ស្រុកសំឡូត៖ ថ្ងៃទី១៦ ខែកញ្ញា ឆ្នាំ២០១៩នេះ ប្រជាពលរដ្ឋជាង២០គ្រួសារត្រូវបានអាជ្ញាធរមានសមត្ថកិច្ច ចុះជួយជម្លៀសខ្លួនចេញពីលំនៅដ្ឋានក្នុងចំនួន០៤ឃុំនៃស្រុកសឡូត ខេត្តបាត់ដំបង ខណៈភ្លៀង ០១ មេ យ៉ាងគំហុក យប់ចុងក្រោយនេះ នៅប៉ែកខាងលើ តំបន់ជាប់ព្រំដែនកម្ពុជា-ថៃ ទើបបង្កជាទឹកជំនន់ឡើងខ្លាំង ដល់ថ្នាក់បាក់ស្ពានយោល រសាត់តាមទឹក និង ផ្លូវមួយចំនួនក៏ត្រូវបានលិចមិនអាចធ្វើដំណើរបាន ទើបធ្វើអោយអាជ្ញាធរមានសមត្ថកិច្ច ចុះជួយពលរដ្ឋជាង២០គ្រួសារ ជម្លៀសខ្លួនចេញពីលំនៅដ្ឋាន ទៅរកទីទួលសុវត្តិភាពមួយរយៈ។ ពាក់ព័ន្ធនិងបញ្ហានេះលោក​ សើ សាម៉េត អភិបាលស្រុកសំឡូត បានអោយដឹងនៅរសៀលថ្ងៃទី១៦ ខែឆ្នាំដ៏ដែលនេះថា៖ ការបង្កជាទឹកជំនន់យ៉ាងកំហ៊ុកក្នុងស្រុកសំឡូត គឺដោយសារប៉ុន្មានថ្ងៃចុងក្រោយនេះ មានទឹកភ្លៀងធ្លាក់តិចទួចរហូតមក លុះយប់មិញថ្ងៃទី១៥ ខែកញ្ញា ឆ្នាំ២០១៩ នៅតំបន់ព្រំដែនកម្ពុជា-ថៃ ក្នុងភូមិសាស្ត្រនៃស្រុកសំឡូតក៏បានធ្លាក់ភ្លៀងមួយមេធំ ទើបបង្កជាជំនន់ទឹកភ្លៀងតែម្តង បណ្តាលអោយចំនួន០៤ឃុំ មានដូចជា ឃុំតាតោក ឃុំសំឡូត ឃុំតាសាញ និងឃុំអូរតាតៀក ដែលបង្កអោយបាក់ស្ពានយោលស្ទឹងក្រញូង និងលិចផ្លូវ លិចផ្ទះប្រជាពលរដ្ឋចំនួន២៧គ្រួសារផងដែរ។ លោកបានបន្តអោយដឹងទៀតថា៖ ក្រោយពីមានជំនន់ទឹកភ្លៀងយ៉ាងគំហ៊ុក រហូតមកដល់ថ្ងៃទី១៦ ខែឆ្នាំដ៏ដែលនេះ ត្រូវបានមន្ត្រីធនធានទឹកនិងឧតុនិយមខេត្តបាត់ដំបងបានសម្រេចចិត្តបើកទ្វារទឹកក្នុងអាងពហុបំណងសេកសក បង្ហូរទឹកចូលក្នុងស្ទឹងសង្កែ ដើម្បីបណ្តោះទឹក ទើបធ្វើអោយស្ថានភាពទឹកផ្នែកខាងលើនៃស្រុកសំឡូត បានថយបន្តិច ចំណែកផ្លូវមួយចំនួននៅលិចលង់នៅឡើយ មិនទាន់អាចធ្វើដំណើរបានទេនោះទេ៕ ដោយៈ លោក សុខ បូរី និពន្ធនាយករង គេហទំព័រ ប៉ោយប៉ែតប៉ុស្តិ៍ www.poipetpostnews.com