ខេត្តសាកែវ៖ ករណីគ្រោះថ្នាក់ចរាចរណ៍ដ៏រន្ធត់មួយបានកើតឡើងរវាងរថយន្ត និងរថយន្ត បង្កអោយពលរដ្ឋខ្មែរចំនួន ៤ នាក់ បានស្លាប់ និង រងរបួសជាច្រើននាក់។ ដែលហេតុការណ៍នៃបានកើតឡើងនៅវេលាម៉ោង ១០ និង ២៤ នាទីព្រឹក ថ្ងៃព្រហស្បតិ៍ ១៤កើត ខែភទ្របទ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី ១២ ខែកញ្ញា ឆ្នាំ២០១៩ នេះ។ យោងតាមប្រភពពីកន្លែងកើតហេតុបានឱ្យដឹងថា៖ មុនពេលកើតហេតុដំឡើយ គេឃើញមានរថយន្តពីរគ្រឿងបើកបញ្ច្រាសទិសគ្នា លុះមកចំនុច មុខវត្តណូនជិក ឃុំវឌ្ឍនាណាក់ខន ស្រុកវឌ្ឍនាណាក់ខន ខេត្តសាកែវ បានបុកគ្នាយ៉ាងពេញទំហឹងតែម្តង។ ប្រភពដ៏ដែលបានអោយដឹងថា៖ រថយន្តម៉ាកToyota Camery ពាក់ស្លាកលេខាកែវ កខ-៣៧៨៩ ដឹកភ្ញៀវលក្ខណៈទេសចរណ៍បើកក្នុងទិសដៅបញ្ច្រាស់ទិសគ្នា បានបុកគ្នាយ៉ាងពេញទំហឹង ជាមួយរថយន្តប្រភេទវ៉ែន ពាក់ស្លាកលេខបាងកក ៣៣-៤៩៣៣ ដឹកអ្នកដំណើរ ក្នុងទិសដៅពីទីក្រុងបាងកក-ឆ្ពោះមកកាន់ផ្សាររោងក្លឿ ច្រកព្រំដែនអន្តរជាតិកម្ពុជា-ថៃ ប៉ោយប៉ែត-ខ្លងលឹក។ ប្រភពពីកន្លែងកើតហេតុបានបញ្ជាក់អោយដឹងថា៖ ក្នុងករណីគ្រោះថ្នាក់ចរាចរណ៍ខាងលើនេះ បានបណ្តាលឱ្យមានមនុស្សស្លាប់ចំនួន ៥ នាក់ និងរងរបួស ៧ នាក់។ ហើយក្នុងនោះ ពលរដ្ឋខ្មែរចំនួន ១០នាក់ ធ្វើដំណើរលក្ខណៈ(ជាទេសចរ និង អ្នកជំងឺ) ដែលជិះក្នុងរថយន្តវ៉ែន បើកបរដោយជនជាតិថៃ ទិសដៅពីបាងកក មកកាន់ច្រកព្រំដែនអន្តរជាតិប៉ោយប៉ែត-ខ្លងលឹក បានរងគ្រោះស្លាប់ចំនួន ៤នាក់ (ស្ត្រី៣នាក់និងម្នាក់ជាកុមារា)។ ចំណែក ៦នាក់ផ្សេងទៀត គឺ ៤នាក់រងរបួសស្រាល និង ២នាក់រងរបួសធ្ងន់ កំពុងទទួលការសង្គ្រោះនៅមន្ទីរពេទ្យ។ តៃកុងឡានវ៉ែន ជាជនជាតិថៃបានស្លាប់។ រីឯអ្នកបើកបររថយន្តទេសចរណ៍សន្លប់មិនទាន់ដឹងខ្លួននៅឡើយ ត្រូវបានរថយន្តសង្គ្រោះដឹកសង្គ្រោះជាបន្ទាន់ផងដែរ។ មន្ត្រីស្ថានអគ្គកុងស៊ុលនៃព្រះរាជាណាចក្រកម្ពុជាប្រចាំខេត្តសាកែវ(ស្រះកែវ) បានអោយដឹងថា៖ ក្រុមការងារលោកក៏បានចុះទៅកាន់កន្លែងកើតហេតុ ជួបជនរងគ្រោះដែលជាពលរដ្ឋខ្មែរ និង អាជ្ញាធរពាក់ព័ន្ធភាគីថៃ បាននិងកំពុងសហការសង្គ្រោះ និងទំនាក់ទំនងស្វែងរកសាច់ញាតិសព ជនរងគ្រោះ ដែលជាពលរដ្ឋខ្មែរ ព្រមទាំងអាជ្ញាធរពាក់ព័ន្ធថៃ-កម្ពុជា បានរៀបចំបែបបទ នាំយកសពទៅធ្វើបុណ្យតាមប្រពៃណីនៅកម្ពុជាវិញ។ សូមបញ្ជាក់ៈ ពលរដ្ឋខ្មែរទាំង ៤នាក់ ដែលបានជួបគ្រោះថ្នាក់ស្លាប់នោះ រស់នៅភូមិគោកព្រិច ឃុំតាផូ ស្រុកស្វាយចេក ខេត្តបន្ទាយមានជ័យ មានឈ្មោះដូចខាងក្រោម៖ ទី១.អោក លីម ភេទស្រី អាយុ ៥១ឆ្នាំ ទី២.ជួង ស៊ីញីន ភេទស្រី អាយុ ១៦ឆ្នាំ ទី៣.ជួង ចាន់នីន ភេទស្រី អាយុ ១៧ឆ្នាំ ទី៤.ជួង ឡៃអ៊ិន ភេទប្រុស អាយុ ១១ឆ្នាំ៕ ដោយៈ លោក ជួង វិសិដ្ឋ និពន្ធនាយក គេហទំព័រ ប៉ោយប៉ែតប៉ុស្តិ៍ www.poipetpostnews.com