ខេត្តព្រះវិហារ៖ ផ្ទះប្រជាពលរដ្ឋជាច្រើនខ្នង បានរងការខូចខាតដោយសារគ្រោះធម្មជាតិខ្យកកន្ត្រាក់ ដូចជារបើកដំបូល របើកជញ្ជាំង រលំរាបដល់ដី បាក់ដើមឈើនៅតាមផ្លូវ និងរន្ទះបាញ់មនុស្ស នៅរសៀលថ្ងៃទី២៣ ខែមីនា ឆ្នាំ២០១៩ នៅក្នុងស្រុកចំនួន៣ នៃខេត្តព្រះវិហារ។ លោកវរសេនីយ៍ឯក ឈួរ ម៉ាឌី អធិការនគរបាលស្រុកឆែប ខេត្តព្រះវិហារ បានអោយដឹងថា៖ នៅវេលាម៉ោង០៤និង៤៧នាទីល្ងាចថ្ងៃនេះ មានគ្រោះធម្មជាតិភ្លៀងផ្គរ លាយឡំនិងខ្យល់កន្ត្រាក់ បានធ្វើអោយផ្ទះប្រជាពលរដ្ឋចំនួន ២០ខ្នង រងការខូចខាត របើកដំបូល និងរលំទាំងស្រុង នៅភូមិពោធិទាប ឃុំម្លូរព្រៃមួយ ស្រុកឆែប។ ក្នុងនោះមានផ្ទះ ៦ខ្នងត្រូវរលំដួលទាំងស្រុង និង១៤ខ្នងទៀត របើកដំបូល របើកជញ្ជាំង និងមានដើមឈើអមសងខាងផ្លូវ ក៏ត្រូវបានរលំផងដែល។ លោកអធិការស្រុក បានអោយដឹងទៀតថា៖ ក្នុងហេតុការណ៍ខ្យល់កន្ត្រាក់លាយឡំនិងភ្លៀងផ្គនេះ បណ្តាលអោយរន្ទះបាញ់មនុស្សស្រីម្នាក់ផងដែល តែមិនបណ្តាលអោយបាត់បង់ជីវិតនោះទេ ក្រោយការយកចិត្តទុកដាក់ជួយសង្រ្គោះពីក្រុមគ្រូពេទ្យនៃមន្ទីរពេទ្យបង្អែក ១៦មករា។ ជាមួយគ្នានេះ លោកវរសេនីយ៍ឯក សាយ ដេត អធិការនគរបាលស្រុករវៀង បានថ្លែងប្រាប់អោយដឹងនៅយប់ថ្ងៃនេះថា៖ នៅស្រុករបស់លោក មានផ្ទះប្រជាពលរដ្ឋជាច្រើនខ្នង ក៏រងការខូចខាត មានដូចជារលំទាំងស្រុង និងរបើកដំបូល ដោយសារខ្យល់កន្ត្រាក់នេះផងដែល។ លោកថាតួលេខបឋម មានរលំទាំងស្រុង៣ខ្នង និងរបើកដំបូល១០ខ្នង ដោយសារពេលនេះមេឃកំពុងភ្លៀងខ្លាំង ពុំអាចរាប់ចំនួនអោយពិតប្រាកដបានទេ។ ដោយឡែកនៅស្រុកជ័យសែន ផ្ទះប្រជាពល រដ្ឋ១ខ្នង ក៏ត្រូវបានរងការខូចខាត ដោយខ្យល់កន្ត្រាក់វាយផ្តួលរំលំទាំងស្រុងផងដែល៕ ដោយៈ ជួង វិសិដ្ឋ និពន្ធនាយក គេហទំព័រ ប៉ោយប៉ែតប៉ុស្តិ៍ www.poipetpostnews.com