួយឆ្នាំៗ។ ក្នុងនោះខេត្តមានទូកងជិត៣០គ្រឿង ចែកចេញជាប្រភេទទូកខ្នាតអន្តរជាតិចំណុះ​ ១០ ទៅ ២២នាក់ ទូកប្រពៃណីខ្នាតខ្លីចំណុះ២២នាក់ និងទូកប្រពៃណីខ្នាតវែងចំណុះ៤៩ ទៅ ៦៩នាក់ ។ ក្នុងពិធីអុំទូកនេះដែរ ក៏មានរៀបចំកម្មវិធីប្រគុំតន្រ្តី តាំងពិព័រណ៍ពាណិជ្ជកម្ម បង្ហោះគោម​ និង បង្ហោះឆត្រយន្ត​ និងបាញ់កាំជ្រួចផងដែរ។ ឆ្លៀតក្នុងឱកាសនេះដែរ ប៉ោយប៉ែតប៉ុស្តិ៍ ក៏សូមក្រើនរំលឹក និងជម្រាបជូន ដល់ប្រជាពលរដ្ឋទូទៅទាំងអស់ដែលបានមកចូលក្នុងកម្មវិធី អុំទូក ចេញវស្សា របស់ខេត្តបាត់ដំបង សូមធ្វើការប្រុងប្រយ័ត្ន មានការទទួលខុសត្រូវអោយបានខ្ពស់ពេលធ្វើដំណើរបើកបរ ឬរក្សារបស់មានតម្លៃអោយបានខ្ជាប់ខ្ជួនគង់វង្ស និងជួយមានអនាម័យ ឬសម្អាតបរិស្ថាន កំឡុងពេលពិធីអុំទូកចេញវស្សារបស់ខេត្តបាត់ដំបង ហើយប៉ោយប៉ែតប៉ុស្ដិ៍ ក៏សូមជូនពរប្រជាពលរទូទៅទាំងអស់ដែលបានមកចូលក្នុងកម្មវិធីនេះ អោយមានដំណើរកម្សាន្តសប្បាយៗ និងមានសុវត្ថិភាពគ្រប់ៗគ្នា។ ចូលរួមការអនាម័យស្អាត នាំមកនូវភាពថ្លៃថ្នូរ ភាពស្រស់ស្អាត មានកិត្តិយស មានសុភមង្គល និងសុខភាពល្អ បំណងល្អពីប៉ោយប៉ែតប៉ុស្តិ៍៕ ដោយៈ លោក សុខ បូរី និពន្ធនាយករង គេហទំព័រ ប៉ោយប៉ែតប៉ុស្តិ៍ www.poipetpostnews.com