ខេត្តកែប៖ បុរសម្នាក់ដែលគេស្គាល់ថា៖ ជាម្ចាស់រីសត មួយកន្លែង នៅភូមិសាស្ត្រក្រុងកែប បានស្លាប់យ៉ាងតក់ក្រហល់ និងគួរឱ្យសោកស្តាយបំផុតនោះ សមត្ថកិច្ចមូលដ្ឋានបានសន្និដ្ឋានថា៖ ជនរងគ្រោះស្លាប់ដោយសារជំងឺគាំងបេះដូង ដែលហេតុការណ៍ភ្ញាក់ផ្អើលនេះ បានកើតឡើងនៅវេលាម៉ោង០៨និង៣០ នាទីព្រឹក ថ្ងៃទី១៩ខែមករា ឆ្នាំ២០១៩ ស្ថិតក្នុងរីសតរបស់ខ្លួន ក្នុងភូមិកែវក្រសាំង សង្កាត់កែប ក្រុង-ខេត្តកែប (ខាងក្រោយមន្ទីរព័ត៌មានខេត្តប្រមាណ៥០០ម៉ែត្រ)។ បុរសរងគ្រោះ ត្រូវបានគេស្គាល់ ឈ្មោះ ឈឹម ខែត ភេទប្រុស អាយុ៣៤ឆ្នាំ មុខរបរកសិករ រស់នៅរីសតខាងលើ ជនរងគ្រោះមានស្រុកកំណើតនៅខេត្តតាកែវ។ តាមប្រភពព័ត៌មានពីសមត្ថកិច្ចមូលដ្ឋានបានឱ្យដឹងថា៖ កន្លងមកបុរសរងគ្រោះតែងតែត្អូញត្អែរពីករណីជំងឺម្យ៉ាងចេះតែធ្វើទុក្ខក្នុងខ្លួន ប៉ុន្តែគ្មាននរណាចាប់អារម្មណ៍ឡើយ ដោយនឹកស្មានថាជាជំងឺធម្មតា។ លុះព្រឹកថ្ងៃកើតហេតុបុរសរងគ្រោះត្អូញថា៖ ឈឺ និងចុកដើមទ្រូង រួចសុំចូលសំងំគេងក្នុងបន្ទប់មួយភ្លែត។ ប្រភពបានបន្តថា៖ ដោយសារបុរសរងគ្រោះចូលក្នុងបន្ទប់ដេកសំងំមិនព្រមក្រោកទើបសាច់ញាតិចូលទៅដាស់ ក៏ស្រាប់តែជនរងគ្រោះឈប់ដកដង្ហើមទៅហើយ។ ភ្លាមៗនោះ បងប្អូន មិត្តភក្តិមិនអស់ចិត្ត ក៏ដឹកជនរងគ្រោះទៅមន្ទីរពេទ្យ ប៉ុន្តែខាងមន្ទីរពេទ្យប្រាប់ថា៖ បុរសរងគ្រោះបានស្លាប់បាត់ទៅហើយ ទើបដឹកសពវិលមករីសតខាងលើវិញ។ ក្រោយពីមានករណីនេះកើតឡើង សមត្ថកិច្ចជំនាញសហការជាមួយពេទ្យ ក៏បានចុះមកពិនិត្យ ធ្វើកោសល្យវិច័យ ទើបដឹងថា៖ បុរសរងគ្រោះខាងលើស្លាប់ដោយសារជំងឺគាំងបេះដូង។ បច្ចុប្បន្ន សពជនរងគ្រោះ ត្រូវបានរថយន្តសាមុយរបស់មន្ទីរពេទ្យបង្អែកខេត្តកែប រៀបចំដឹកទៅកាន់ស្រុកកំណើតដើម្បីប្រគល់ជូនក្រុមគ្រួសារ ចាត់ចែងធ្វើបុណ្យតាមប្រពៃណី៕ ដោយៈ សេង រត្ន័ និពន្ធនាយករង គេហទំព័រ ប៉ោយប៉ែតប៉ុស្តិ៍ www.poipetpostnews.com