ខេត្តព្រះសីហនុ៖ យោងតាមសេចក្តីប្រកាស របស់រដ្ឋបាលសាលាខេត្តព្រះសីហនុ គិតត្រឹមម៉ោង០៤និង៣០នាទីរសៀល ថ្ងៃទី២៤ ខែមិថុនា ឆ្នាំ ២០១៩ ក្រុមប្រតិបត្តិការជួយសង្គ្រោះ បានរកឃើញជនរងគ្រោះបន្ថែមបានចំនួន ៤នាក់ទៀត ដែលក្នុងនោះ មានពីរនាក់នៅរស់រានមានជីវិត សរុបជនរងគ្រោះដែលបានយកចេញពីគំនរបាក់បែក នៃអាគារបាក់រលំ មានចំនួនសរុប ៥៤នាក់ ក្នុងនោះអ្នកស្លាប់មានចំនួន ២៨នាក់ ស្រី០៤នាក់ និងអ្នករងរបួសមានចំនួន២៦នាក់ ស្រី០២នាក់ ហើយចំពោះជនរងគ្រោះដែលបាត់បង់ជីវិត ត្រូវបានក្រុមគ្រួសារមកបំពេញឯកសារ ទទួលយកសពទៅធ្វើបុណ្យតាមប្រពៃណីបានចំនួន២៤សព រួចហើយដែល។ អ្នកនាំពាក្យរដ្ឋបាលសាលាខេត្តព្រះសីហនុ បានអោយដឹងថា៖ ក្រុមប្រតិបត្តិការសង្គ្រោះ រុះរកជនរងគ្រោះនៅតែបន្តរុះរករហូតដល់យកជនរងគ្រោះចែញអោយអស់ពីគំនរបាក់បែកនៃអាគារបាក់រលំ។ សូមបញ្ជាក់ថា៖ មកទល់ពេលនេះ គំនរបាក់បែកត្រូវបានក្រុមការងារជួយសង្គ្រោះ ធ្វើការករកាយលើកចេញបានចប្រមាណ ៨៥ ភាគរយហើយ ។ ជាមួយគ្នានេះផងដែរ ក្នុងនាមក្រុមការងារជួយសង្គ្រោះទាំងអស់ និងព្រមទាំង រដ្ឋបាលសាលាខេត្តព្រះសីហនុ សូមថ្លែងអំណរគុណយ៉ាងជ្រាលជ្រៅជាទីបំផុតចំពោះ វត្តមានដ៏ខ្ពង់ខ្ពស់ របស់សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលសម្ដេចបានអញ្ជើញចុះត្រួតពិនិត្យ និងដឹកនាំបញ្ជាផ្ទាល់នៅទីតាំងកើតហេតុទាំងកណ្ដាលអធ្រាត្រ បន្ទាប់ពីបានបញ្ចប់បេសកកម្មក្រៅប្រទេស។ វត្តមានដ៏ខ្ពង់ខ្ពស់ របស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជាគឺពិតជាបានផ្តល់នូវ កម្លាំងចិត្តដ៏ធំធេងដល់ក្រុមគ្រួសារជនរងគ្រោះ ព្រមទាំងបានលើកទឹកចិត្តដល់ក្រុមការងារជួយសង្គ្រោះដែលកំពុងចូលរួមយ៉ាងសកម្មនៅក្នុងប្រតិបត្តិការរុករកជនរងគ្រោះដែលនៅសល់ក្រោមគំនរអគារបាក់រលំនេះ អោយកាន់តែបានឆាប់រួចរាល់ជាស្ថាពរ ។ សូមបញ្ជាក់ថា៖ រដ្ឋបាលសាលាខេត្តព្រះសីហនុ ក៏បានប្រកាសជូនបងប្អូនសាច់ញាតិ ដោយសង្ស័យថា មានគ្រោះថ្នាក់នៅក្នុងឧបទ្ទវហេតុនេះ សូមទំនាក់ទំនងសាកសួរព័ត៌មាន តាមរយះលេខទូរស័ព្ទ:០១៦ ៥២៦ ៥២០ និង ០១៦ ៣២១ ០១០ ៕ រាយការណ៍ដោយៈ អ្នកយកព័ត៌មាន គេហទំព័រ ប៉ោយប៉ែតប៉ុស្តិ៍ www.poipetpostnews.com