ខេត្តមណ្ឌលគិរី ៖តាមប្រភពពីប្រជាសហគមន៍ជនជាតិដើមភាគតិចនិងសកម្មជនការពារព្រៃឈើខេត្តមណ្ឌលគិរី បានឲ្យដឹងថា បច្ចុប្បន្ននេះសកម្មភាពដឹកជញ្ជូនឈើប្រណិតខុសច្បាប់ ចេញទៅកាន់ប្រទេសយួន តាមច្រកទ្វេភាគីដាក់ដាំ បានកើតមានពេញបន្ទុក និងមានសកម្មភាពអនាធិបតេយ្យបំផុត។ ពោលគឺយ៉ាងហោច ក្នុង១ថ្ងៃៗ គេសង្កេតឃើញមានរថយន្តប្រភេទសាំយ៉ុងរាប់សិបគ្រឿង បានដឹកឈើប្រណិតខុសច្បាប់ ចេញពីស្រុកកោះញែក និងស្រុកពេជ្រាដា ដោយបើកឆ្លងដែន ទៅកាន់ប្រទេសយួន តាមច្រកដាក់ដាំ ក្រោមការគ្រប់គ្រង របស់ លោក យូ សុធា នាយប៉ុស្តិ៏ដាក់ដាំ។ យោងតាមសេចក្ដីរាយការណ៍បានឱ្យដឹងថា កាលពីថ្ងៃទី១៦-១៨ ខែមករា ឆ្នាំ២០១៩នេះថា ឈ្មួញសម្រុកដឹកជញ្ជូនឈើខុសច្បាប់ ទៅលក់នៅប្រទេសវៀតណាមយ៉ាងគគ្រឹកគគ្រេងជារៀងរាល់យប់ តាមច្រកដាក់ដាំបានដោយសេរី ដោយពុំមានសមត្ថកិច្ច ឬ ស្ថាប័នជំនាញណាហ៊ានធ្វើការបង្ក្រាបឬទប់ស្កាត់នោះឡើយ ។ បើយោងតាមប្រភពពីប្រជាពលរដ្ឋដែលរស់ ស្រុកកោះញែក បានអោយដឹងថា ជារៀងរាល់់ថ្ងៃ គេសង្កេតឃើញ ថា មានរថយន្តសាំយ៉ុងជាច្រើនគ្រឿង ថែមទាំងមានស្លាកលេខ ភ្នំពេញ ២AB.១៦២០ ដូចៗគ្នា មកដឹកឈើ ប្រភេទស្រឡៅ ឈើសុក្រុំ កកោះ ចេញពីស្រុកកោះញែក ពូជ្រៃនិងស្រុកពេជ្រចិន្តា នឹងបន្តទៅលក់នៅប្រទេសយួន តាមច្រកដាក់ដាំ ។ តាមប្រភពដដែលបានបន្តទៀតថា បទល្មើសព្រៃឈើនៅក្នុងខេត្តមណ្ឌលគិរីបានកក្រើកឡើងវិញ ដោយរលូនគឺអាចនិងមានការឃុបឃិតគ្នាជាលក្ខណៈប្រព័ន្ធ ផងដែរ។ តាមសេចក្តីរាយការណ៍ឲ្យដឹងថាជំនួញឈើប្រណីតដឹកតាមរថយន្តសាំយ៉ុងជាច្រើនគ្រឿងទាំងយប់បែបនេះបានកំរើកឡើងវិញហើយតាមច្រកទ្វារ ទ្វេភាគីអន្តរជាតិ ដាក់ដាំដែលគ្មានមន្ត្រីជំនាញនិងស្នាក់ការច្រកទ្វារអើពើបន្តិចសោះឡើយ? ។ ថ្មីនេះ គេបានប្រទះឃើញមានរថយន្តសាំយ៉ុង ចំនួនជាង២០-៣០គ្រឿងដែលមានមេខ្លោងឈ្មោះម៉ាប់ជាឈ្មួញឈើដ៏ធំប្រចាំខេត្តមណ្ឌលគិរីកំពុងតែចរាចរលើផ្លូវជាតិឆ្ពោះទៅកាន់ច្រកទ្វារទ្វេភាគីអន្តរជាតិដាក់ដាំដែលមេការម្នាក់ឈ្មោះសឿនជាកាសែតអ្នកត្បាញខាងរត់ការបិទមាត់សមត្ថកិច្ចនិងអ្នកកាសែតមួយចំនួនមិនឲ្យធើ្វការចុះផ្សាយនិងបង្រ្កាប។ គួររំលឹកថាកាលពីពេលថ្មីៗនេះ អាជ្ញាធរស្ថាប័នពាក់ព័ន្ធ នៃរដ្ឋបាលខេត្តមណ្ឌលគិរី បានបើកកិច្ចប្រជុំជាបន្ទាន់មួយ ដើម្បីដាក់ចេញផែនការណ៍បង្ក្រាប និងទប់ស្កាត់បទល្មើសព្រៃឈើប្រកបដោយប្រសិទ្ធភាព។ កិច្ចប្រជុំនេះ ធ្វើឡើងស្របពេលបទល្មើសព្រៃឈើ នៅមូលដ្ឋានខេត្តមណ្ឌលគិរី កំពុងបន្តធ្វើសកម្មភាពដឹកជញ្ជូនតាមរថយន្តជារៀងរាល់ថ្ងៃយ៉ាងអនាធិបតេយ្យ។ ជាពិសេសនៅពេលយប់ ដោយគ្មានសមត្ថកិច្ចស្ថាប័នពាក់ព័ន្ធផ្នែកណាមួយចេញមុខបង្ក្រាប ឲ្យមានប្រសិទ្ធភាពទេ។ ទាក់ទិនបញ្ហាខាងលើនេះ សកម្មជនព្រៃឈើប្រចាំខេត្តមណ្ឌលគិរី និងប្រជាសហគមន៍ក្នុងមូលដ្ឋាននេះ បានកត់សម្គាល់ថា បទបញ្ជា ឬវិធានការ របស់អាជ្ញាធរខេត្តមណ្ឌលគិរី ដែលបានដាក់ចេញក្នុងកិច្ចប្រជុំកន្លងមក គឺបានក្លាយទៅជារឿងឥតន័យ ព្រោះពួកគាត់សង្កេតឃើញថា រាល់ថ្ងៃនេះ បទល្មើសព្រៃឈើនៅខេត្តមណ្ឌលគិរី នៅតែបន្តកើតមានដដែល ជាពិសេសការត់ពន្ធឈើខុសច្បាប់ចេញតាមច្រកដាក់ដាំ ក្នុងទឹកដីស្រុកអូររាំង ខេត្តមណ្ឌលគិរីតែម្តង។ ទាក់ទិនបញ្ហានេះដែរ ប្រជាសហគមន៍ជនជាតិដើមភាគតិច ក៏បានចោទ លោកឧត្តមសេនីយ៍ទោ ឡោ សុខា ស្នងការនគរបាលខេត្តមណ្ឌលគិរី ថាអសកម្មក្នុងការងារ ដោយមិនឃើញចាត់កម្លាំងសមត្ថកិច្ច ដើម្បីចុះមានវិធានការបង្ក្រាបបទល្មើសព្រៃឈើ ដែលកំពុងកើតឡើងយ៉ាងគំហុកក្នុងមូលដ្ឋាននេះទេ។ ផ្ទុយទៅវិញ ពលរដ្ឋចោទថា មានមន្ត្រីនគរបាលនៃស្នងការដ្ឋាននគរបាលខេត្តមណ្ឌលគិរី មានឋានៈខ្ពស់មួយចំនួន ក៏មានជាប់ពាក់ព័ន្ធ សកម្មភាពដឹកជញ្ជូនឈើខុសច្បាប់ ចេញទៅកាន់ប្រទេសចៀតណាមខាងលើនេះផងដែរ។ ផ្តើមពីបញ្ហាទាំងនេះហើយ ទើបធ្វើឲ្យប្រជាពលរដ្ឋ និងមន្ត្រីអង្គការក្រៅរដ្ឋាភិបាលឃ្លាំមើលបរិស្ថាន ក៏ដូចជាមជ្ឈដ្ឋាននានាមួយចំនួន នៅខេត្តមណ្ឌលគិរី បានរិះគន់ និងអស់ជំនឿទៅលើការដឹកនាំ របស់ លោក ស្វាយ សំអ៊ាង អភិបាលខេត្តមណ្ឌលគិរី ដែលអសកម្មភាពក្នុងសកម្មភាព ចុះទប់ស្កាត់បទល្មើសព្រៃឈើ ដែលកំពុងធ្វើសកម្មភាពយ៉ាងអនាធិបតេយ្យនៅក្នុងមូលដ្ឋាននេះ។ ត្រង់ចំណុចនេះ សម្រាប់ប្រជាពលរដ្ឋ រស់នៅខេត្តមណ្ឌលគិរី ក៏បានអំពាវនាវដល់ សម្តេចក្រឡាហោម ស ខេង ឧបនាយករដ្ឋមន្ត្រីរដ្ឋមន្ត្រី និងជារដ្ឋមន្ត្រីក្រសួងមហាផ្ទៃ។ ជាពិសេស សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ឲ្យពិចារណាជាថ្មីថា គួររក្សាទុកតំណែង របស់លោក ស្វាយ សំអ៊ាង ឲ្យនៅជាអភិបាលខេត្តណ្ឌលគិរីដដែលឬក៏ត្រូវផ្លាស់ប្តូរចេញ។ ជាងនេះទៀត ចំពោះតំណែង របស់ លោកឧត្តមសេនីយ៍ទោ ឡោ សុខា ស្នងការដ្ឋាននគរបាលខេត្តមណ្ឌលគិរី និងតំណែង របស់លោកមេបញ្ជាការកងរាជអាវុធហត្ថខេត្តមណ្ឌលគិរី តើគួរឲ្យបន្តសកម្មភាពដឹកនាំ នៅមូលដ្ឋានខេត្តមណ្ឌលគិរីជាបន្តទៀត ឬក៏ត្រូវពិចារណាផ្លាស់ប្តូរតំណែងចេញពីខេត្តនេះ ព្រោះបទល្មើសព្រៃឈើបានធ្វើសកម្មភាពពេញបន្ទុក នៅជាប់ច្រមុះ និងធ្វើសកម្មភាពបើកឆ្លងកាត់កន្លែងធ្វើការរាល់ថ្ងៃ ។ ប៉ុន្តែបែរជាថ្នាក់ដឹកនាំរដ្ឋបាលខេត្តមណ្ឌលគិរី និងថ្នាក់ដឹកនាំស្ថាប័នកងកម្លាំងប្រដាប់អាវុធទាំងនគរបាល និងកងរាជអាវុធហត្ថខេត្តមណ្ឌលគិរី ធ្វើព្រងើយហាក់ដូចជា មិនដឹងរឿងអ្វីសោះ ដោយមិនឃើញបញ្ចេញកម្លាំង ចុះចាត់វិធានការចុះបង្ក្រាបបទល្មើសព្រៃឈើខុសច្បាប់ទាំងនោះ ឲ្យមានប្រសិទ្ធភាពនោះទេ។ ទោះជាមានករណី រិះគន់ទៅលើអាជ្ញាធរខេត្តមណ្ឌលគិរីក៏ដោយ នៅល្ងាចថ្ងៃទី២២ខែមករាអង្គភាពយើងមិនអាចទាក់ទងបានទេពីលោក ស្វាយ សំអ៊ាង អភិបាលខេត្តមណ្ឌលគិរី តើគាត់មានវិធានការបង្ក្រាប ក្នុងនាមជាគណៈបញ្ជាការឯកភាពខេត្ត ឬក៏បានពាក់ព័ន្ធនឹងផលប្រយោជន៍ទាំងនេះ? ។ ថ្នាក់លើគួរតែមានវិធានការ ទប់ស្កាត់បទល្មើសព្រៃឈើដែលត្រៀមដឹកទៅប្រទេសវៀតណាមតាមច្រកដាក់ដាំនេះផង ខណៈអ្នកមានតួនាទីបង្ក្រាប ទទួលកញ្ចប់គេអស់ហើយ។ សមត្ថកិច្ច និងអាជ្ញាធរជំនាញនៅក្នុងខេត្តមណ្ឌលគិរី មិនឲ្យចេញមុខ ព្រោះជាមុខសញ្ញាប្រព្រឹត្តបទល្មើសព្រៃឈើ ដែលមានឈ្មោះអសោចិ៍ ទើបគេឲ្យមនុស្សផ្សេងជាអ្នកមកចេញមុខរត់ការ ឲ្យតំណាងជាម្ចាស់ឈើ ដើម្បីឲ្យឈើទាំងនោះឆ្លងទៅប្រទេសយួនតាមច្រកដាក់ដាំ ដូចអ្វីដែលពួកគេរំពឹងគិត ថានឹងអូសឈើទាំងនោះទៅឲ្យយួនបាន ដូចអ្វីដែលពួកគេបានយកលុយមករត់ការនេះ។ គួរបញ្ជាក់ថានរណា!នរណា!ក៏គេដឹងដែរថាសម្ដេចក្រឡាហោមបានព្រមាននិងបញ្ជាឲ្យអភិបាលខេត្តមណ្ឌលគីរី លោក ស្វាយ សំអ៊ាង ត្រូវដោះស្រាយ និងការពារព្រៃឈើ ដើម្បីកុំឲ្យកាប់បន្ដទៀត ហើយបើធ្វើមិនបានទេ ពិតជាមានរឿងធំកើតឡើង ជាមិនខានឡើយ។ សម្ដេច ស ខេង ក៏ជំរុញ ឲ្យឆាប់ធ្វើវិសោនកម្មច្បាប់ គ្រប់គ្រងព្រៃឈើឡើងវិញ ដើម្បីផ្ដល់អំណាច ដល់អាជ្ញាធរដែនដី សមត្ថកិច្ចរួមគ្នាទប់ស្កាត់ ការពារព្រៃឈើ ។ សម្ដេចបានបញ្ជាក់ដែរថា បច្ចុប្បន្នច្បាប់ការពារព្រៃឈើ ពុំបានផ្ដល់អំណាចដល់អាជ្ញាធរ និងសមត្ថកិច្ចដែនដី ដែលបានធ្វើឲ្យជនខិលខូចមួយចំនួន កាប់ឈើខុសច្បាប់ នាំចេញជាបន្តបន្ទាប់ ធ្វើឲ្យមានផលប៉ះពាល់ ដល់បរិស្ថាន និងធនធានធម្មជាតិ។ សម្ដេចបានបញ្ជាក់បន្តថា “ក្នុងអាណត្តិរាជរដ្ឋាភិបាលថ្មីនេះ។ សម្ដេចនឹងជំរុញ ការកែប្រែច្បាប់នេះជាចាំបាច់ ដើម្បីផ្ដល់អំណាច ដល់អាជ្ញាធរដែនដីសមត្ថកិច្ច ដើម្បីរួមគ្នាទប់ស្កាត់ ការពារព្រៃឈើ របស់ប្រទេសកម្ពុជា”។ បើតាមប្រកាស របស់ក្រសួងមហាផ្ទៃចុះថ្ងៃទី២៦ ខែកញ្ញា ឆ្នាំ២០១៨ បោះត្រានិងចុះហត្ថលេខា ដោយសម្តេច ស ខេង បានសម្រេចផ្លាស់ប្តូរ មន្រ្តីរាជការចំនួន៥រូប ជាប្រធានទីស្នាក់ការ ត្រួតពិនិត្យច្រកទ្វារព្រំដែន នៅខេត្តត្បូងឃ្មុំ ដូចជា ១៖ លោក ឯម បញ្ញារិទ្ធ ប្រធានច្រកទ្វារដារ ឲ្យទៅនៅកន្លែងដើមវិញ , ២ ៖ លោក សុន ស ប្រធានច្រកទ្វារចាន់មូល ឲ្យទៅនៅកន្លែងដើមវិញ , ៣៖ លោក ហ៊េង សុភី ប្រធានច្រកទ្វារដូនរត្ន័ ឲ្យទៅនៅអង្គភាពដើមវិញ , ៤៖លោ វ៉ា ចាន់នឿន ប្រធានច្រទ្វារទន្លេចាម ឲ្យទៅនៅកន្លែងដើមវិញ និង៥៖លោក កែវ សុខា ប្រធានច្រកទ្វារទន្លូងផ្ទេរ ទៅកាន់ប្រធាន ច្រកទ្វារទន្លេចាមវិញ។ ការដកដំណែងប្រធានច្រកទ្វារ ទាំងមិនទាន់ចប់អាណត្តិបែបនេះ ត្រូវបានគេកត់សម្គាល់ថា ដោយសារពួកគេគ្មានសមត្ថភាព គ្រប់គ្រងតាមច្រកនីមួយៗ ឲ្យមានប្រសិទ្ធភាព ព្រោះពួកគេតែងតែឃុបឃិត ជាមួយឈ្មួញទុច្ចរិត រកស៊ីឈើខុសច្បាប់ឲ្យដឹកឈើ ឆ្លងទៅប្រទេសយួន ស្ទើររៀងរាល់ថ្ងៃ ដើម្បីប្រយោជន៍ផ្ទាល់ខ្លួន។ ជាមួយគ្នានេះដែរ រដ្ឋមន្រ្តីក្រសួងមហាផ្ទៃ ស្នើអភិបាលខេត្ត តំបន់ភូមិភាគឦសានចំនួន៣ ខេត្ត រួមមាន៖ ខេត្តរតនគិរី មណ្ឌលគិរី និងស្ទឹងត្រែង ត្រូវចាត់វិធានការទប់ស្កាត់ និងបង្រ្កាបបទល្មើសព្រៃឈើ ឲ្យបានទាន់ពេលវេលា និងមានប្រសិទ្ធភាព រួចធ្វើរបាយការណ៍ អំពីលទ្ធផលដែលសម្រេច បានមកក្រសួង ។ជាលទ្ធផលលោក ស្វាយ សំអ៊ាង អភិបាលខេត្តមណ្ឌលគិរីក៏បានដឹកនាំកិច្ចប្រជុំបូកសរុបការងារទប់ស្កាត់និងបង្ក្រាបបទល្មើសព្រៃឈើឆមាសទី២ នៅសាលប្រជុំសាលាខេត្តមណ្ឌលគិរី កាលពីថ្ងៃទី០៤ ខែមករា ឆ្នាំ២០១៩។ នៅក្នុងកិច្ចប្រជុំនោះមានការចូលរួមពីថ្នាក់ដឹកនាំមន្ទីរអង្គភាពពាក់ព័ន្ធ កងកម្លាំងប្រដាប់អាវុធទាំង៣ប្រភេទ គឺនគរបាល អាវុធហត្ថ យោធា និងប្រធានស្នាក់ការច្រកព្រំដែនទ្វេភាគីទាំង៣កន្លែងផងដែរ។ លោក ស្វាយ សំអ៊ាង ប្រធានគណៈបញ្ជាការឯកភាពខេត្ត បានមានប្រសាសន៍ថា កិច្ចប្រជុំនេះ មានសារៈសំខាន់ ដើម្បីត្រួតពិនិត្យពង្រឹងវិធានការ ក្នុងការទប់ស្កាត់ បង្ក្រាបបទល្មើសធនធានធម្មជាតិព្រៃឈើ និងបញ្ហាការគ្រប់គ្រងដីធ្លី ។ លោកបន្ថែមថា ចំពោះការបង្ការ បង្ក្រាប ទប់ស្កាត់បទល្មើសធនធានធម្មជាតិព្រៃឈើនេះ កន្លងមកគណៈបញ្ជាការឯកភាពខេត្ត តែងតែបានដាក់បទបញ្ជា និងណែនាំទៅដល់មន្ត្រីជំនាញពាក់ព័ន្ធនានាឲ្យយកចិត្តទុកដាក់ទៅលើការបង្ការ ទប់ស្កាត់ និងបង្ក្រាបបទល្មើសព្រៃឈើ ហើយការបង្រ្កាបបទល្មើសព្រៃឈើនេះ មិនមែនត្រឹមតែដាក់បញ្ជានោះទេ រហូតដល់ចេញលិខិតសេចក្តីសម្រេចចាត់តាំង បង្កើតក្រុមការងារ គណៈកម្មាការត្រួតពិនិត្យឃ្លាំងមើល ស្រាវជ្រាវ និងគណៈកម្មាការទទួលខុសត្រូវតាមទីតាំងគ្រប់ច្រកទ្វេរភាគីទាំងអស់ ដើម្បីបង្ក្រាប ទប់ស្កាត់បទល្មើសព្រៃឈើ និង ការកាប់ទន្ទ្រាន់យកដីជាដើម ។ លោកប្រធានគណៈបញ្ជាការឯកភាពខេត្ត បានណែនាំ និងជម្រុញបន្ថែមដល់មន្ទីរអង្គភាពជំនាញ និងអង្គការជាដៃគូ ត្រូវចូលរួមចំណែកក្នុងការឃ្លាំមើល បទល្មើសព្រៃឈើ និងការកាប់ទន្ទ្រាន់យកដីខុសច្បាប់ ហើយត្រូវសហការជាមួយអាជ្ញាធរមានសមត្ថកិច្ច ដើម្បីធ្វើការចុះបង្ក្រាបបទល្មើសទាំងនោះឱ្យបានទាន់ពេលវេលា។គួររំលឹកផងដែរថាកាលពីពេលកន្លងមក ទីកន្លែងតំបន់ អូរហ៊ុច បានកើតករណីជួញដូរបទល្មើសឈើប្រណិតជាច្រើនករណី រហូតដល់ជាប់ពាក់ព័ន្ធជាមួយមន្ត្រីតូចធំ នៅក្នុងខេត្តមណ្ឌលគិរី ដូចសម្លកំពឹស។ មិនតែប៉ុណ្ណោះ អូរហ៊ុច ក៏ជាកន្លែងកកើតបទល្មើសព្រៃឈើមិនចេះរីងស្ងួតផងដែរ។ រហូតដល់ក្រុមអ្នកពាក់ព័ន្ធបទល្មើសព្រៃឈើហ៊ានសម្លាប់មន្ត្រីអាវុធហត្ថលើផ្ទៃប្រទេស និងមន្ត្រីបរិស្ថានឲ្យបាត់បង់ជីវិតចំនួន ២នាក់កាលពីពេលថ្មីៗកន្លងទៅនេះទៀតផង៕ ពីខ្ញុំ ជួង វណ្ណអាង ចាងហ្វាការផ្សាយ គេហទំព័រ ប៉ោយប៉ែតប៉ុស្តិ៍ www.poipetpostnews.com
ព័ត៌មានគួរចាប់អារម្មណ៍
សហព័ន្ធស្វីស បន្តគាំទ្រកំណែទម្រង់វិមជ្ឈការនៅកម្ពុជា និងគម្រោងបណ្ដុះបណ្ដាលពង្រឹងសមត្ថភាពមន្ត្រីក្រសួងមហាផ្ទៃ (គេហទំព័រ ប៉ោយប៉ែត ប៉ុស្តិ៍)
ព្រឹត្តិការណ៍សម្តែងក្បាច់គុនល្បុក្កតោ-ក្បាច់គុនសៅលីញ រួមគ្នា នៅមុខប្រាសាទបាយ័ន២៤មេសា.! (គេហទំព័រ ប៉ោយប៉ែត ប៉ុស្តិ៍)
ឯកឧត្តមអភិសន្តិបណ្ឌិត ស សុខា បន្តដឹកនាំគណៈប្រតិភូ ស្ដាប់បទបង្ហាញពាក់ព័ន្ធវិស័យសុវត្ថិភាពនិងសណ្ដាប់ធ្នាប់សាធារណៈ (គេហទំព័រ ប៉ោយប៉ែត ប៉ុស្តិ៍)
ឯកឧត្តមអភិសន្តិបណ្ឌិត ស សុខា និងប្រតិភូ អញ្ជើញស្តាប់បទបង្ហាញពាក់ព័ន្ធនឹងហិរញ្ញវត្ថុសាធារណៈ និងយន្តការជាក់ស្តែងនៃលទ្ធិប្រជាធិបតេយ្យដោយផ្ទាល់ (គេហទំព័រ ប៉ោយប៉ែត ប៉ុស្តិ៍)
ឯកឧត្តមអភិសន្តិបណ្ឌិត ស សុខា និងលោកជំទាវ ដឹកនាំគណៈប្រតិភូជាន់ខ្ពស់ បំពេញទស្សនកិច្ចនៅប្រទេសស្វីស និងប្រទេសអាល្លឺម៉ង់ (គេហទំព័រ ប៉ោយប៉ែត ប៉ុស្តិ៍)
វីដែអូ
ចំនួនអ្នកទស្សនា