ខេត្តកំពត ៖ ជនសង្ស័យដែលជាប់ពាក់ព័ន្ធគ្រឿងញៀនចំនួន០៥នាក់ ត្រូវបានសមត្ថកិច្ចជំនាញខេត្ត សហការជាមួយកម្លាំងអធិការដ្ឋាននគរបាលស្រុកកំពង់ត្រាច ឈានដលើការបង្ក្រាប កាលពីវេលាម៉ោង១៥និង៤៥ នាទីរសៀល ថ្ងៃទី០៩ ខែកុម្ភៈ ឆ្នាំ២០១៩ ត្រង់ចំណុចភូមិកោះខ្លូត ឃុំកំពង់ត្រាចខាងកើត ស្រុកកំពង់ត្រាច ខេត្តកំពត។ ក្នុងប្រតិបតិ្តការខាងលើ កម្លាំងសមត្ថកិច្ចបានដកហូតនូវវត្ថុតាងថ្នាំញៀន ចំនួន១៨ កញ្ចប់តូច ផងដែល។ ទាក់ទិននឹងករណីបង្ក្រាបបទល្មើសគ្រឿងញៀនខាងលើ សមត្ថកិច្ចបានឱ្យដឹងថា កាលពីរសៀលថ្ងៃទី០៩ ខែកុម្ភៈ ឆ្នាំ២០១៩ ដោយមានសេចក្តីរាយការណ៍ពីពលរដ្ឋល្អក្នុងមូលដ្ឋាន កម្លាំងសមត្ថកិច្ចក៏បានសហការចុះទៅបង្ក្រាបក្រុមប្រព្រឹត្តគ្រឿងញៀននៅត្រង់ចំណុចភូមិកោះខ្លូត ឃុំកំពង់ត្រាចខាងកើត ស្រុកកំពង់ត្រាច ដោយឃាត់ខ្លួនជនសង្ស័យចំនួន៥នាក់ និងដកហូតវត្ថុតាងថ្នាំញៀនបានចំនួន១៨កញ្ចប់តូច។សមត្ថកិច្ចបានបញ្ជាក់ទៀតថា ជនសង្ស័យដែលពាក់ព័ន្ធគ្រឿងញៀនរួមមានឈ្មោះដូចខាងក្រោម៖ ១/-ឈ្មោះ ប៉ែត សុវណ្ណនុត ភេទប្រុស អាយុ២៣ឆ្នាំ។ ២/-ឈ្មោះ ជីវ សុខម៉េង ភេទប្រុស អាយុ១៩ឆ្នាំ អ្នកទាំងពីររស់នៅក្នុងភូមិកោះតាចាន់ ឃុំកំពង់ត្រាចខាងកើត ស្រុកកំពង់ត្រាច ខេត្តកំពត។ ៣/-ឈ្មោះ ឌុន សុផានិត ភេទប្រុស អាយុ២០ឆ្នាំ រស់នៅភូមិរបងក្រាស់ ឃុំកំពង់ត្រាចខាងកើត ស្រុកកំពង់ត្រាច។ ៤/-ឈ្មោះ ប្រាក់ សិទ្ធ ភេទប្រុស អាយុ២១ឆ្នាំ។ ៥/-ឈ្មោះ ស៊ុន សុភ័ក្រ ភេទប្រុស អាយុ១៨ឆ្នាំ អ្នកទាំងពីររស់នៅភូមិកោះខ្លូត ឃុំកំពង់ត្រាចខាងកើត ស្រុកកំពង់ត្រាច ខេត្តកំពត។ បច្ចុប្បន្នជនសង្ស័យរួមទាំងវត្ថុតាង សមត្ថកិច្ចបាននិងកំពុងកសាងសំណុំរឿងដើម្បីអនុវត្តតាមនីតិវិធីច្បាប់៕ ដោយៈ សេង រត្ន័ និពន្ធនាយករង គេហទំព័រ ប៉ោយប៉ែតប៉ុស្តិ៍ www.poipetpostnews.com