ខេត្តឧត្តរមានជ័យ៖ លោកឧត្តមសេនីយ៍ទោ អ៊ុក គឹមលី នាយករងទីចាត់ការ ការងារព្រំដែនអគ្គបញ្ជការ បានថ្លែងប្រាប់សារព័ត៌មានយើងខ្ញុំអោយដឹងនៅថ្ងៃទី៣០ ខែធ្នូ ឆ្នាំ២០១៩ នេះថា៖ បើសិនជាលោករំលោភយកដីធ្លីប្រជាពលរដ្ឋ៨៧គ្រួសារដូចការចោទប្រកាន់របស់ពលរដ្ឋមែន លោកហ៊ានប្រឈមមុខនិងផ្លូវច្បាប់។ យោងតាមការឆ្លើយបំភ្លឺរបស់លោកឧត្តមសេនីយ៍ទោ អ៊ុក គឹមលី នៅរសៀលថ្ងៃនេះ បន្ទាប់ពីលោក វ៉ាន់ ចំរើន តំណាង ប្រជាពលរដ្ឋរស់នៅភូមិជើងភ្នំ ឃុំត្រពាំងប្រីយ៍ ស្រុកអន្លង់វែង ខេត្តឧត្តរមានជយ័ លើកគ្នាមកសុំការអន្តរាគមន៍ពីអាជ្ញាធរ ខេត្តឧត្តរមានជយ័ អោយជួយដោះស្រាយបញ្ហាទំនាសដីធ្លី ហើយបានចោទប្រកាន់ថារូបលោកជាអ្នករំលោភយកដីរបស់ពួកគាត់ កាលពីថ្ងៃទី២៧ ខែធ្នូឆ្នាំ២០១៩ កន្លងទៅថ្មីៗនេះ។ លោកឧត្តមសេនីយ៍ទោ អ៊ុក គឹមលី បានថ្លែងអោយដឹងទៀតថា៖ លោកគ្មានឈ្មោះពាក់ពន្ធ័និងរឿងដីធ្លីទាំងនេះទេ បងប្អូនប្រជាពលរដ្ឋអាចទៅសួរនាំអាជ្ញាធរមូលដ្ឋានភូមិ ឃុំ ស្រុកអោយដឹងរឿងច្បាស់សិន មុននឹងធ្វើការចោទប្រកាន់មកលើរូបលោក។ ជាមួយគ្នានោះលោកថែមទាំងបានគូសបញ្ជាក់ដោយចម្ងល់សួរទៅប្រជាពលរដ្ឋវិញថា តើចំនុចត្រង់ណាដែលថាលោករំលោភយកដីធ្លីនោះ? លោកបន្តថា គួរសិក្សាពីសាវតាអោយច្បាស់សិន មិនមែនចេះតែស្រែកចោទប្រកាន់លោកនោះទេ។ លោកបញ្ជាក់ថា តាមពិតរឿងនេះគឺជារឿងរបស់តុលាការទេ ដែលបានចេញដីការអោយលោក វ៉ាន់ ចំរើន គាត់ចូលបំភ្លឺ ហើយលោកក៏មិនបានប្តឹងដែរ មូលហេតុអី ក៏មកចោទប្រកាន់រូបលោកដូច្នេះទៅវិញ។ សូមបញ្ជាក់ថា៖ កាលពីថ្ងៃទី២៧ ខែធ្នូ ឆ្នាំ២០១៩ ថ្មីៗនេះ តុលាការបានកោះហៅលោក វ៉ាន់ ចំរើន មកបំភ្លឺបែជាលោក វ៉ាន់ ចំរើន បានលើកគ្នាមកសាលាខេត្តឧត្តរមានជ័យវិញ ដើម្បីសុំការអន្តរាគមន៍ពីអាជ្ញាធរខេត្តអោយជួយដោះស្រាយរឿងទំនាស់ដីធ្លីទៅវិញ។ ទាក់ទងនិងករណីខាងលើនេះ លោក ឃិន ញ៉ាណអភិបាលរងខេត្តឧត្តរមានជ័យ បានថ្លែងប្រាប់នៅរសៀលនេះអោយដឹងថា៖ អាជ្ញាធរខេត្តនិងត្រៀមពិនិត្យដោះស្រាយជាមួយប្រជាពលរដ្ឋ ហើយលោកក៏បានធ្វើការណែនាំអោយប្រជាពលរដ្ឋ ត្រូវធ្វើលិខិតជាលាយលក្ខ័អក្សរដាក់ជូនរដ្ឋបាលខេត្ត ដើម្បីអោយខេត្តមានភាពងាយស្រួលក្នុងការដោះស្រាយជូន៕ ពីខ្ញុំ ជួង វណ្ណអាង ចាងហ្វាងការផ្សាយ គេហទំព័រ ប៉ោយប៉ែតប៉ុស្តិ៍ www.poipetpostnews.com