ឈ្មួញវៀតណាមម្នាក់ បានទំលាយហែកកេរ្ត៍រឿងគយរដ្ឋករខ្មែរប្រចាំច្រកជ្រៃធំ ខេត្តកណ្ដាល ថាការបង់ពន្ធខ្លះ និងទំនិញមិនបង់ពន្ធខ្លះ ទើបបានចំណេញ...!!!
ខេត្តកណ្ដាល៖ ដោយយោងតាមការចុះផ្សាយសារព័ត៌មានក្នុងស្រុកជាច្រើនស្ថាប័ន កាលពីថ្ងៃទី០៩ ខែសីហា ឆ្នាំ២០១៩ ថ្មីៗនេះ បានចុះផ្សាយពាក់ព័ន្ធទៅនិងរថយន្តដឹកទំនិញធំៗ ដែលគេសង្ស័យថា៖ ជារថយន្តរបស់លោកឧកញ្ញ៉ា សុខ ថៃ បាននាំចូលទំនិញពីប្រទេសវៀតណាម តាមច្រកកោះធំ ក្នុងខេត្តកណ្ដាល ដោយមិនមានការត្រួតពិនិត្យច្បាស់លាស់ពីមន្ត្រីគយរដ្ឋករដែលប្រចាំការនៅច្រកទ្វារអន្តរជាតិនោះទេ។
ហើយបើយោងតាមការបញ្ជាក់ពីក្រុមឈ្មួញ ដែលដឹកទំនិញពីប្រទេសវៀតណាម បានអោយដឹងថា៖ ទំនិញរបស់លោកឧកញ៉ា សុខ ថៃ ត្រូវបានយកមកស្តុបទុកក្នុងឃ្លាំងជាច្រើនកន្លែងក្នុងក្រុងតាខ្មៅ ដែលស្ថិតក្នុងដែនដីត្រូវបង់ពន្ធរបស់លោក អន ស៊ីនួន ប្រធានសាខាគយនិងរដ្ឋាករប្រចាំខេត្តកណ្ដាល។ ប្រភពបានអោយដឹងថា៖ ឃ្លាំងស្តុបទំនិញគេចពន្ធរបស់លោកឧកញ៉ា សុខ ថៃ មានពីកន្លែងផ្សេងគ្នា គឺ ស្ថិតនៅចំណុចផ្ទះលេខ 048 ផ្លូវលេខ 21 ក្នុងសង្កាត់តាខ្មៅ ក្រុងតាខ្មៅ និងមួយទីតាំងទៀតស្ថិតនៅផ្លូវលេខ 21B ភូមិព្រែកសំរោង ក្រុងតាខ្មៅ។
ប្រភពដ៏ដែលបានបញ្ជាក់ថា៖ លោកឧកញ៉ាសុខ ថៃ តែងតែដឹកទំនិញគ្រប់ប្រភេទ ដោយមានការបង់ពន្ធខ្លះ និងមិនបង់ពន្ធខ្លះ ចូលតាមច្រកអន្តរជាតិជ្រៃធំ ខេត្តកណ្ដាល និងច្រកទ្វេភាគីបាក់ដៃ ក្នុងស្រុកអង្គរបុរីខេត្តតាកែវ ដោយមានឈ្មោះ(យំាង)ជនជាតិវៀតណាម ជាអ្នកគ្រប់គ្រងលើការដឹកទំនិញទាំងនេះ។
បុរសឈ្មោះ យាំង បានអោយដឹងថា៖ គាត់ជាអ្នកនាំទំនិញនេះចូលតាមច្រកជ្រៃធំ និងច្រកបាក់ដៃ ពិតប្រាកដមែន ប៉ុន្តែលោកបានអះអាងថា៖ ទំនិញនេះជារបស់អភិបាលរង ខេត្តកណ្ដាល ម្នាក់ ដែលលោកសុំមិនបញ្ចេញឈ្មោះ។ លោក (យាំង) បានបន្តទៀតថា៖ ជាធម្មតាលោកតែងតែដឹកទំនិញមកតាមរបៀបនេះ បើមិនធ្វើដូច្នេះមិនអាចមានប្រាក់ ចំណេញចែកជាមួយមន្ត្រីគយប្រចាំច្រកទ្វារព្រំដែន និង មេគយខេត្តកណ្ដាល បានទេ។
ចំណែកលោកឧកញ៉ា សុខ ថៃ បានឆ្លើយតបមកអ្នកសារព័ត៌មានក្នុងស្រុកថា៖ លោកពិតជាមានឃ្លាំងស្តុបទំនិញទាំងនេះមែន តែលោកបានលក់អោយឈ្មួញវៀតណាមឈ្មោះ(យាំង)ដែលជាដៃគូរកស៊ីជាមួយគ្នាបាត់ទៅហើយ។
ជុំវិញករណីដឹកជញ្ជូនទំនិញខាងលើ ទោះបីជាមានការបកស្រាយយ៉ាងនេះក្តីប្រជាពលរដ្ឋក៏ដូចជមហាជនទូទៅ សូមសំណូមពរដល់លោក គុណ ញឹម ប្រតិភូរាជរដ្ឋាភិបាលទទួលបន្ទុកអគ្គនាយកដ្ឋានគយនិងរដ្ឋាករ មេត្តាបើកការអង្កេតឃ្លាំងស្តុកទំនិញដែលសង្ស័យថា៖ បាននាំចូលនូវទំនិញគេចពន្ធជាច្រើនប្រភេទពីប្រទេសវៀតណាម ចូលមកកម្ពុជា ដើម្បីបញ្ជាក់អោយច្បាស់ពីភាពសុចរិត នៃការរកស៊ីការប្រកួតប្រជែងទីផ្សារសេរី ជាពិសេសទៅទៀត គឺត្រួតពិនិត្យថវិកាចំណូលពន្ធរដ្ឋដែលបាត់បង់ ដោយសារតែក្រុមបុគ្គលនិយមមួយក្តាប់តូចនេះផងបាទ៕
ដោយៈ ព្រីង សំឡត អ្នកយកព័ត៌មាន
គេហទំព័រ ប៉ោយប៉ែតប៉ុស្តិ៍
www.poipetpostnews.com
