ក្រុងប៉ោយប៉ែត៖ នៅព្រឹកថ្ងៃអាទិត្យ ទី០៥ ខែឧសភា ឆ្នាំ២០១៩ នេះ លោក គាត ហ៊ុល អភិបាលនៃគណៈអភិបាលក្រុងប៉ោយប៉ែត បានដឹកនាំកម្លាំង អាជ្ញាធរសង្កាត់/ភូមិ/ឃុំ។ បានបើកការដ្ឋានស្ថាបនាចាក់ផ្លូវបេតុងមួយខ្សែ ដែលមានប្រវែង ៣៦០ម៉ែត្រ ត្រង់ចំណុចផ្លូវ ហ្គូលឌិន ស្ទូចត្រី ស្ថិតក្នុងភូមិសាមគ្គីមានជ័យ សង្កាត់ និងក្រុងប៉ោយប៉ែត ខេត្តបន្ទាយមានជ័យ។ លោក គាត ហ៊ុល អភិបាលនៃគណៈអភិបាល ក្រុងប៉ោយប៉ែត បានមានប្រសាសន៍ឲ្យដឹងថា៖ ចំពោះការសាងសង់ផ្លូវបេតុងមួយខ្សែនេះ គឺជា ថាកវិការ របស់ប្រជាពលរដ្ឋ និងអាជីវករ ១០០% គឺ៥០បូក៥០ សងខាងផ្លូវ។លោកបានបញ្ជាក់ឲ្យដឹងទៀតថា៖ ការសាងសង់ផ្លូវបេតុងនេះមិនមែនទើបតែឥឡូវនេះទេ គឺចាប់តាំងពីអភិបាលក្រុងជំនាន់មុន បី/បួន ដង់ហើយ តាំងតែពីជំនាន់ឯកឧត្តម ទ្រី ណារិន ឯកឧត្តម ង៉ោ ម៉េងជ្រួន ឯកឧត្តម សាន ស៊ានហូ រហូតមកដល់រូបលោក។ លោក គាត ហ៊ុល បានប្រាប់ឲ្យដឹងទៀតថា៖ ដោយសារតែខាងភូមិ/ឃុំ មានការគៀងគរប្រជាពលរដ្ឋ និងអាជីវករអោយចូលរួមស្ថាបនាផ្លូវថ្ម មកជាផ្លូវបេតុងវិញ ដោយមានការដេញថ្លៃពីក្រុមហ៊ុនច្បាស់លាស់ ទើបសម្រេចបានស្ថាបនាចាក់បេតុងផ្លូវមួយខ្សែនេះ ដែលមានប្រវែង ៣៦០ ម៉ែត្រ។ ហើយការសាងសង់ផ្លូវបេតុងនេះគឺមិនមែនធ្វើឡើងតែមួយថ្ងៃឫពីរថ្ងៃនោះទេ ហើយយើងធ្វើជាបន្តបន្ទាប់។ ហើយកន្លែងណា ដែលប្រជា ពលរដ្ឋ និងអាជីវករសហការគ្នាស្រេចបាច់ហើយ ជាមួយនឹងក្រុមហ៊ុនដេញថ្លៃត្រូវរ៉ូវគ្នានោះ គឺចាប់ផ្តើមស្ថាបនាចាក់បេតុងតែម្ដង។ ឆ្លៀតក្នុងឱកាសថ្ងៃនេះផងដែរ លោក គាត ហ៊ុល បានប្រាប់សារព័ត៌មានយើងខ្ញុំឲ្យដឹងថា៖ ភាគច្រើនប្រជាពលរដ្ឋរស់នៅក្រុងប៉ោយប៉ែត បានចូលរួម ១០០% ដោយ៥០បូក៥០ សងខាងផ្លូវ ហើយចំណែកផ្លូវឆ្លងកាត់វិញ គឺខាងអាជ្ញាធរជាអ្នកចេញថាកវិការស្ថាបនា៕ ពីខ្ញុំ ជួង វណ្ណអាង ចាងហ្វាងការផ្សាយ គេហទំព័រ ប៉ោយប៉ែតប៉ុស្តិ៍ www.poipetpostnews.com