សាកសពមន្ដ្រីយោធាដែលធ្លាក់ចូលទឹក ត្រូវបានរកឃើញទាំងពីរនាក់ហើយ ចម្ងាយពីកន្លែងកើតហេតុជាង១០គីឡូម៉ែត្រ...!!! ខេត្តស្ទឹងត្រែង៖ សាកសពមន្ដ្រីយោធា០២រូប ដែលធ្លាក់ចូលកន្លែងទឹកគួចខ្លាំងយកទៅបាត់នៅស្រុកសៀមប៉ាង ខេត្តស្ទឹងត្រែង នោះ ត្រូវសមត្ថកិច្ចរកឃើញទាំងពីរនាក់ហើយ នៅព្រឹកថ្ងៃទី២៦ ខែកក្កដា ឆ្នាំ២០១៩ នេះ ដែលសាកសពបានអណ្ដែត ចម្ងាយពីកន្លែងកើតហេតុជាង១០គីឡូម៉ែត្រ ពោលនៅចំណុចខាងក្រោមកោះទន្សាយ ស្រុកសៀមប៉ាង។ លោកឧត្តមសេនីយ៍ត្រី អៀង វ៉ាន់ឌី មេបញ្ជាការកងរាជអាវុធហត្ថខេត្តស្ទឹងត្រែង បបានប្រាប់បណ្ដាញព័ត៌មាន យេីងអោយដឹងនៅថា៖ សាកសពមន្ដ្រីយោធាម្នាក់ ត្រូវបានប្រទះឃើញនៅវេលាម៉ោង០៧និង៤១នាទីព្រឹកនេះ ដែលមានឈ្មោះ សុខ សុវណ្ណឌី ជាអ្នកជិះពីក្រោយ និងមានជំងឺគ្រុនចាញ់ ហើយរហូតមកដល់ម៉ោងជាង៨ព្រឹក សាកសពម្នាក់ទៀតក៏ត្រូវបានសមត្ថកិច្ចរកឃើញដូចគ្នា ដែលមានចម្ងាយ៥០០ម៉ែត្រ ពីសពដែលរកឃើញដំបូង។ លោកឧត្តមសេនីយ៍ត្រី អៀង វ៉ាន់ឌី បានបន្តទៀតថា៖ សាកសពជនរងគ្រោះដែលរកឃើញដំបូង ត្រូវបានយកឡើងលើគោកហើយ ដោយមានក្រុមគ្រួសារ និងសមត្ថកិច្ចជំនាញកំពុងធ្វើការពិនិត្យ។ ដោយឡែក សាកសពជនរងគ្រោះទី០២ ដែលជាអ្នកឌុបនោះ មិនទាន់យកឡើងលើគោកបាននៅឡើយទេ ពោលតម្រូវអោយដាក់ទូកអូសសាកសពចេញមកសិន ដោយសារស្ថានភាពទីតាំងមានការលំបាកខ្លាំង។ ចំណែកលោកឧត្តមសេនីយ៍ទោ ម៉ៅ តារា ស្នងការនគរបាលខេត្តស្ទឹងត្រែង ក៏បានបញ្ជាក់ដូចគ្នាផងដែលថា៖ សាកសពមន្ដ្រីយោធាទាំងពីរនាក់ត្រូវបានរកឃើញ ហើយត្រូវបានសមត្ថកិច្ច និងប្រជាពលរដ្ឋសហការគ្នា ទាញឡើងយកមកលើគោក ដើម្បីធ្វើការពិនិត្យ និងបញ្ជូនទៅធ្វើបុណ្យតាមប្រពៃណី។ គួបញ្ជាក់ផងដែលថា៖ មន្រ្តីយោធាខ្មែរ០២រូប ដែលឈរជើងការពារទឹកដីនៅតំបន់ព្រំដែនអូរអាឡៃ ក្នុងស្រុកសៀមបាង ខេត្តស្ទឹងត្រែង កន្លែងដែលទ័ពឡាវធ្លាប់ចូលកាន់កាប់ ត្រូវបានទឹកហូរកួចយកទៅបាត់ពេលពួកគេកំពុងធ្វើដំណើរ ទៅព្យាបាលជំងឺគ្រុនចាញ់ កាលពីថ្ងៃទី២៤ ខែកក្កដា ឆ្នាំ២០១៩ កន្លងទៅនេះ។ យុទ្ធជនទាំងពីររូបដែលជួបគ្រោះអកុសលនេះ មានឈ្មោះ សុខ សុវណ្ណឌី និងឈ្មោះ ភី នីដាលិ។ ពួកគេបម្រើការងារក្នុងអង្គភាព កងអនុសេនាធំទី៣ វរសេនាតូច កាំភ្លើងធំ បញ្ជាការស្រាលយោធភូមិភាគទី១ ប្រចាំការនៅភូមិសាស្ត្រអូរអាឡៃ។ យុទ្ធជនទាំងពីររូបជាកងទ័ព ដែលទើបនឹងប្រឡងជាប់ចូលបម្រើកងទ័ព កាលពីឆ្នាំ២០១៨។ ហើយបើយោងតាមសម្តីមន្ដ្រីយោធា នៃយោធភូមិភាគទី១ ជនរងគ្រោះឈ្មោះ ភីនី ដាលិ មានតួនាទីជា នាយក្រុមស៊ើបការណ៍ មានស្រុកកំណើតនៅផ្សារតានី ឃុំភ្នំកុង ស្រុកអង្គរជ័យ ខេត្តកំពត។ និងម្នាក់ទៀតឈ្មោះ សុខ សុវណ្ណឌី មានស្រុកកំណើតនៅភូមិកោះតាកូវ ឃុំឫស្សី ស្រុកកំពង់ត្រាច ខេត្តកំពត៕ រាយការណ៍ដោយៈ អ្នកយកព័ត៌មាន គេហទំព័រ ប៉ោយប៉ែតប៉ុស្តិ៍ www.poipetpostnews.com