ខេត្តកំពត ៖ ផ្លូវឆ្ពោះទៅកាន់សាលារៀនចិន គាក ឃួន ដែលធ្លាប់តែរពិបាកក្នុងធ្វើដំណើរចេញចូលនោះ ឥឡូវត្រូវបានអាជ្ញាធរស្រុក គិតគូររៀបចំស្ថាបនាឡើងវិញ ជាផ្លូវបេតុង ថែមទាំងបានរៀបចំប្រព័ន្ធលូ ទៅតាមបទដ្ឋានបច្ចេកទេសផងដែល។ នេះបើតាមការបញ្ជាក់ ពីលោក អូន ខន អភិបាល នៃគណៈអភិបាលស្រុកកំពង់ត្រាច ក្នុងដំណើរចុះពិនិត្យស្ថានភាពផ្លូវ និងការរៀបចំប្រព័ន្ធលូ ដែលក្រុមជំនាញកំពុងអនុវត្តយ៉ាងមមាញឹក នៅព្រឹកថ្ងៃសៅរ៍ ៧កើត ខែបុស្ស ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី១២ ខែមករា ឆ្នាំ២០១៩។ លោកអភិបាលស្រុក បានអោយដឹងផងដែលថា៖ ការស្ថាបនាផ្លូវបេតុង និងការងាររៀបចំដាក់នូវប្រព័ន្ធលូ អមសងខាងផ្លូវនោះ ចាប់ពីចំណុចផ្លូវជាតិលេខ ៣៣ (ទីរួមស្រុកកំពង់ត្រាច) ចូលមកសាលារៀនចិន គាក ឃួន នេះ គឺមានប្រវែង ៥២៦ ម៉ែត្រ ស្ថិតក្នុងភូមិកំពង់ត្រាចទី១ ឃុំកំពង់ត្រាចខាងកើត ស្រុកកំពង់ត្រាច ខេត្តកំពត។ លោកអភិបាលស្រុកកំពង់ត្រាច បានបញ្ជាក់ទៀតថា៖ បន្ទាប់ពីរៀបចំនូវប្រព័ន្ធលូ រួចរាល់ហើយ ស្រុកនឹងចាប់ផ្តើមអនុវត្ត នូវគម្រោងផ្លូវក្រាលបេតុង នាពេលខាងមុខនេះតែម្តង ដើម្បីឆ្លើយតបទៅនឹងសំណូមពររបស់បងប្អូនប្រជាពលរដ្ឋ ពិសេសអ្នកដំណើរ ដែលបានស្នើឡើងក្នុងអង្គវេទិកាសាធារណៈថ្នាក់ជាតិកន្លងមក។ សូមបញ្ជាក់ថា៖ បន្ទាប់ពីរដ្ឋបាលស្រុកកំពង់ត្រាច បានជំរុញដល់ជំនាញរៀបចំជាប្រព័ន្ធលូធំៗ និងរៀបចំគម្រោងស្ថាបនាផ្លូវបេតុង ឆ្ពោះទៅកាន់សាលារៀនចិន គាក ឃួន នោះមក មហាជន ក៏ដូចជាបងប្អូនប្រជាពល រដ្ឋក្នុងតំបន់ ពិតជាមានមោទនភាព និងមានក្តីរីករាយឥតឧបមា ព្រោះកន្លងមកកំណាត់ផ្លូវមួយចំណិតនេះ ធ្លាប់មានជង្ហុគធំៗ ពិបាកធ្វើដំណើរ ទាំងរដូវប្រាំង និង វស្សា តែពេលនេះបបានស្ថាបនាឡើងវិញ ប្រជាពលរដ្ឋរស់នៅស្រុកកំពុងត្រាច ពេលនេះ ពិតជាអស់មានក្តីកង្វល់ដូចមុនទៀតហើយ៕ ដោយៈ វ៉ិត រិទ្ធ និពន្ធនាយករង គេហទំព័រ ប៉ោយប៉ែតប៉ុស្តិ៍ www.poipetpostnews.com