ខេត្តកែប៖ ពិធីបិទកិច្ចប្រជុំ បូកសរុបលទ្ធផលការងារឆ្នាំ២០១៨ និងលើកទិសដៅអនុវត្តការងារឆ្នាំ២០១៩ របស់មន្ទីរសាធារណការ និងដឹកជញ្ជូនខេត្តកែប ត្រូវបានប្រារព្វឡើងកាលពីព្រឹកថ្ងៃសុក្រ១០កើត ខែផល្គុន ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី១៥ ខែមីនា ឆ្នាំ២០១៩ ក្រោមអភិបតីភាព លោក កែន សត្ថា អភិបាលនៃគណៈអភិបាលខេត្តកែប និងមានការចូលរួមផងដែរពី សំណាក់ លោកអភិបាលរងខេត្ត គណៈអភិបាលក្រុង ស្រុក ប្រធាន អនុប្រធានមន្ទីរអង្គភាពជំុវិញខេត្ត កងកម្លាំងប្រដាប់អាវុធទាំងបីអង្កភាព និងមន្ត្រីក្នុងមន្ទីរជំនាញជាច្រើនរូប។ លោក ម៉ម ទូច ប្រធានមន្ទីរុសាធារណការ និងដឹកជញ្ជូនខេត្តកែបបានឲ្យដឹងថា ចក្ខុវិស័យរបស់មន្ទីរសាធារណការ និងដឹកជញ្ជូនខេត្តកែប គឺបានកែលម្អ និងខិតខំធ្វើអោយប្រសើរឡើងនូវផ្លូវថ្នល់ទាំងឡាយនៅក្នុងភូមិសាស្ត្រខេត្ត ដើម្បីរួមចំណែកប្រកួតប្រជែងទីក្រុងស្អាត ឲ្យសកិ្តសមជាតំបន់ទេសចរណ៍ធម្មជាតិពិតៗ និងផ្តល់សេវាសាធារណៈ ជូនដល់ប្រជាពលរដ្ឋ ប្រកបដោយប្រសិទ្ធភាព និងទាន់ពេលកំណត់។ លោកបានបន្តថា៖ ដើម្បីឆ្ពោះទៅរកគោលដៅចម្បងជាយុទ្ធសាស្ត្រដូចខាងលើ មន្ទីរសាធារណការ និងដឹកជញ្ជូនខេត្តកែប បានអនុវត្តយ៉ាងពេញលេញ ដូចជា ការលើក កម្ពស់ ការផ្តល់សេវាសាធារណៈគ្រប់ផ្នែក នៅគ្រប់ថ្នាក់ ក្នុងមូលដ្ឋានជូនប្រជាជន និងគ្រប់មជ្ឈដ្ឋាន អោយកាន់តែប្រសើរឡើងទាំងគុណភាព ប្រសិទ្ធភាព និងប្រសិទ្ធផល ជាសេវាសាធារណៈដែលនៅកៀកជិតជាមួយប្រជាជន​ និងទទួលបានការជឿទុកចិត្ត។លើសពីនេះក្នុងនាមមន្ទីរជំនាញ ក៏ត្រូវចាំបាច់ពង្រឹងសមត្ថភាពរបស់មន្ត្រីសាធារណៈក្នុងការផ្តល់សេវាជូនប្រជាពលរដ្ឋប្រកបដោយភាពស្មោះត្រង់ និងការទទួលខុសត្រូវខ្ពស់ ដោយបន្តផ្តល់អាទិភាព ចំពោះការអភិវឌ្ឍន៍វិស័យហេដ្ឋារចនាសម្ព័ន្ធ ថែរក្សា និងបន្តពង្រីករាល់សមិទ្ធផលដែលសម្រេចបាន អោយបានគង់វង្សយូរអង្វែង។ ថ្លែងក្នុងឱកាសបិទកិច្ចប្រជុំនាព្រឹកនេះ លោក កែន សត្ថា អភិបាលខេត្ត បានលើកឡើងថា៖ដោយផ្អែកតាមកម្មវិធី នយោបាយរបស់រាជរដ្ឋាភិបាលកម្ពុជា ក៏ដូចជាយុទ្ធសាស្ត្ររបស់ក្រសួងសាធារណការ និងដឹកជញ្ជូន រដ្ឋបាលខេត្តកែប បានជំរុញដល់មន្ទីរសាធារណការ និងដឹកជញ្ជូនខេត្ត អោយចូល រួមអនុវត្ត នូវយុទ្ធសាស្ត្រចតុកោណដំណាក់ កាលទី៣ ប្រកបដោយការប្តេជ្ញាខ្ពស់ ដើម្បីសម្រេចអោយបាន នូវកំណើនសេដ្ឋកិច្ច សម្រាប់ប្រជាជន និងគោលដៅអភិវឌ្ឍន៍ខេត្តទាំងមូល។ ជាមួយគ្នានេះដែល រាជរដ្ឋាភិបាល បាននឹងកំពុងអនុវត្តកម្មវិធីកំណែទម្រង់លើគ្រប់វិស័យក្នុងគោលបំណងពន្លឿនល្បឿន នៃការកាត់បន្ថយភាពក្រីក្រ ដែលជាចំណុចស្នូលនៃគោលនយោបាយ និងយុទ្ធសាស្រ្តអភិវឌ្ឍន៍របស់កម្ពុជា។ លោកអភិបាលខេត្ត បានបញ្ជាក់ទៀតថា៖ ចំពោះវិស័យសាធារណការវិញ ផ្លូវជាតិ និងផ្លូវក្នុងទីរួមខេត្ត ត្រូវបានជួសជុល និងស្តារប្រព័ន្ធហេដ្ឋារចនាសម្ព័ន្ធឡើងវិញជាបន្តបន្ទាប់ ដើម្បីសម្រួលដល់ការធ្វើដំណើរ ជូនប្រជាពលរដ្ឋទូទៅផងដែរ។ ទន្ទឹមនេះ ការគ្រប់គ្រងយាយន្តដឹកជញ្ជូនគ្រប់ផ្នែក ក៏មានការរីកចម្រើនជាងមុនផងដែល៕ ដោយៈ សេង រត្ន័ និពន្ធនាយករង គេហទំព័រ ប៉ោយប៉ែតប៉ុស្តិ៍ www.poipetpostnews.com