ខេត្តស្វាយរៀង៖ សាលាដំបូងខេត្តស្វាយរៀង បានចេញដីកាបង្គាប់អោយឃុំខ្លួនអធិការរងនគរបាលក្រុងបាវិត ដាក់ពន្ធនាគារជាបណ្តោះអាសន្ន ពាក់ព័ន្ធការបាញ់ប្រហារ ស្រ្តីម្ចាស់ហាង «តន្រ្តីសំណាងអាណេ» អោយស្លាប់ ធ្វើអោយកក្រើកពេញក្រុងបាវិត នារយៈពេលប៉ុន្មានថ្ងៃនេះថ្មីៗ នេះយោងបើតាមដីការបស់ចៅក្រមស៊ើបសួរសាលាដំបូងខេត្តស្វាយរៀង ដែលអ្នកព័ត៌មាន ទទួលបាននាព្រឹកថ្ងៃទី២៣ ខែធ្នូ ឆ្នាំ២០១៩។ នៅក្នុងដីការបស់ចៅក្រម ឃុន ដាវី ឃុំខ្លួនលោក កែវ ចិត្រា អធិការរងនគរបាលរូបនេះ ត្រូវបានតំណាងអយ្យការចោទប្រកាន់ពីបទ «ឃាតកម្ម និងកាន់កាប់អាវុធដោយគ្មានការអនុញ្ញាត»។ ម្ចាស់ហាង «តន្រ្តីសំណាងអាណេ» សឿន ស្រីណេ អាយុ៣៨ឆ្នាំ ជាស្រ្តីមេម៉ាយម្នាក់ មានស្រុកកំណើតភូមិក្រាំងអាត ឃុំកំពង់សិលា ស្រុកកំពង់សិលា ខេត្តព្រះសីហនុ ប៉ុន្តែនាងបានទៅបើកហាងរកស៊ី នៅក្រុងបាវិត ប៉ុន្មានឆ្នាំមកហើយ។ គួរបញ្ជាក់ផងដែរថា៖ ដោយសារតែស្ថានភាពរបួសធ្ងន់ធ្ងរពេក នៅវេលាថ្ងៃត្រង់ ថ្ងៃទី២១ ខែធ្នូ ឆ្នាំ២០១៩ ស្ដ្រីរងគ្រោះបានស្លាប់បាត់បង់ជីវិតនៅមន្ទីរពេទ្យប្រទេសវៀតណាម។ ស្រ្តីរងគ្រោះត្រូវបានអធិការរងនគរបាលក្រុងបាវិត កែវ ចិត្រា គឺជាអ្នកបាញ់អោយស្លាប់ក្រោយរបួសធ្ងន់ពេក។ ហើយជនដៃដល់ជាកូនប្រុសរបស់លោកអធិការនគរបាលក្រុងបាវិត កែវ គង់ ដែលទើបឡើងតួនាទីបានមួយសប្តាហ៍នោះទេ។ អធិការរងក្រុងបាវិតឈ្មោះ កែវ ចិត្រា អាយុជិត៣០ឆ្នាំ ដែលជាកូនប្រុសបង្កើតអធិការនគរបាលក្រុងបាវិត លោក កែវ គង់ បានដកកាំភ្លើងបាញ់ចំនួន ២គ្រាប់ ដោយមួយគ្រាប់បាញ់ឡើងលើ និងមួយគ្រាប់ទៀតបាញ់ចំស្ត្រីជាម្ចាស់ហាងអោយរងរបួសា្លប់។ ករណីនេះបានកើតឡើងនៅក្នុង ហាងភោជនីយដ្ឋាន (តន្ត្រីសំណាងអាណេ) ក្នុងភូមិតាពៅ សង្កាត់បាវិត ក្រុងបាវិត ខេត្តស្វាយរៀង។ បើតាមបុគ្គលិកបម្រើការងារហាង(តន្ត្រីសំណាងដាណេ) បានអោយដឹងថា នៅមុនពេលកើតហេតុមានបុរសម្នាក់ បានចូលមកក្នុងហាងនៅកញ្ចុះលេខ៦៦៦៦ ហើយកម្ម៉ង់មីស្រុះមួយចាន បន្ទាប់មកទៀតបានប្រាប់បុគ្គលិកអោយហៅម្ចាស់ហាងមកជួបស្រាប់ តែបុរសនោះបានដកកាំភ្លើងបាញ់ឡើងលើមួយគ្រាប់ និងមួយគ្រាប់ទៀតបាញ់តម្រង់ក្បាលស្ត្រីរងគ្រោះតែម្តង បណ្តាលអោយរងរបួសធ្ងន់ ត្រូវបានសាច់ញាតិ និងភ្ញៀវជួយលើកជនរងគ្រោះ ទៅសង្គ្រោះបន្ទាន់នៅប្រទេសវៀតណាម។ បន្ទាប់ពីធ្វើសកម្មភាពបាញ់ប្រហាររួច បុរសដែលឃាតក បានដើរចេញពីហាងគេចខ្លួនបាត់ តែត្រូវបានឃាត់ខ្លួននៅពេលបន្ទាប់មក។ លោកឧត្តមសេនីយ៍ស្នងការបានបញ្ជាក់ថា មូលហេតុដែលនាំអោយមានការបាញ់ប្រហារនេះ ដោយសារជនដៃដល់ខឹងម្ចាស់ហាងយកម្ហូបមកយឺតពេក។ ក្រោយការបាញ់ប្រហារជនដៃដល់ កែវ ចិត្រា ត្រូវបានសមត្ថកិច្ចឃាត់ខ្លួនភ្លាមៗ។ អធិការរងនគរបាលរូបនេះ ត្រូវបានគេរាយការណ៍ថា ទើបតែត្រូវបានប្រកាសអោយចូលកាន់តំណែងតែប៉ុន្មានថ្ងៃមកនេះទេ។ នៅអធិការដ្ឋាននគរបាលក្រុងបាវិត ក៏ត្រូវបានសមត្ថកិច្ចមូលដ្ឋានមួយចំនួន លួចបង្ហើបថា ម្នាក់ៗមិនពេញចិត្តនឹងការដឹកនាំរបស់អធិការក្រុង កែវ គង់ នោះឡើយ ប៉ុន្តែមិនហ៊ានប្តឹងមកថ្នាក់លើចេះតែទ្រាំទៅ។ ជនសង្ស័យខាងលើនេះ ត្រូវបានអ្នកក្រុងបាវិតមួយចំនួន ស្គាល់ថា ជាមនុស្សមានចរឹកមិនល្អ និងធ្លាប់ជាក្មេងទំនើង ស្រាប់តែមានសំណាងបានធ្វើជាអធិការរងនគរបាលក្រុង ក្រោមការជួយជ្រោងជ្រែងពីឪពុក របស់ខ្លួន៕ ដោយៈ សេង រត្ន័ និពន្ធនាយករង គេហទំព័រ ប៉ោយប៉ែតប៉ុស្តិ៍ www.poipetpostnews.com