ខេត្តកែប ៖ បើទោះជាផ្សារដំណាក់ចង្អើរ ត្រូវបានសាងសង់រួចរាល់ជាស្ថាពរ និងតម្រូវឲ្យក្រុមអាជីវករចូលលក់ដូរតាមតូបបែបណាក្តី គេនៅតែសង្កេតឃើញអ្នកលក់ដូរមួយភាគតូច នៅតែបន្តសម្រុកមកលក់ដូរនៅផ្នែកចិញ្ចើមផ្លូវដូចមុនដដែល ហើយការយកចិញ្ចើមផ្លូវជាកន្លែងលក់ទំនិញបែបនេះធ្វើឲ្យចំណុចខាងលើមានឧបសគ្គក្នុងពេលធ្វើដំណើរទៅមក។ ចំពោះមូលហេតុធ្វើឲ្យក្រុមអាជីវករក្រាញននៀលមិនព្រមយកទំនិញទៅដាក់លក់នៅតាមតូចក្នុងផ្សារនោះ ត្រូវបានគេអះអាងថា មកពីក្រុមអាជីវករមួយផ្នែកតូចមិនសូវសំបូរធនធាន គឺភាគច្រើនអ្នកលក់ដូរតាមកញ្រ្ចែងនិងមួយចំនួនលក់បន្លែ ត្រីសាច់ ឬលក់គ្រឿងទេសក្នុងទ្រង់ទ្រាយតូចតាចជាដើម។ ជាមួយនេះ បើតាមការលើកឡើងពីសំណាក់អាជីវករជាអ្នកលក់បន្លែ ត្រីសាច់ និងផ្លែឈើ បាននាំគ្នានិយាយថា តាមពិតទៅអ្នកគ្រប់គ្រងផ្សារខាងលើបានជំរុញឲ្យពួកគាត់ចូលទៅលក់ដូរនៅតាមតូបឬស្តង់ដែលបានសាងសង់មានរបៀបរៀបរយរួចជាស្រេច ប៉ុន្តែពួកគាត់មិនអាចធ្វើទៅរួចព្រោះថា អាជីវករខ្លះលក់ដូរទំនិញកំបិុកកំប៉ុក បើយកប្រាក់ទៅបង់ថ្លៃតូបគឺរត់មិនរួចទេ។ម្យ៉ាងទៀត ការលក់បន្លែ ត្រីសាច់នៅក្នុងផ្សារក៏លក់មិនដាច់ ដូចលក់នៅក្បែរដងផ្លូវដែរ។ម្លោះហើយចេះតែនាំគ្នាអង្គុយក្បែរចិញ្ចើមផ្លូវលក់តាមទម្លាប់ទៅចុះ បើអាជ្ញាធរដេញចាំគិតទៀត។ ទោះជាយ៉ាងណា ការយកចិញ្ចើមផ្លូវធ្វើជាកន្លែងលក់ដូរ មិនត្រឹមតែធ្វើឲ្យកកស្ទះចរាចរដល់អ្នកដំណើរនោះទេ គឺថែមទាំងធ្វើឲ្យបាត់បង់សោភ័ណភាពរបស់ទីប្រជុំជនផ្សាររបស់យើងផងដែរ។ សូមជម្រាបថា ផ្សារដំណាក់ចង្អើរ ស្ថិតក្នុងភូមិដំណាក់ចង្អើរ សង្កាត់ព្រៃធំ ក្រុងកែប ខេត្តកែប ត្រូវបានបើកឲ្យដំណើរការជិត២ខែមកហើយ ប៉ុន្តែរហូតមកដល់ពេលនេះ ក្រុមអាជីវករមួយចំនួននៅតែមិនព្រមចូលទៅលក់ដូរនៅតាមតូបនៅឡើយ ដោយពួកគាត់នាំគ្នាយកចិញ្ចើមផ្លូវជាកន្លែងលក់ដូរស្ទើបិទផ្លូវជិតទៅហើយ តើអាជ្ញារធរគួរចាត់វិធានការបែបណា?៕ ដោយៈ សេង រត្ន័ និពន្ធនាយករង គេហទំព័រ ប៉ោយប៉ែតប៉ុស្តិ៍ www.poipetpostnews.com